گه‌ڕان

Shadow Shadow
سیاسه‌تی

مەرجى پەکەکە بۆ وەستانى چالاکییەکان لەسەر سنور ڕادەگەیەنێت

قەرەیلان  باسى هێرشەکەى تورکیا بۆ سەر هێزەکانى عێراق و پەکەکە دەکات

2020.08.16 - 18:11
App store icon Play store icon Play store icon
قەرەیلان  باسى هێرشەکەى تورکیا بۆ سەر هێزەکانى عێراق و پەکەکە دەکات

ناس کورد-



موراد قەرەیلان ڕایگەیاند، هێرشەکەى تورکیا بۆ سەر هێزەکانى پاسەوانى سنورى عێراق و گەریلاکانى پەکەکە، لەسنورى دەسەڵاتى ئەواندا نەبووە لە شوێنێک بووە کە هێزەکەى عێراق دیاریکردبوو بۆ کۆبوونەوە، مەرجێکیش بۆ وەستانى چالاکییەکانیان لەسەر سنور ئاشکرادەکات.

کەناڵی ناس کورد لە تێلیگرام جۆین بکە   

 

رۆژى 11ى ئەم مانگە، لەکاتێکدا هێزێکى پاسەوانى سنورى عێراق و وەفدێکى پەکەکە لەسنورى برادۆست لەکۆبوونەوەدا بوون بۆ چارەسەرکردنى گرژییەکانى نێوانیان، کەوتنە بەر بۆردومانى تورکیا و بەهۆیەوە دوو ئەفسەرى عێراق کوژران و چەند سەربازێکیش برینداربوون، هەروەها فەرماندەیەکى پەکەکە گیانى لەدەستدا.

 

موراد قەرەیلان  فەرماندەی بڕیارگەی ناوەندی پاراستن (نەپەگە) لە پەیامێکدا ڕایگەیاند "ئەو هێرشەى تورکیا لە دژی سوپای عێراق ئەنجامدرا. سوپای عێراق داوای لە هەڤاڵانمان کرد، کە بۆ ماوەیەک لەگەڵیاندا بن، کاتێک لە ئۆتۆمبێلەکەدا بوون هێرشیان کرایە سەر. ئەو هێرشە لە ناوچەی ئێمەدا نەبوو، لەو شوێنەدا بوو کە ئەوان داوایان لە هەڤاڵانی ئێمە کردبوو بڕۆن بۆ ئەوێ".

 

وتیشى "ئەو ھێرشە راستەوخۆ لە دژی سوپای عێراق ئەنجامدرا. ئەو ئۆتۆمبێلانەى کە کرانە ئامانجی ئەو هێرشە ئۆتۆمبێلی فەرمیی سوپای عێراق بوون و ئاڵای ئەوانی لەسەر بوو. سەرباری ئەوانەش هێرشیان کردە سەری. ئەوەش نیشانی دەدات، کە هێرشەکە بە ئەنقەست لە دژی سوپای عێراق ئەنجامدراوە. هەڤاڵانی ئێمەش لەوێ بوون و بەو شێوەیە شەهید بوون".

 

هێرشەکە کاردانەوەى توندى عێراقى لێکەوتەوە و وەزارەتى دەرەوەى عێراق سەردانە چاوەڕوانکراوەکەى وەزیرى بەرگرى تورکیاى بۆ بەغدا هەڵوەشاندەوە بۆ پێش چەند کاتژمێرێک لە ئەنجامدانى، هەورەها باڵیۆزى تورکیاى بانگهێشتکرد.

 

هێرشەکە هاوکات بوو لەگەڵ چڕبوونەوەى شەڕى نێوان پەکەکە و تورکیا کە دوو مانگە بەردەوامە، دواى ئەوەى تورکیا لەناوەڕاستى حوزەیراندا ئۆپراسیۆنێکى بەرفراوانى لە سنورى هەرێم دژى پەکەکە دەستپێکرد.

 

لەبارەى پێکدادانەکانەوە قەرەیلان دەڵێت "ئیمە دەمانەوێت گەلەکەمان بە تایبەتی گەلی باشووری کوردستان، گەلی عەرەبی عێراق کە پشتیوانیمان لێ بکەن. ئێمە بە بڕیارین، کە ئەم دوژمنە تێکبشکێنین. ئێمە لە حەفتانین گێژمان کردووە. ئەگەر بێن بۆ زاپ دەیانکەین بە ژێر گڵەوە".

 

هەروەها وەڵامى بەرپرسانى هەرێم دەداتەوە و باس لەوەدەکات، بەڕێوەبەرانی بەڕێوەبەریی هەرێمی کوردستان زۆر جار دەڵێن پەکەکە و دەوڵەتى تورک شەڕی خۆی هێناوەتە باشووری کوردستان  "قسەى بەو شێوەیە راست نییە. تورکیا دەیەوێت خاکی باشووری کوردستان داگیر بکات. ئێمە شەڕمان نەهێناوە بۆ ئێرە ئەوان هێناویانە. هێرش دەکەن و زۆر شوێن داگیر دەکەن".

 

"با سوپای تورکیا لە خاکی عێراق، لە خاکی باشووری کوردستان بکشێتەوە و شەڕ نەکات، ئێمە ئامادەین کە لەسەر سنوور هیچ چالاکییەک نەکەین. بەڵام دەبێت ئەویش هێرش نەکات. ئەوەى لەلایەن ئێمەوە دەکرێت بەرخودانی نەتەوەییە"، قەرەیلان وایوتووە.