گه‌ڕان

Shadow Shadow
سیاسه‌تی

بەڕێوەبەرى ڕاگەياندنى مەرزى باشماخ: دەستێك لە ئێران هەيە قاچاخچێتى دەكات

2020.08.15 - 20:44
بەڕێوەبەرى ڕاگەياندنى مەرزى باشماخ:  دەستێك لە ئێران هەيە قاچاخچێتى دەكات

 

ناس کورد- 

بەڕێوەبەرى ڕاگەياندنى مەرزى باشماخ دەڵێت، لە هەموو شوێنێك قاچاخچێتى هەيە، بەڵام هەموو هەوڵێكیان خستووەتەگەڕ بۆ ڕێگەگرتن لێى، دەشڵێت، دەستێك لە ئێران هەيە كە ئەو كارە دەكات، سەرەڕاى ئەوەش سنورێكى دورودرێژ لەگەڵ ئێراندا هەيە و ئەوان بەپرسى تەنها 120 مەترن.

 

موختار حاجى عەلى، بەرێوەبەرى ڕاگەياندنى مەرزى باشماخ لە لێدوانێكى تايبەتدا سەبارەت بە كارى قاچاخچێتى لە مەرزەكەيانەوە بە "ناس كورد"ى وت، قاچاخچێتى لە هەموو جيهاندا دەكرێت و شتێك نييە بتوانرێت بنبڕ بكرێت و لە مەرزى باشماخيش دەكرێت، بەڵام بەو شێوەيە نييە كە پەرلەمانتاران باسى لێوە دەكەن.

 

ئاماژەى بەوەشدا: "لە باشماخ دامەزراوەيەكى تەواوى تێدايە و هەموو بەشێكى چاودێرى و كواڵێتى كۆنترۆڵى تێدايە، چاوێكمان كردوە بە سەد چاو و سەدان تۆن كاڵاى قاچاخ و خراپ بوو و بێكەڵ دەگرين و لەلايەن ليژنەى تايبەتەوە لەناو دەبرێن."

 

بەڕێوەبەرى ڕاگەياندنى مەرزى باشماخ ئەوەشى نەشاردەوە، ئەوان تەنها لە 120 مەتر بەرپرسن و سنورى هەرێمى كوردستان لەگەڵ ئێران سەدان كيلۆمەترە و بەدڵنياييەوە قاچاخچێتى دەكرێت و لە هەندێك ناوچە سنورى نێوان هەردوو وڵات تەنها يەك هەنگاوە و دێيتە ئەمديوو سنور.

 

هەرچى سەبارەت بەو لايەنەى كە قاچاخچێتى دەكات ئەوەى بە "ناس كورد" وت، دەستێك هەيە لە ئێرانەوە كە كەلوپەلى هەرزان كە لەوێ نرخى كەمە و لە هەرێم زياتر دەكات هەناردە دەكات، كێشەكە زياتر بارە "ترانزێتەكان"ن ئەو جۆرە بارانە لەو شوێنەوەى دەنێردرێت تا ئەو شوێنەى دەگات نابێت بكرێتەوە، بەڵام لە ئێران دەكرێنەوە و كاڵاى قاچاخيان تێدا دەشاردرێتەوە.

 

ئەوەشى ئاشكرا كرد: "چەندين جار لەگەڵ بەرپرسانى ئێرانيدا كۆبونەوەمان كردوە بۆ چارەسەركردنى ئەو بابەتە بەڵام تائێستا بێسود بووە، سەرەڕاى ئەوەش چەندين شۆفێر و بازرگان كە كارى قاچاخچێتيان كردوە دەستگير كراون و دراون بە دادگا."

 

موختار حاجى عەلى تەئكيديشى كردوەتەوە، هەزاران تۆن لەناوبراون و هەزارانيش ڕادەستى لايەنى پەيوەنديدار كراون، ئەو خۆڵەى دەهێنرێن بۆ كارگەگان كاڵاى پاچاخچێتيان تێدا دەشاردرێتەوە، ئەگەر زانياريمان لەسەر 10 بارهەڵگر هەبێت زانياريمان لەسەر 20 نابێت، بەڵام بە دڵنياييەوە ئەوەى لەدەستمان هاتووە كردومانە درێخيمان نەكردووە.