گه‌ڕان

Shadow Shadow
سیاسه‌تی

لەگەڵ هەرێم گفتوگۆ دەکەین

عێراق: وەزیری بەرگریی تورکیا بۆ بابەتی پەکەکە دەهاتە بەغدا

2020.08.12 - 14:41
عێراق: وەزیری بەرگریی تورکیا بۆ بابەتی پەکەکە دەهاتە بەغدا

ناس کورد-

وتەبێژی فەرماندەیی ئۆپراسیۆنە هاوبەشەکانی عێراق ڕایگەیاند، دەستدرێژییەکەی تورکیا بۆسەر هێزە عێراقییەکان بە کارێکی دوژمنکارانە دەزانن و جەخت دەکاتەوە کە توانایان هەیە ڕوبەڕووی هەر هەڕەشەیەک ببنەوە کە توشی عێراق دەبێتەوە.  

 

ئەمڕۆ چوارشەممە، 12ی ئابی 2020، تەحسین خەفاجی، وتەبێژی فەرماندەییەکە بە ئاژانسی هەواڵیی عێراقییەی وتووە، "لەگەڵ بەرپرسانی هەرێم گفتوگۆ دەکەین تاوەکو هۆکاری دەستدرێژییەکەى تورکیا بۆسەر هێزی پاسەوانی سنوریی عێراق بزانین."

 

دەشڵێت، کێشە و ناکۆکی هەیە لەنێوان پارتی کرێکارانی کوردستان (پەکەکە) و حکومەتى تورکیا، بەڵام نابێت خاکی عێراقی بۆ یەکلاکردنەوەى ناکۆکییەکان بەکاربهێنرێت.

 

خەفاجی جەختیکردەوە کە سەردانە هەڵوەشاوەکەى خوڵوسی ئاکار، وەزیری بەرگریی عێراق کەبڕیار بوو ئەمڕۆ لە بەغدا بێت بۆ بابەتی بوونی پەکەکە بوو لە خاکی عێراق.

 

درەنگانێکی شەوی ڕابردوو حکومەتى عێراق بڕیاری دا بە هەڵوەشاندنەوەى سەردانی بڕیارلێدراوی ئەمڕۆی وەزیری بەرگریی تورکیا بۆ بەغدا وەک ناڕەزایەتییەک بەرانبەر کوژرانی چەند ئەفسەرێکی پاسەوانیی سنوری عێراق لەلایەن فڕۆکە بێفڕۆکەوانەکانی تورکیا لە ناوچەى سیدەکان.  

  

وەزارەتی دەرەوەى عێراق ڕاگەیەنراوێکی بڵاوکردەوە و دەڵێت، جگە لە هەڵوەشاندنەوەى سەردانەکەى وەزیریی بەرگریی تورکیا، "ئەمڕۆ باڵیۆزی تورکیاش بانگهێشت دەکرێت و یاداشتنامەیەکی توندی ناڕەزایەتی پێ دەدرێت و جەخت لە ڕەتکردنەوەى عێراق دەکاتەوە لەو دەستدرێژییانەى تورکیا دەیکاتە سەر وڵات."  

  

ڕاگەیەنراوەکە دەشڵێت، "عێراق بە توندی دەستدرێژی ئاشکرای تورکیا لەڕێگەی بۆردومانی خاکی عێراق لە ناوچەى سیدەکان ڕەتدەکاتەوە کە بووەهۆی شەهیدبوونی چەند ئەفسەر و سەربازێکی هێزە چەکدارەکانمان."  

  

دەشڵێت، "عێراق ئەو کارە بە شکاندنی سەروەری و پیرۆزییەکانی وڵات دەزانێت و کارەکەش پێچەوانەى یاسا نێودەوڵەتییەکان و پەیوەندیەکانی هەردوولایە."  

  

جەختیش دەکاتەوە کە "دووبارەبوونەوەى ئەو کارانە و نەبوونی وەڵام بۆ داواکارییەکانی عێراق بۆ وەستانی ئەو دەستدرێژییانە و کشانەوەى هێزەکانی لە سنورەکان، وامان لێدەکات چاوبخشێنینەوە بە قەربارەى هەماهەنگییەکانی نێوان هەردوو وڵات لە سەرجەم ئاستەکاندا."  

  

هەروەها سورە لەسەر ئەوەى "خاکەکەى وەک بارەگا و ڕێڕەو بەکارنەهێنرێت بۆ زیانگەیاندن بە هیچ وڵاتێکی دراوسێ و ڕەتیشیدەکاتەوە خاکەکەى وەک گۆڕەپانێک بەکاربهێنرێت بۆ یەکلاییکردنەوەى ناکۆکییە دەرەکییەکان."