گه‌ڕان

Shadow Shadow
سیاسه‌تی

یەکەم لێدوانی پەکەکە لەسەر بۆردومانەکەی تورکیا لە برادۆست

2020.08.11 - 20:42
یەکەم لێدوانی پەکەکە لەسەر بۆردومانەکەی تورکیا لە برادۆست

ناس کورد-

پارتی كرێكارانی كوردستان (په‌كه‌كه‌) لەسەر بۆردومانەکەی تورکیا لەسنوری برادۆست هاتەدەنگ و رەتیدەکاتەوە، ھیچ ئەندامێكیان لەگەڵ ئەو كاروانەی ھێزەكانی پاسەوانی سنوریی عێراق بوبێت کە کرانە ئامانج.

 

ئەمڕۆ سێشەممە 11ی ئابی 2020، كاوە شێخ مووس، بەرپرسی پەیوەندییەكانی پارتی كرێكارانی كوردستان بە ماڵپەڕی (بغداد الیوم)ی عێراقی ڕاگەیاند: "فڕۆكەیەكی بێفڕۆكەوانی توركیان كاروانێكی سەربازیی  هێزەکانی پاسەوانی سنوریی عێراقی كردە ئامانج، كە فەرماندەی لیوای سێ فەرماندەیی سنووری تێدابوو لەگەڵ ژمارەیەك سەركردە و ئەفسەری دیكە."

 

ئاماژەی بەوەشكردووە: "ھیچ ئەندامێكی سەر بە پارتی كرێكارانی كوردستان لەگەڵ ئەو کاروانەدا نەبووە."

 

لەدوای بۆردومانەکە شانەی ڕاگەیاندنی ئەمنیی عێراق تورکیای تۆمەتبارکرد و ڕایگەیاند، تورکیا لە ڕێگەی فڕۆکەی بێفڕۆکەوانەوە "دەستدرێژیی کردووە و ئۆتۆمبێلێکی سەربازی سەر بە هێزەکانی پاسەوانی سنوری لە ناوچەى سیدەکان" کردووەتە ئامانج.  

 

بەگوێرەی ئامارەکان، پێنج کەس لە ئەندامانی پاسەوانی سنوریی عێراق شەهید بوون کە سەرجەمیان کوردن و لەنێویاندا دوو فەرماندە هەیە.