گه‌ڕان

Shadow Shadow
سیاسه‌تی

’’خوێنی عێراقییەکان گرانە’’

ڕاوێژکاری کازمی: دەستدرێژییەکەى تورکیا بێ وەڵام نابێت با بیانووکەش هەرچییەک بێت

2020.08.11 - 23:56
ڕاوێژکاری کازمی: دەستدرێژییەکەى تورکیا بێ وەڵام نابێت با بیانووکەش هەرچییەک بێت

ناس کورد-

هيشام داود، ڕاوێژكارى سەرۆكوەزيرانى عێراق ئاشكرايكرد، لە چەند كاتژمێرى داهاتوودا حكومەتى عێراقى هەڵوێستى فەرمی لەسەر "دەستدرێژییەکانی توركيا" دەبێت.

 

ئەمڕۆ سێشەممە، 11ی ئابی 2020، فڕۆکەى بێفڕۆکەوانی تورکیا بۆردومانی هێزێکی پاسەوانی سنوری سەر بە سوپای عێراق کرد و بەهۆیەوە چەند پلەدارێکی هێزەکە کوژران کە کورد بوون، هيشام داود لە دیمانەیەکی تەلەفزیۆنیدا وتی، "ئێمە لە بەردەم دەستدرێژی ئاشكراى توركياداين بۆ سەر سەروەرى خاكى عێراق، جا بيانوەكان هەرچيەك بن."

 

وتيشى، لە چەند كاتژمێرى داهاتوودا حكومەت هەڵوێستى فەرمى دەبێت لەو بارەيەوە و عێراق تەنها بە ڕەتکردنەوە ناوەستێت.

 

جەختیشیکردەوە کە "بژاردەكان لەبەردەم حكومەت وەرگرتنى هەڵوێستی سەرەتایی و ئيدانەكردنە، ئەگەر سەردان هەبێت لە داهاتودا هەڵدەپەسێردرێن، دواتر پەتا دەبەينە بەر ڕێكخراوە نێودەوڵەتيەكان بۆ وەرگرتنى هەڵوێست، بەڵام ئێستا چاوەڕێى هەڵوێستى فەرمى حكومەتى عێراقى دەكەين."

 

هاوکات یەحیا ڕەسوڵ، وتەبێژی مستەفا کازمی، فەرماندەى گشتیی هێزە چەکدارەکانی عێراق ئیدانەى بۆردومانەکەى تورکیا کرد و ڕایگەیاند، "خوێنی چەکدارە عێراقییەکان گرانە و ڕێگەنادەین بە فیڕۆ بچێت."

 

یەحیا ڕەسوڵ لە ڕاگەیەنراوێکدا دەڵێت، "ئەو چەکدارانە لە ئۆپراسیۆنێکی پشکنیندا بوون لە ناوچەى سیدەکان کە دەکەوێت ناو خاکی عێراق و چوار کیلۆمەتر لە هێڵی سنوری لەگەڵ تورکیا دورە."

 

ئاماژەى بەوەشکردووە، "پێویستە تورکیا ڕونکردنەوە بدات لەسەر ئەو تاوانە و لێپێچینەوە لە بکەران بکات، پێشتر چەندیند جار هۆشداریمان داوە بە تورکیا لە بەردەوامبوونی بەزاندنی خاکی عێراق."