گه‌ڕان

Shadow Shadow
سیاسه‌تی

ئەو هەنگاوە ئەوەیە کە میلیشیاکان دەیانەوێت

داواى هەڵگرتنى چەك شەقامى توڕەى عێراق دابەشدەکات

2020.08.16 - 18:39
داواى هەڵگرتنى چەك شەقامى توڕەى عێراق دابەشدەکات

ناس کورد-

 

بەهۆى بەردەوامى ميليشياكانى نزيك لە ئێران لە كوشتنى چالاكوانان و نەپاراستنیان لەلایەن حكومەتەوە، شەقامى عێراقى توڕەبونێكى ترى بەخۆيەوە بينيوە و بەشێك لە چالاكوانان داواى هەڵگرتنى چەك دەكەن بۆ خۆپاراستن، ئەوەش دواى كۆتا پرۆسەى كوشتنى چالاكوانێك لەپارێزگاى بەسرە.

 

چالاكوانانى عێراقى داوا دەكەن "گروپى خۆپاراستن" دروست بكرێت، ئەوەش بۆ ڕوبەڕوبونەوەى ئەو هەڵمەتە تيرۆركردنانەى ڕوبەڕويان دەبێتەوە، حكومەتيش بە بێدەنگى لەو هەڵمەتانە  تۆمەتبار دەكەن، ئەوەش بەتايبەتى دواى كوشتنى تەحسين ئوسامە، چالاكوان لە پارێزگاى بەسرە.

 

چالاكوانان ميليشياكانى نزيك لە ئێران بە پلاندانان و كوشتنيان تۆمەتبار دەكەن، سەرچاوە ئەمنيەكانيش باس لەوەدەكەن كە لێكۆڵينەوەكان لە تيرۆركردنى چالاكوانان ناگەنە هيچ ئەنجامێك.

 

لاى خۆيەوە ئەسعەد ناسرى يەكێك لە كەسە ديارەكانى ناو خۆپيشاندانەكانى عێراق داوا لە چالاكوانان دەكات بەرگرى لە خۆيان بكەن و لەوپەڕى هۆشياريدا بن، ئەوەش دواى چەند كاتژمێرێك لە ناشتنى چالاكوانەكەى بەسرە كە كۆتا قوربانى دەستى ميليشياكان بوو و دوو ڕۆژ پێش ئێستا لە پارێزگاى بەسرە بە 21 گولـلە تيرۆر كرا.

 

چالاكوانان لە تۆڕە كۆمەڵايەتيەكان هەڵمەتێكيان بەناوى "تيرۆركردن بەردەوامە و بكوژانيش ئازادن" دەستپێكردووە و ڕەخنە حكومەتەكەى مستەفا كازمى دەگرن، هاشتاگەكەش بووە بە بەربڵاوترين هاشتاگى تۆڕە كۆمەڵايەتيەكان لە عێراق.

 

سامح شەمخانى چالاكوان لە پارێزگاى بەسرە دەڵێت، خۆپيشاندەران بێزاربوون لە بە ئامانجگرتن و تيرۆركردنى چەندين چالاكوان، هەروەها ياسا تەنها بەسەر ئەواندا جێبەجێ دەكرێت و ڕێگەيان پێنادرێت چەكيان پێبێت، لەكاتێكدا بكوژان بە چەكى بێدەنگ و چەقۆوە بە دوايانەوەن.

 

تيرۆركردنى چالاكوان تەحسين ئوسامە كە داواى بەرەرنگاربونەوەى گەندەڵى و ميليشياكانى دەكرد توڕەييەكى زۆرى لە شەقامى عێراقيدا دروست كرد، بەتايبەتى بەهۆى ئەو شێوە دڕندانەى كە تيرۆركرا، ئەو يەكێك بوو لە خۆپيشاندەرە ديارەكانى بەسرە هەروەها باوكى چوار منداڵ بوو.

 

شەمخانى ئەوەشى ڕونكردوەتەوە، بژاردەى پەنابردن بۆ چەك بۆ خۆپاراستن بژاردەيەكى قورس و ئاڵۆزە، ئەوەش لەكاتێكدا كە زۆرينەى عێڕاقيەكان چەكيان هەيە و هێزە ئەمنيەكان بەتوندى لێپيێچينەوە لەو خۆپيشاندەرانە دەكەن كە چەكيان پێييە تەنانەت سادەترين جۆرى چەكيش، تەنانەت ئەگەر دارێكيش بێت، لەكاتێكدا بكوژان هەموويان چەكى بێدەنگيان پێييە و لە خاڵەكانى پشكنين بەبێ ئەوەى كەس ڕێگريان لێبكات دەربازيان دەبێت.

 

شەمخانى بە دوريشى دەزانێت خۆپيشاندەران بەدەم داواكارى هەڵگرتنى چەكەوە بچن و دەشڵێت، بارودۆخەكە قورسە و حكومەت خۆپيشاندەران ناپارێزێت و لێپرسينەوە لە بكوژانيش ناكات.

 

سەرچاوەيەكى ئەمنى لە دەزگاى هەواڵگرى سەربە وەزارەتى ناوخۆى عێراق بە پێگەى "الحرة" ى وتووە، دۆزينەوەى بكوژان لە ڕووى هونەرييەوە ئاسانە، ڕۆژانە دەزگاكانى پۆليس دەيان تۆمەتبار بە ئەنجامدانى تاوان دەدۆززنەوە، ئەوەش تەنها دواى چەند كاتژمێرێك ياخود چەند ڕۆژێكى كەم لە ئەنجامدانى تاوانەكە.

 

ڕونيشيكردوەتەوە، بەڵام تاوانى "تايبەت" ئاڵۆزترە چونكە لێكۆڵەران دەترسن كە خۆشيان ڕووبەڕووى كوشتن ببنەوە، ئەگەر دواى بكوژان بكەون.

 

هەمان سەرچاوە جەختیکردووەتەوە، دەزگا ئەمنيەكان خۆشيان سيخوڕى ئەو گروپە چەكداريانەيان تێدايە كە لەلايەن لايەنێكى سياسيەوە پشتگيرى دەكرێن و هەر لێكۆڵينەوەيەكى جدى ئەنجامدەرانى ڕووبەڕووى مردن دەكاتەوە، سەرەڕاى ئەوەش هەندێك جار ئەفسەرانى سەر بەو گروپە چەكداريانە خۆيان لێكۆڵينەوەكان بەڕێوە دەبەن بۆيە ئەنجامەكەى دەشارنەوە.

 

چالاكوانێكى خۆپيشاندانەكانى بەغدا بە هەمان پێگەى وتوە، بكوژان ناسراون و ئەوان تەنانەت بەبێ داپۆشينى دەموچاويشيان تاوانەكانيان ئەنجام دەدەن، چونكە باش دەزانن بەبێ ئەوەى لێپرسينەوەيان لێ بكرێت دەربازيان دەبێت.

 

ئەو چالاكوانە هێما بۆ ئەوەشدەكات، ميليشياكان بە ئاشكرا خۆپيشاندەرانيان كوشت لەسەردەمى حكومەتى عادل عەبدولمەهدى، ئێستاش يەك لەدواى يەك دەيانكوژن، هيچ شتێك نەگۆڕدراوە.

 

دواى زياتر لە مانگێك لە كوشتنى هيشام هاشمى شارەزاى ئەمنى ديارى عێراقى تەحسين ئوسامە چالاكوانيش كوژرا، مستەفا كازمى سەرۆك وەزيران بەڵێنى ئەوەى دابوو كە بكوژانى هاشمى بدۆزێتەوە بەسزاى خۆيان بگەيەنێت.

 

سەعد ميحنە چالاكوانى خۆپياشندانەكان لە شارى كەربەلا دەڵێت، داواكارى بۆ هەڵگرتنى چەك و خۆپاراستن لەو داواكاريانەن لەكاتى توڕەيى و ئازاردا دەكرێن، بەڵام واقعى نييە چونكە لە ڕاستيدا پێچەوانەى ئەوەيە كە خۆپيشاندانى بۆ ڕێكخراوە، ئەويش هێشتنەوەى چەك بەدەست دەوڵەت و سەروەرى دەسەڵاتى ياسایە.

 

باس لەوەشدەكات، خۆپيشاندەران باش دەزانن كە ئەو جۆرە داواكاريانە دەبێتە هۆى دروستبونى بيانويەك بۆ سەركەوتكردنى خۆپيشاندانەكان بەشێوەيەكى توندتر، هەروەها پاراستنى هەميشەيى بۆ خۆپيشاندەران دابين ناكات.

 

تەئكيديش دەكاتەوە، ئەركى حكومەتە بیانپارێزێت و ڕاستى ئەوەشى كە شكستى هێناوە لەو ئەركەيدا وایان لێناكات پێچەوانەى مەبدەئەكانیان بن، چونكە ئەو كارە ئەوەيە ميليشياكان دەيانەوێت كە ئەويش ئەوەيە هەمویان ببن بە تاوانبار.