گه‌ڕان

Shadow Shadow
سیاسه‌تی

ژمارەیەک پەرلەمانتار داوا لە نەتەوەیەکگرتووەکان دەکەن لە ئاست پێشێلکارییەکان بەرانبەر خۆپیشاندەرانى هەرێم بێدەنگ نەبێت

2020.08.21 - 21:44
ژمارەیەک پەرلەمانتار داوا لە نەتەوەیەکگرتووەکان دەکەن لە ئاست پێشێلکارییەکان بەرانبەر خۆپیشاندەرانى هەرێم بێدەنگ نەبێت

ناس کورد-

 

ژمارەیەک ئەندامى پەرلەمانى عێراق داوا لە  نەتەوەیەکگرتووەکان دەکەن، لە ئاست پێشێلکاری هێزە ئەمنییەکانى هەرێم بەرانبەر خۆپیشاندەران بێدەنگ نەبێت و فشاربخاتە سەر بەرپرسانی هەرێم کە دوربکەونەوە لە بەکارهێنانی توندوتیژیی.

 

ئەو پەرلەمانتارانە کە پێکهاتوون لە ئەحمەد حاجی رەشید، سەرکەوت شەمسەدین، رێبوار کەریم محمود، غالب محەمەد عەلی، رابون مەعروف، موسەنا ئەمین لە نامەیەکدا کە ئاڕاستەى جنین بلاسخارت نێردەی نەتەوە یەکگرتووەکانیان کردووە لە عێراق ئاماژەیان بەوەکردووە "لە رۆژانى لە ۱۸ و ۱۹ ئاب و رۆژانی دوایی هێزەکانی سەر بە پارتی دیموکراتی کوردستان بە بەکارهێنانی چەک وبە فیشەک روبەروی گەنجانی خۆپیشاندەرانی شاری زاخۆ بونەوە و زیاتر لە ۱٠ کەس بە سەختی بە فیشەک بریندارکراون".

 

ئەوەشیان خستووەتەڕوو "هەرێمی کوردستان بە دۆخێکی ئابوری سەختدا تێدەپەرێ و بێ کارییەکی زۆر رووی لە هاوڵاتیانی هەرێم کردووە بەجۆرێک شارێکی گرنگی وەک زاخۆ، کە ناوەندێکی بازرگانی مەزنە، گەنجەکانی بەدەست بێکارییەوە دەناڵێنن و کاتێکیش دەیانەوێت خۆپیشاندان بکەن بە توندترین شێوە وەڵام ئەدرێنەوە و زیندانی ئەکرێن و بێ هیچ پارێزەرێک ناچار دەکرێن واژوو لەسەر بەڵگەنامەیەک بکەن کە چیتر خۆپیشاندان نەکەن".

 

هەروەها داوایان لە نیردەى نەتەوەیەکگرتووەکان کردووە، لە ئاست ئەم پێشێلکاریانە بێدەنگ نەبن و فشاربخەنەسەر بەرپرسانی هەرێم کە دوربکەونەوە لە بەکارهێنانی توندوتیژیی دژ بە خۆپیشاندەران کە بۆ داواکردنی مافەکانیان و دژ بە گەندەڵی رژاونەتە سەرشەقامەکان. 

 

نامەى ئەو پەرلەمانتارانە بۆ نێردەى نەتەوەیەکگرتووەکان لەکاتێکدایە، لەخۆپیشاندانەکەى چەند رۆژى ڕابردووى زاخۆدا هێزە ئەمنییەکان تەقەیان لە خۆپیشاندەران کرد بەمەبەستى بڵاوەپێکردنیان بەهۆیەوە ژمارەیەک کەس برینداربوون. هەروەها دەیان کەس دەستگیرکران.

 

ئەمرۆش نوسینگەی رێکخەری راسپاردە نێودەوڵەتییەکان لە حکومەتی هەرێمی كوردستان لە راگەیەنراوێکدا لایەنگرانی پەکەکە و نەوەى نوێى تۆمەتبار کرد بە "بەلاڕێدابردن و دروستکردنی ئاژاوە" لە خۆپیشاندانەکەدا.

 

ئاماژەى بەوەشکردووە، لە ئەنجامی تەقەکردن 61 کارمەندی هێزە ئەمنیەکان و چوار هاووڵاتی سڤیل برینداربوون کە یەکێکیان منداڵ بوو، هەروەها 26 ئۆتۆمبێلی هێزە ئەمنییەکان و هاووڵاتیان و موڵکی تایبەتی و گشتی زەرەر و زیانیان پێکەوت."   

  

بەوتەى نوسینگەکە "هێزە ئەمنییەکان راستەوخۆ تەقەیان لە خۆپیشاندەران نەکردووە و رێگایان لە تێکدەران گرتووە دوای ئەوەی هەوڵی سووتاندنی موڵکی گشتی و تایبەتیانداوە".