گه‌ڕان

Shadow Shadow
سیاسه‌تی

كۆرۆنا هەڕەشە لە کەمپی ئاوارەکان لەعێراق و هەرێم دەکات.. هۆشداری دەدرێت

2020.08.14 - 18:38
كۆرۆنا هەڕەشە لە کەمپی ئاوارەکان لەعێراق و هەرێم دەکات.. هۆشداری دەدرێت

 

ناس کورد- 

وەزارەتی كۆچ و كۆچبەرانی عێراق ڕایگەیاند، ئەمڕۆ هەینی 13 حاڵەتی توشبوون بەڤایرۆسی كۆرۆنا لەناو كەمپی ئاوارەكانی كبرتۆی یەك لەدهۆك تۆمار كراون و ڕێكخراوێكی مافەكانی مرۆڤیش هۆشداری ڕوودانی كارەساتی مرۆیی لەناو كەمپەكەدا دەكات.

 

ئەمڕۆ هەینی 14ی ئابی 2020، لەڕاگەیەنراوێكد ئەسكەندەر محمەد ئەمین، بەرپرسی نوسینگەی وەزارەتی كۆچ و كۆچبەران ڕایگەیاند، كەمپی كبرتۆی یەكی ئاوارەكان 13 حاڵەتی توشبوونی بەڤایرۆسی كۆرۆنای تێدا دەركەتووە و ڕەوانەی نەخۆشخانە تایبەتمەندەكانی دهۆك كراون.

 

ئاماژەی بەوەشكردووە، توشبووان لەئێستادا كەرەنتینە كراون و ئەوانەی بەرکەوتنیان لەگەڵیاندا هەبووە پشكینیان بۆ دەكرێت، سەرباری گرتنەبەری ڕێوشوێنی تەندروستی تر وەكو كەرەنتینەكردنی سەرجەم كەمپەكە.

 

ئەو بەرپرسەی سەر بەوەزارەتی كۆچ باسی لەوەش كردووە، بەبڕیاری وەزیری كۆچ و كۆچبەران ڕێوشوێنی بەپەلە بۆ قەدەغەكردنی چوون و دەرچوون لەكەمپەكە گیراوەتەبەر، ئەوەش بۆ سنوردانان لەبەردەم تەشەنەسەندنی زیاتر ڤایرۆسەكەدا و بۆ ئەو مەبەستەش هەماهەنگی لەگەڵ تەندروستیی دهۆكدا دەكەن.

 

لەكاردانەوەیەكیشدا لەسەر خراپی دۆخی تەندروستی لەكەمپی ئاوارەكان، كۆمسیۆنی مافەكانی مرۆڤ هۆشداری ڕوودانی كارەسات دەدات.

 

فازڵ غەڕاوی، ئەندامی كۆمسیۆنەكە لەلێدوانێكی دا بۆ میدیا عێراقییەکان ڕایگەیاندووە، هۆشداری ڕوودانی كارەساتی مرۆییانداوە لەئەگەری بڵاوبوونەوەی پەتاكە بەناو كەمپەكەدا و داواشیان كردووە بۆ سەرجەم دانیشتوانی كەمپەكە پشكنین بكرێت و هەروەها سەرجەم كەمپەكەش دەرمانرێژ بكرێت.