كاردانەوەی پارتی لەبارەی یاداشتی دەستگیركردن بۆ فوئاد حسێن لەلایەن دەستەی دەستپاکییەوە

ناس کورد- 

كادیرێكی دیاری پارتی دیموكراتی كوردستان ڕایدەگەیەنێت، یاداشتی دەستگیركردنی فوئاد حسێن، وەزیری پێشووی دارایی عێراق لەلایەن دەستەی دەستپاكی عێراقەوە بۆ ئامانجێكی سیاسییە و ئەو دەستەیەش خۆی پێویستی بەدەستپاكییە.

کەناڵی ناس کورد لە تێلیگرام جۆین بکە   

 

ڕێبین سەلام، كادیری پارتی دیموكراتی كوردستان بەماڵپەڕی (بغداد الیوم )ی ڕاگەیاندووە، یاداشتی دەستەی دەستپاکیی عێراق بۆ دەستگیركردنی فوئاد حسێن، وەزیری دەرەوەی ئێستا و وەزیری پێشووی دارایی عێراق بۆ  بەئامانجێكی سیاسییە.

 

ئاماژەی بەوەشكردووە، پارتی دیموكراتی كوردستان لاری نیە لەجێبەجێكردنی یاساكانی عێراق، بەڵام بەمەرجێك بەسەر هەموواندا بچەسپێنێت و حزب و لایەنێكی دیاریكراو بەمەبەستی سیاسی دەستوەردانی تێدا نەكەن.

 

باسی لەوەشكردووە، ئەو پرسەی كە لەدژی فوئاد حوسێن وروژێنراوە بەهیچ شێوەیەك یاسایی نیە، كاتەكەشی نیشانەی ئەوەیە ئامانجی سیاسیی لەپشتەوەیە و ئەوەش دەزانن دەستەی دەستپاكی پێویستی بەدەستپاكییە، چونكە حزب و لایەنە سیاسیەكان قۆرخیانكردووە.

 

پێشتر ئینعام خەزاعی، ئەندامی لیژنەی جێبەجێكردنی بەرنامەی حكومەت و پلانە ستراتیژیەكان لەپەرلەمان ئاشكرایكرد، لەسەر سكاڵای چەند پەرلەمانتارێك دەستەی دەستپاكی یاداشتێكی بەتۆمەتی بەهەدەردانی سەروەت و سامانی گشتی داوای دادگایی كردنی بەپێی مادەی 340 دەكات.