گه‌ڕان

Shadow Shadow
سیاسه‌تی

’لەبری گوێگرتن دەسەڵات کەوتەوە بەکارهێنانی هێز و سەرکوتکردن’

فراکسیۆنى كۆمەڵ راگەیەندراوێکى لەبارەى هێرشکردنە سەر زانایانى ئاینى بڵاوکردەوە 

2020.08.12 - 19:59
فراکسیۆنى كۆمەڵ راگەیەندراوێکى لەبارەى هێرشکردنە سەر زانایانى ئاینى بڵاوکردەوە 

ناس کورد- 

فراکسیۆنی کۆمەڵى ئيسلامى لە پەرلەمانی کوردستان سەرکۆنەى هێرشكردنە سەر زانايانى ئاينى لە شارى هەولێر دەكات و جەختدەكاتەوە وەك هەميشە لەبرى گوێگرتن و ڕێزگرتن لە زانايان و داواكاريیەكانيان دەسەڵات هێزى بەكارهێنا بۆ سەركوتكردنيان.

 

فراکسیۆنی کۆمەڵى ئيسلامى لە ڕاگەيەنراوێكدا ئاماژەى بەوەداوە "ئەمڕۆ ژمارەیەک لە زانایانی ئاینی بۆ داواکردنی کردنەوەی دەرگای مزگەوتەکان لە شاری هەولێر گردبونەوە، بەڵام بەداخەوە وەک هەمیشە لەبری گوێگرتن و ڕێزلێگرتنی زانایان و داواکانیان، دەسەڵات کەوتەوە هەڵبژاردنی هەمان ڕێگا و شێوازی پێشوو کە بەکارهێنانی هێز و سەرکوتکردنە".

 

ئەوەش هاتوە، داوای زانایانی ئاینی بۆ کردنەوەی دەرگای مزگەوتەکان تەواو ڕەواو و لەجێی خۆیدایە بەپێی ڕێنماییەکانی تەندروستی، پشتگیری داواکارییەکەیان دەکەین و هەر جۆرە بێحورمەتییەک بە کەسایەتی ئەو توێژە، دەستدرێژییە بۆ سەر کۆی پیرۆزییەکانی کۆمەڵگە، هێزە ئەمنییەکانی هەولێر لەو گردبوونەوەیەدا پەلاماری مامۆستا عوسمان کانی کوردەیی پەرلەمانتاری فراکسیۆنی کۆمەڵیان داوە.

 

ڕونيشكراوەتەوە، دیارە مامۆستا عوسمان جگە لەوەی پەرلەمانتارە و پارێزبەندی هەیە، مامۆستایەکی ئاینیشە بۆ هیچ کەس نیە زیان لە کەسایەتی جەستەیی و مەعنەوی بدات و پێویستە هەرچی زووە وەزارەتی ناوخۆ و پارێزگاری هەولێر ئەو کەسانە دەستگیر بکەن کە پەلاماری ئەو پەرلەمانتارەیان داوە.

 

فراكسيۆنى كۆمەڵ جەختى كردوەتەوە، هەر لەو گردبونەوەیەدا هێزە ئەمنییەکان پەلاماری تیمی ڕۆژنامەوانیی کەناڵی ئاسمانیی پەیامیان داوە و دەستیان بەسەر کەلوپەلەکانیاندا گرتووە کە ئەوەش دەستدرێژی و پێشێلکارییەکی دیکەیە.

 

لەكۆتايى ڕاگەيەنراوەكەدا باس لەوەشكراوە، ئەوانەی بۆ سەرکوتی کۆمەڵگە ئازان لەبەرامبەر دەستدرێژی و داگیرکاری بێگانە بێدەسەڵاتن و بوێرى دەرکردنی بەیاننامەیەکیشسان نیە، مێژووش سەلماندویەتی ئەوانەی ڕوو بە ستەمکاران و پشت لە میللەتەکەی خۆیانن چارەنوسێکی خراپ چاوەڕێیان دەکات.