گه‌ڕان

Shadow Shadow
سیاسه‌تی

ئێران: ڤاكسينەكەمان لەسەر گيانداران سەركەوتوو بووە

2020.08.22 - 23:46
ئێران: ڤاكسينەكەمان لەسەر گيانداران سەركەوتوو بووە

ناس کورد- 

كازم خاوازى، وەزيرى جيهادى كشتوكاڵى ئێران ڕايگەياند، ڤاكسينەكەى وڵاتەكەى دژى ڤايرۆسى كۆرۆنا كە لەلایەن پەيمانگاى ڕازى بۆ لێكۆڵينەوە لە ڤاكسين و پێكوتەكان بەرهەمهێنراوە، لەسەر گيانداران سەركەوتوو بووە.

 

خاوازى بە ئاژانسى هەواڵى فەرمى ئێرانى "ئيرنا"ى وتووە، ئەو ڤاكسينەى ئێران بەرهەمى هێناوە بۆ ڤايرۆسى كۆرۆنا لە تاقيكردنەوەكان لەسەر گيانداران سەركەوتوو بووە، لەئێستادا ئامادەكارى دەكرێت بۆ چوونە ناو قۆناغى يەكەمى تاقيكردنەوەى قەرەوێڵەيى.

 

ئەوەشى ڕوونكردووەتەوە: "هاوڕێكانمان لەژێر سەرپەرشتى ڕاستەوخۆى وەزارەتى تەندروستى لێكۆڵينەوەى چڕ و فراوانيان ئەنجامداوە بۆ گەيشتن بەو ڤاكسينە، لە هەموو تاقيكردنەوەكان لەسەر گيانداران سەركەوتوو بووە."

 

باسى لەوەشكردووە، لەئێستادا زانيار و بەڵگەكان ئامادە دەكرێن بۆ ئەوەى ڕادەستى وەزارەتى تەندروستى بكرێن تا ڕەزامەندى وەرگرن بۆ دەستكردن بە تاقيكردنەوەى قەرەوێڵەيى ڤاكسينەكە "تاقيكردنەوە لەسەر مرۆڤ".

 

دەشڵێت، لەساڵى 1995 كە ساڵى دامەزراندنيەتى پەيمانگاى ڕازى بۆ لێكۆڵينەوە لە ڤاكسين و پێكوتەكان گەورەترين دامەزراوەيە لە ئێراندا بۆ بەرهەمهێنانى ڤاكسينەكان.

 

كۆمارى ئيسلامى ئێران يەكێكە لە زەرەرمەندترين وڵاتەكانى جيهان بەهۆى ڤايرۆسى كۆرۆناوە و تائێستا 356 هەزار و 792 توشبوو 20 هەزار و 502 گيان لەدەستدا تۆمار كراون.