گه‌ڕان

Shadow Shadow
سیاسه‌تی

نەتەوە یەکگرتووەکان داوا لەعێراق و تورکیا دەکات دانبەخۆیاندا بگرن

عێراق لەهەوڵی بەدەستهێنانی کۆدەنگی وڵاتانی عەرەبییە دژ بە دەستدرێژییەکانی تورکیا

2020.08.14 - 10:56
عێراق لەهەوڵی بەدەستهێنانی کۆدەنگی وڵاتانی عەرەبییە دژ بە دەستدرێژییەکانی تورکیا

ناس کورد-

وتەبێژی وەزارەتی دەرەوی عێراق ڕایگەیاند، بەمەبەستی پشتگیریکردنی عێراق و بەدەستهێنانی کۆدەنگی وڵاتانی عەرەبی دژ بە دەستدرێژییەکانی تورکیا و فشارکردن بۆ پاشەکشەکردنی هێزەکانی لەناو خاکی عێراق، وەزیری دەرەوە لە پەیوەندی بەردەوامدایە لەگەڵ وڵاتانی عەرەبیدا.

 

وەزارەتی دەرەوەی عێراق لە ڕاگەیاندراوێکدا لەسەر زاری وتەبێژەکەی ئەحمەد سەحاف، ئاماژەى بەوە کرد "وەزیری دەرەوەی عێراق پەیوەندی تەلەفۆنی لەگەڵ ژمارەیەک لە هاوتاکانی خۆی لە وڵاتانی عەرەبی ئەنجامدا و داوای لێکردن یەکهەڵوێستی بەرامبەر هێرشەکانی تورکیا بۆ سەر خاکی عێراق و هەرێمی کوردستان، بنوێنن".

 

 سەحاف وتیشی "فواد حوسێن، وەزیری دەرەوەی عێراق پەیوەندی تەلەفۆنی لەگەڵ ئەحمەد ئەبو غەیت، ئەمینداری گشتی کۆمکاری عەرەبی و ژمارەیەک هاوتاکانی خۆی لە وڵاتانی میسڕ، ئوردن، سعودیە و کوەیت ئەنجامداوە، تیایدا وردەکاری  بۆردومانەکانی ئەم دواییانەی تورکیاى لە ناوچەی سیدەکانی لە هەرێمی کوردستان پێڕاگەیاندن، کە بەهۆیەوە دوو ئەفسەر و سەربازێکی سوپای عێراق کوژرا".

 

ئاماژەی بەوەشکرد "لەو پەیوەندییە تەلەفۆنیانەدا فواد حسێن باسی لە گرنگی یەکڕیزی وڵاتانی عەرەبی لە بەرەنگاربونەوەی دەستدرێژییەکانی تورکیا بۆ سەر خاکی عێراق کردەوە، بەمەبەستی وەستاندنی لەشکرکێشییەکانی تورکیا بۆ سەر وڵاتەکەی".

 

سەحاف جەختیلەوەکردەوە "وڵاتە عەرەبییەکان پشتگیری خۆیان بۆ عێراق لەو پرسە دووپاتکردەوەتەوە وداویانکردووە بە زووترین کات تورکیا دەستدرێژییەکانیان بۆ سەر سەروەری خاکی عێراق ڕابگرێت".   

 

ئەمە لە کاتێکدایە ئەحمەد ئەبوغەیت، ئەمینداری گشتی کۆمکاری عەرەبی ڕۆژی (چوارشەممە)ى ڕابردوو بەتوندی سەرکۆنەی دەستدرێژییە بەردەوامەکانی تورکیای کرد بۆ سەر سەروەری خاکی عێراق، بەهۆی ئەو بۆردمانەی کە هێزەکانی تورکیا لە ناوچەی سیدەکانی سەر سنور ئەنجامیداوە.

 

 دانبەخۆداگرتن

لای خۆیەوە نێردراوی نەتەوە یەکگرتووەکان لە عێراق (یۆنامی) داوای لە عێراق و تورکیا کرد لەبری پەنابردن بۆ پێکدادانی سەربازی لەسەر سنوری نێوان هەردوو وڵات، دیالۆک و دانوستان بکەن بەڕێچکەی کۆتاییهێنان بە ئاڵۆزییەکانی ئەو ناوچەیە و چیدی زیانى مرۆیی و ماددی بەر هاووڵاتیانی سیڤیل نەکەوێت و ڕوونەدات".

 

هاوکات دوێنێ (پێنجشەممە) فەرەنسا لەسەر زاری ئانییس فۆن، وتەبێژی وەزارەتی دەرەوە بەتووندی ئیدانەی بۆردومانەکانی تورکیاى کرد بۆ سەرخاکی عێراق  و لەڕاگەیاندراوێکدا ئاماژەى بەوە کرد "هێرشە ئاسمانییەکانی تورکیا بۆ سەر خاکی عێراق پێشهاتێکی مەترسیدارە و داوا دەکەین ڕاستییەکان بەزووترین کات بخرێنە ڕوو".

 

پاشنیوەڕۆی ڕۆژی (سێشەمەمەی) ڕابردوو (11ی ئابى 2020)، فڕۆكه‌یه‌كی بێفڕۆکەوانی توركیا ئوتۆمبێلێكی هێزەکانی پاسه‌وانی سنوری عێراقى لە ناوچەی سیدەکان كردە ئامانج و بەهۆیەوە دوو ئه‌فسه‌ری هێزه‌كه‌ شه‌هیدب وون کەیەکێکیان فه‌رمانده‌ی لیوای دووی پاسه‌وانیی سنوربووە ئەوەی تریشیان فه‌رمانده‌ی فه‌وجی سێی لیوای دووی پاسه‌وانیی سنور بوو وچەند سەربازێکی دیکەش برینداربوون.

 

بەبیانووی بوونی بارەگاکانی پارتی کرێکارانی کوردستان(پەکەکە) لە ناوچە سنورییەکانی نێوان تورکیا وهەرێمی کوردستان، تورکیا لە ناوەڕاستی مانگی حوزەیرانی ڕابردوودا ئۆپڕاسیۆنی( چڕنووکی داڵ وچنگی پڵنگ)ی ڕاگەیاند بەجۆرێک دەستدرێژییەکانی ئەو وڵاتە تائێستا بەردەوامی هەیە و زیانێکی گەورەی لە موڵک و ماڵی هاووڵاتیانی ئەو ناوچانە داوە و دەیان هاووڵاتی سیڤیلیش لە هەرێمی کوردستان بوونەتە قوربانی.