گه‌ڕان

Shadow Shadow
سیاسه‌تی

تەندروستى عێراق: هێشتا زووە بۆ هەڵسەنگاندنى ئامارەکانى کۆرۆنا لەرۆژانى جەژندا

2020.08.04 - 11:04
تەندروستى عێراق: هێشتا زووە بۆ هەڵسەنگاندنى ئامارەکانى کۆرۆنا لەرۆژانى جەژندا

ناس كورد-

وەزارەتى تەندروستى عێراق ڕایگەیاند، هێشتا زووە بۆ هەڵسەنگاندنى ئامارەکانى کۆرۆنا لە رۆژانى جەژندا، جەختیشدەکاتەوە کە کێشەى کەمى ئۆکسجین لە دامەزراوە تەندروستییەکاندا نییە.

 

سەیف بەدر، وتەبێژى وەزارەتى تەندروستى عێراق بەمیدیاى فەرمى عێراقى ڕاگەیاندووە "هێشتا زووە هەڵسەنگاندن بۆ دۆخەکە بکرێت لە رۆژانى جەژندا، لەبەرئەوەى ماوەى مانەوەى ڤایرۆسەکە دوو رۆژ بۆ دوو هەفتە دەخایەنێت".

 

وتیشى "هەڵسەنگاندنى دۆخەکە بەوەى ئەرێنى بووە یان نەرێنى، پێویستى بەماوەیەکى درێژتر هەیە".

 

سەیف بەدر، ئاماژەى بەوە کردووە، پابەند نەبوونى خەڵک بە رێوشوێنە تەندروستی و خۆپارێزییەکان، بەتایبەتى لەگەڕەکە میلییەکان بووەتە هۆى بەرزبوونەوەى ژمارەى توشبووان و گیانلەدەستدان بە کۆرۆنا.

 

باسى لەوەشکرد، وەزارەتى تەندروستى تواناى هەیە مامەڵە لەگەڵ ئامارى توشبووان بکات و رێژەى چاکبوونەوەش زۆر بەرزە و گەیشتووەتە 72%.

 

سەبارەت بە چارەسەرەکان، وتەبێژى وەزارەتى تەندروستى عێراق دەڵێت، بەردوەوام پرۆتۆکۆڵى چارەسەر نوێدەکرێتەوە و توێژینەوەکان لەو بارەیەوە بەردەوامن.

 

جەختیشیکردەوە، کێشەى نەبوونى ئۆکسجین لە نەخۆشخانە و دامەزراوە تەندروستییەکان بوونى نییە. 

 

بەگوێرەى ئامارەکانى وەزارەتى تەندروستى عێراق، تا ئێستا 131886 توشبووى کۆرۆنا تۆمارکراوە، کە 94111 توشبوویان چاکبوونەتەوە، 4934 توشبووش گیانیان لەدەستداوە.