گه‌ڕان

Shadow Shadow
سیاسه‌تی

دەستەی دەستپاکی عێراق: بە بەهای 46 ملیار دینار خانوبەرمان گەڕاندوەتەوە بۆ حکومەت

2020.08.18 - 15:12
دەستەی دەستپاکی عێراق: بە بەهای 46 ملیار دینار خانوبەرمان گەڕاندوەتەوە بۆ حکومەت

ناس کورد-

دەستەی دەستپاکی عێراق ڕایگەیاند، بە بەهای 46 ملیار دینار ژمارەیەک خانوبەرەیان لە پارێزگای کەرکوک لەچنگی زیادەڕۆکاران دەرهێناوە وگەڕاندویانەتەوە بۆ موڵکی دەوڵەت.

 

ئەمڕۆ (سێشەممە، 18ی ئابی 2020)  دەستەی دەستپاکی عێراق ڕایگەیاند، توانیویانە سێ خانووبەرە لەپارێزگای کەرکوک بگەڕێننەوە بۆ موڵکی دەوڵەت کە بەهای خەمڵێندراویان بە زیاترلە 46 ملیار دینار مەزەندە دەکرێت".

 

دەستەکە ئاماژەى بەوە کردووە "فەرمانگەی لێکۆڵێنەوەکانی سەر بە دەستەی دەستپاکی عێراق چەند کەسێکیان دەستگیرکردووە کە زیادەڕەویان کردووەتە سەر باڵەخانەیەکی سەر بە شارەوانی کەرکوک کە بەشێک لە باڵەخانەکەیان بۆخۆیان قۆستوەتەوە و دوکانیان لێی دروستکردووە و بەکرێ داویانە بەهاووڵاتیان، خانووبەرەکە بەهاکەی بە زیاتر لە 27 ملیار دینار دەخەمڵێنرێت".

 

ڕاگەیاندراوەکەی دەستەی دەستپاکی عێراق ئەوەی خستووەتەڕوو "لە هەڵمەتێکی دیکەیدا دەستەکە لە پارێزگای کەرکوک توانیویەتی زەوییەک کە ڕووبەرەکەی 95 دۆنمە کە خاوەندارێتی دەگەڕێتەوە بۆ شارەوانی کەرکوک بگەڕێننەوە بۆ موڵکی دەوڵەت کە لەلایەن چەند کەسێکەوە دەستی بەسەردا گیراوە و بەهای ئەو زەوییەش بە زیاتر لە 15 ملیار دینار مەزەندە دەکرێت". 

 

ئاماژ بەوەشکراوە "هەر لە کاروچالاکییە بەردەوامەکانی دەستەی دەستپاکی عێراق لە پارێزگای کەرکوک، توانراوە زەوییەک بەڕوبەری پێنج دۆنم بگەڕێننەوە بۆ موڵکی شارەوانی پارێزگاکە کە بەهاکەی بە چوار ملیار دینار مەزەندە دەکرێت".

 

دەستەى دەستپاکی عێراق جەختیلەوەشکردووەتەوە، پەڕاوی لێکوڵێنەوە لە دۆسییەکان بە پێی ڕێکارە یاساییەکان بۆ تاوانباران کراوەتەوە و لە ڕێگەی دادگای لێکۆڵێنەوەی کەرکوکەوە فەرمانی دەستگیرکردنیان بۆ دەرچووە.