گه‌ڕان

Shadow Shadow
سیاسه‌تی

کۆمپانیایەکی کوالێتی کۆنتڕۆڵ: بەهۆی ڕێگریکردنمان لە هاوردەکردنی بەرهەمی ژەهراوی هێرشمانکرایەسەر

2020.08.14 - 17:25
کۆمپانیایەکی کوالێتی کۆنتڕۆڵ: بەهۆی ڕێگریکردنمان لە هاوردەکردنی بەرهەمی ژەهراوی هێرشمانکرایەسەر

ناس کورد-

کۆمپانیای لۆکس ئەیجنسی کە لە دەروازەی سنوری (پشتە)ی سەر بە ناحیەی بەمۆ کاری کوالیتی کۆنتڕۆڵ دەکات، ڕایگەیاند، بەهۆی ڕێگریکردنیان لە هاوردەکردنی کەرەستەی پلاستیکی کوالیتی خراپ و ژەهراوی هێرشیان کراوەتەسەر.

 

ئەمڕۆ هەینی 14ی ئابی 2020، کۆمپانیاکە لەڕاگەیەندراوێکدا ڕایگەیاند، سەرلەبەیانی ڕۆژی چوارشەممە 12ی ئاب، پێش دەستپێكی دەوامی فەرمی نوسینگەی كۆمپانیای لۆکس ئەیجنسی لە دەروازەی سنوری ( پشتە)  لەلایەن هەندێك لە بازرگانانی دیاری كەرەستەی پلاستیكی و شۆفێری بارهەڵگرەكانیانەوە هێرش کرایەسەر تاقیگەکانی ئەو نوسینگەیە و زیانێکی زۆریان بە کەرەستە و ئامێرەکان گەیاند.

 

ئاماژەی بەوەشكردووە، ڕووداوەکە لەدوای کاردانەوەی نارازیبوونیان لەئەنجامەكانی پشكنینی كەرەستەپلاستیكیە هاوردەكراوەكانیان كە ڕۆژی پێشتر (12) نمونەیان بەهۆی دەرنەچوونیان لە دەرئەنجامی تاقیگەیی ڕەتكراوەتەوە، بەم هۆیەوە زیانی گەورە بەر نوسینگەی کۆمپانیا کەوتووە و بۆتە هۆی ڕاگرتنی جوڵەی بازرگانی لەدەروازەكە.

 

لەڕاگەیەندراوەکەدا، محەمەد حەسەن، بەرێوەبەری ڕێپێدراوی کۆمپانیای لۆکس ئەیجنسی ڕایگەیاندووە: " هەر لەسەرەتای دەستپێكردنمان بە پشكنینی كەرەستەی پلاستیكی بۆمان دەركەوت کە لە هەندێ لە کەرەستە هاوردەکراوەکان بڕێكی زۆر مادەی ژەهراوی وەك (كانزا قورسەكان) بەكاردەهێنرێت لە بەرهەمهێنانی كەرەستە پلاستیكیەكاندا ئەمەیش لەبەر هەرزانی نرخی مادەپێكهینەرەكان بەبێ گوێدانە تەندروستی مرۆڤ و بەرژەوەندی گشتی" .

 

ئاماژەی بەوەشكردووە: " لە پێناو پاراستنی مافی بەكاربەر وەك ئەركێكی ئەخلاقی و نیشتمانی چەندین جار كۆبونەوەیان لەگەڵ بازرگانان ئەنجامداوە و لە مەترسی ئەو مادە ژەهراویانە ئاگاداریانكردوونەتەوە كە بە تێپەڕبوونی كات هۆكارن بۆ دروستبوونی خانە شێرپەنجەییەكان و نەخۆشیە مەترسیدارەكانی وەك لەكاركەوتنی گورچیلە و دواكەوتنی گەشەی مناڵ و چەندانی تر، وە لە دواین گۆڕانكاری لە ڕێنماییەكان و ستانداردی عێراقی ئاگاداریانكردوونەتەوە، لە پێناو پاراستنی سەرو گیانی هاووڵاتیان. "

 

بەرێوەبەری کۆمپانیاکە ئەوەشی خستووەتەڕوو: " لەبەرامبەردا هەندێك لە بازرگانان بەبێ گوێدان بەو مەترسیانە بەردەوام بوون لە هاوردەكردنی ئەو كاڵایانە و چەندین جار هەرەشەی ڕاگرتنی كارەكانی كۆمپانیاو ئاڵوگۆڕی بازرگانیان كردووە لە دەروازەكە."