گه‌ڕان

Shadow Shadow
سیاسه‌تی

مستەفا کازمى پێشوازى لەو منداڵە کرد کە لەلایەن هێزەکانى پاراستنى یاساوە ئەشکەنجەدرا [وێنە]

2020.08.03 - 12:33
مستەفا کازمى پێشوازى لەو منداڵە کرد کە لەلایەن هێزەکانى پاراستنى یاساوە ئەشکەنجەدرا [وێنە]

ناس کورد-

مستەفا کازمى، سەرۆکوەزیرانى عێراق پێشوازى لەو منداڵە عێراقییە کرد کە لەلایەن هێزەکانى پاراستنى یاساوە ئەشکەنجەدرا و گرتەى ڤیدیۆیى ئەشکەنجەدانەکەى لە تۆڕە کۆمەڵایەتییەکان بڵاوکرایەوە و کاردانەوەى زۆرى لێکەوتەوە.

 

نوسینگەى رۆژنامەوانى مستەفا کازمى سەرۆکوەزیرانى عێراق رایگەیاند "سەرۆکوەزیرانى عێراق لە نوسینگەى تایبەتى خۆى پێشوازى لە حەدەس حامد سەعید کردووە کە رووبەڕووى دەستدرێژییەکى نائەخلاقى و نایاسایى بوەوە و بەهۆی ئەو رووداوەوە کازمى وەک فەرماندەى گشتى هێزە چەکدارەکانى عێراق لیژنەیەکى لێکۆڵینەوەى پێکهێنا و ئەو کەسانە دەستنیشان کرا کە بەو پێشێلکارییە هەستاوون و کۆتایى بە ڕاژەکانیان هێنرا و رووبەڕووى دادگا کرانەوە".

 

دوێنێ (یەکشەممە) میدیاکانی عێراق گرتەیەکی ڤیدیۆییان بڵاوکردەوە کە تیایدا دەردەکەوێت هێزە ئەمنییەکان بەدڕندەترین شێوە سوکایەتی بە منداڵێک دەکەن و بەزۆر ناچاری دەکەن قسەی نەشیاو بەرامبەر بە دایکی بکات.

  

بەپێی تۆمارە ڤیدیۆییەکە، منداڵەکە هەمو جلەکانی لەبەردا داکەنراوە و لەلایەن ژمارەیەک چەکداری هێزی ئەمنییەوە سوکایەتی پێدەکرێت و لە هەمانکاتدا گرتەی ڤیدیۆیی تۆمار دەکەن.  

  

هاوکات وەزارەتی ناوخۆی عێراق دوێنێ (یەکشەممە، 2ی ئاب)  لە ڕاگەیەندراوێکدا بڵاویکردەوە، ئەو منداڵە بەپێی ماددەی 446 لەلایەن بەڕێوەبەرایەتی بەرەنگاربونەوەی تاوان لە بەغدا، لە (15ى ئایاری2020) بەتاوانی دزینی ماتۆڕسکیلێک ڕاگیراوە، ڕووداوەکەش 20 ڕۆژ پێش دەستگیرکردنی ڕوویداوە.  

  

ئاماژەی بەوەشکردوە، وتە لە کەسوکاری ئەو منداڵە وەرگیراوە و داوایان لەسەر ئەو کەسانە تۆمارکردوە کە ئەو کارەیان بەرامبەر بە منداڵەکەیان ئەنجامداوە.  

  

 وەزارەتی ناوخۆی عێراق رونیکردەوە "بەهۆی کەمتەرخەمییەوە، مستەفا کازمی، فەرماندەی گشتی هێزە چەکدارەکانی عێراق بڕیاریدا فەرماندەی هێزەکانی پاراستنی یاسا بگوازرێتەوە بۆ ئیمرە و چاو بە هێزەکانی پاراستنی یاسا بخشێندرێتەوە".