گه‌ڕان

Shadow Shadow
سیاسه‌تی

هەڵوێستی وەزارەتی پێشمەرگە لەسەر ڕووداوەکە

ئەو هێزەى فڕۆکەکانی تورکیا لە سیدەکان بۆردومانیکردن پێشمەرگەی تێدابوو؟

2020.08.11 - 19:04
ئەو هێزەى فڕۆکەکانی تورکیا لە سیدەکان بۆردومانیکردن پێشمەرگەی تێدابوو؟

ناس کورد-

لەدوای بۆردومانەکەی تورکیا بۆسەر هێزێکی پاسەوانی سنوریی عێراق، سەرچاوەیەکی ئاگادار بۆ ناس کورد باس لە بوونی هێزێکی یەکەکانی 80ی سەربە وەزارەتی پێشمەرگەش لەوێ دەکات بەڵام وەزارت بوونی هێزەکانیان لەوێ ڕەت دەکاتەوە. 

پاشنیوەڕۆی ئەمڕۆ سێشەممە، لەسنوری چیای برادۆست هێزێکی پاسەوانی سنوریی عێراق کە کوردن لەلایەن تورکیاوە بۆردمانکران و لەئەنجامدا پێنج کەسیان شەهید بوون کە دووانیان فەرماندەن.

 

سەرچاوەیەكی ئاگادار کە نەیویست ناوی ئاشکرا بکرێت تایبەت بە ناس كوردی وت، " ئەمڕۆ هێزێكی تێكەڵاو لە پاسەوانی سنوری عێراقی و هێزێکی یەکەی 80ی سەر بە وەزارەتی پێشمەگەی هەرێم بەرەو بەرزاییەكانی كێلە شێنێ لە سیدەکان چوون بۆ ئەوەی هەندێك ناوچە كۆنتڕۆڵ بكەن."

 

ئاماژەی بەوەشكرد: "لە ئەنجامی چوونە پێشەوەی ئەو هێزەش كە دەبوو دانوستانی لەسەر بكرێت، مشتومڕ لەنێوان ئەوان و هێزەكانی پەكەكەدا دروست بووە و ئەوانیش ووتبویان قبوڵناكەین بێنە پێشەوە".

 

ئەو سەرچاوەیە باسی لەوەشكرد: "لەوكاتەدا فڕۆكەكانی توركیا بۆردمانی هێزەكانی 80 و پاسەوانی سنووریان كردووە."

 

هاوکات ئیحسان چەلەبی، بەڕێوەبەری ناحیەی سیدەکان بە ناس کوردی وت: "چەند ڕۆژێکە ئەو هێزە لەو ناوچەیەن و جموجوڵیان هەیە و دێن و دەچن، بەمەبەستی دانانی بازگە و جێگیکردنی هێزەکانیان."

 

لە بەرامبەردا، جەبار یاوەر، ئەمینداری وەزارەتی پێشمەرگە ئەو قسانەى ڕەتکردەوە و بە ناس کوردی وت: "هیچ هێزێکی سەر بە وەزارەتی پێشمەرگە لەوناوچەیە نییە و نەبوون."

 

ئاماژەی بەوەشكرد: "ئەو هێزەی بۆردومانکراوە پاسەوانی سنورن و سەربە وەزارەتی ناوخۆی عێراقن و لەسنوری هەولێرن، هیچ پەیوەندییەکیان بە وەزارەتی پێشمەرگەوە نییە."

 

هاوکات تۆڕی ڕاگەیاندنی جەنگی سەر بە سوپای عێراق ڕایگەیاند، تورکیا لە ڕێگەی فڕۆکە بێفڕۆکەوانەوە "دەستدرێژیی کردووە و ئۆتۆمبێلێکی سەربازی سەر بە هێزەکانی پاسەوانی سنوری لە ناوچەى سیدەکان" کردووەتە ئامانج.   

  

تۆڕەکە لە ڕاگەیەنراوێکدا دەڵێت، لە بۆردومانەکەدا، محەمەد ڕەشید، فه‌رمانده‌ی لیوای 2ی پاسەوانی سنوور و فه‌رمانده‌ی فه‌وجی سێی پاسه‌وانی سنور، عه‌مید زوبێر حالی له‌ ئاكامی بۆردومانێكی توركیا شه‌هیدبوون".