گه‌ڕان

Shadow Shadow
سیاسه‌تی

کۆمەڵى بەوە تاوانبار کردبوو کە سەدان خانەنشینى نایاسایى هەیە

کۆمەڵى ئیسلامى وەڵامى ئەندامێکى سەرکردایەتى پارتى دەداتەوە

2020.08.20 - 10:27
کۆمەڵى ئیسلامى وەڵامى ئەندامێکى سەرکردایەتى پارتى دەداتەوە

ناس کورد-

میدیاى فەرمى کۆمەڵى ئیسلامى کوردستان وەڵامى ئەندامێکى سەرکردایەتى پارتى دیموکراتى کوردستان دەداتەوە کە کۆمەڵى بەوە تۆمەتبار کردبوو کە خاوەنى سەدان لیوا و عەمید و عەقیدە و بە نایاسایى خانەنشین کراوون.

 

لە راگەیەندراوێکدا میدیاى فەرمى کۆمەڵى ئیسلامى کوردستان وەڵامى لێدوانێکى بڵند ئیسماعیل، ئەندامى سەرکردایەتى پارتى دیموکراتى دایەوە و تیایدا ئاماژە بەوە کراوە " پێدەچێت ئەو بەرپرسەی پارتی ئەو كاتەی پێشمەرگەكانی كۆمەڵ لە ژێر ناوی بزوتنەوەی ئیسلامیدا خەباتی چەكدارییان دژی حكوومەتی بەعس دەكرد، لە ئاشبەتاڵدا و لەئۆردوگاكانی كەرەج و شوێنەكانی دیکە بووبێت، بۆیە جێگەی سەرسوڕمان نییە نەزانێت كۆمەڵ خەباتی چەكداری و پێشمەرگەی دێرینی هەیە و لەو پێناوەشدا سەدان كادر و پێشمەرگەی شەهید بووە".

 

راگەیەندراوەکەى میدیاى کۆمەڵ ئاماژە بەوە دەکات کە کۆمەڵى ئیسلامی نەیشاردوەتەوە كە ژمارەیەكی كەمی پێشمەرگە دێریینەكانی كە لە پەنجەكانی دەست تێناپەڕن بە شێوەیەكی یاسایی خانەنشین كراون و تەواوی مەرجە یاساییەكانیان تێدابووە.

 

لە راگەیەندراوەکەدا سەرکردایەتییەکەى پارتى بە "کەم ئەزموون" ناوبراوە و ئاماژە بەوە کراوە لە کەم ئەزموونى خۆیەوە و لە میدیایەكی سەر بە باڵی هەواڵگری حزبەكەیەوە كۆمەڵ بە دۆسیەی تیرۆرەوە ببەستێتەوە، بەڵام بیری چووە حیزبەكەی تا ساڵی ٢٠١٤ بە فەڕمی لە لیستی تیرۆری ویلایەتە یەكگرتووەكانی ئەمریكادا بووە".

 

وەڵامەکەى میدیاى فەرمى کۆمەڵى ئیسلامى کوردستان دواى ئەوە هات کە لەمیانەى لێدوانێکى ڕۆژنامەوانى بۆ میدیاى حزبەکەى، بڵند ئیسماعیل، ئەندامى سەرکردایەتى پارتى دیموکراتى کوردستان رایگەیاند "کۆمەڵى ئیسلامى خاوەنی سەدان لیوا و عەمید و عەقیدە و بە نایاسایی خانەنشین كراون، بێ ئەوەی رۆژێك پێشمەرگە بووبن و كوردستانیان پاراستبێت".