گه‌ڕان

Shadow Shadow
سیاسه‌تی

گەشتکردن بۆ ئێران قەدەغەیە

فڕۆکەخانەى سلێمانى زیانى ڕاگرتنى گەشتەکان ئاشکرادەکات

2020.08.01 - 12:23
فڕۆکەخانەى سلێمانى زیانى ڕاگرتنى گەشتەکان ئاشکرادەکات

ناس کورد-

 

بەڕێوەبەرى فڕۆکەخانەى نێودەوڵەتى سلێمانى ڕایگەیاند، داهاتى فڕۆکەخانەکە لەنێوان 40-50% دابەزیوە بەهۆى راگرتنى گەشتەکانەوە، ئاشکراشیکرد دەستپێکردنەوەى گەشتەکانى فڕۆکەخانەکانى هەرێم و عێراق، گەشت لەگەڵ ئێران ناگرێتەوە.

 

 

دواى نزیکەى پێنج مانگ، ئەمڕۆ شەممە گەشتە ئاسمانییەکان لە فڕۆکەخانەکانى هەرێمى کوردستان دەستیپێکردەوە، بەچەندین مەرج و رێنماییە نوێی تەندروستییەوە.

 

بەپێی خشتەى گەشتەکان، کاتژمێر 18:10 خولەکى ئەمشەو یەکەم گەشت لە ئەنقەرەوە بۆ فڕۆکەخانەى نێودەوڵەتى هەولێر ئەنجامدەدرێت، هەروەها  ئەمشەو کاتژمێر 23:15 خولەک یەکەم گەشت لە ئەستەنبوڵەوە بۆ سلێمانى ئەنجام دەدرێت.

 

تاهیر عەبدوڵا بەڕێوەبەرى فڕۆکەخانەى نێودەوڵەتى سلێمانى لە کۆنفرانسێکى رۆژنامەنوسیدا ڕایگەیاند "سەرەڕاى دەستپێکردنەوەى گەشتەکان، ماوەیەکى دەوێت تا بارودۆخى فڕۆکەخانەکان بگەڕێتەوە بارى ئاسایی خۆى تا وردە وردە پەتاى کۆرۆنا دەڕەوێتەوە".

 

وتیشى "ئەوەى بە ئێمە ڕاگەیەنراوە لەبارەى ئەو وڵاتانەى دەستپێکردنەوەى گەشتەکان نایانگرێتەوە تەنها ئێرانە، کە هاتنى هاوڵاتیانى بۆ فرۆکەخانەکانى هەرێم و عێراق قەدەغەکراوە".

 

تاهیر عەبدوڵا باسى لەوەشکرد، جگە لە تورکیا هیچ وڵاتێک ئامادە نییە ڤیزەى گەشتیارى بدات بە گەشتیاران و گەشتى گەشتیارى تەنها بۆ تورکیا رێگەپێدراوە.

 

قەدەغەى گەشتى ئاسمانى کە لە ناوەڕاستى ئازارەوە خرایە بوارى جێبەجێکردنەوە، زیانێکى زۆرى بە فڕۆکەخانەکانى هەرێم و عێراق گەیاندووە، بەڵام هێشتا قەبارەى زیانەکان ڕانەگەیەنراوە.

 

تاهیر عەبدوڵا وتى "داهاتى فڕۆکەخانە لەو ماوەیەدا وەستاوە، دەتوانین بڵێین لەنێوان 40-50% دابەزیوە بەراورد بەساڵى 2017، چونکە ئێمە لە دوو ساڵى ڕابردوودا و دواى ریفراندۆم روبەڕووى قەیرانێکى دیکە بووینەوە". 

 

رونیشیکردەوە "فڕۆکەخانە داهاتى نیشتنەوەى فڕۆکە، فرۆشتنى بەنزین، خزمەتگوزاریی و کافتریا و چەندین جۆر داهاتى دیکەى هەیە، بەڵام لەم ماوەیەدا خەرجییەکان کە لەسەر حکومەتە  بەردەوام بووە و 24 کاتژمێر دەوام کراوە".

 

بەرێوەبەرى فڕۆکەخانەى نێودەوڵەتى سلێمانى ئاشکرایکرد، لیژنەیەکى تایبەت دروستکراوە بۆ خەمڵاندنى زیانەکان و دواى تەوابوونى کارەکان ئەنجامەکەى ڕادەگەیەنن.

 

دەستپێکردنەوەى گەشتەکان لە فڕۆکەخانەکانى هەرێمى کوردستان بەپێی چەندین مەرج و رێنمایی تەندروستییە کە پێویستە گەشتیاران پەیڕەویان بکەن بۆ ئەوەى رێگەیان پێبدرێت لە فڕۆکەخانەکەوە گەشت بکەن.

 

بەپێی رێنماییەکان، گەشتیاران پێویستە چوار کاتژمێر پێش وادەى  گەشتەکان بچنە فڕۆکەخانە، سەرجەم ئەوانەى دەچنە فڕۆکەخانەکان دەمامک بپۆشن، پێش 48 کاتژمێر گەشتیاران پشکنینى تەندروستى پی.سی.ئاڕ بکەن.

 

هەر بەپێی رێنماییەکان، پێویستە سەرجەم گەشتیارە ھاتووەکان بەڵێننامەیەک پڕبکەنەوە کە بۆ ماوەی 14 رۆژ خۆیان کەرەنتین بکەن، لە دوای گەیشتنیان بۆ ھەرێمی کوردستان. ھەریەک لە شاندی فەرمی، خاوەنکار و ئەو گەشتیارانەی بۆ ماوەیەکی کورت دێنە کوردستان، (خۆ کەرەنتینکردن بۆ ماوەی 14 رۆژ) نایانگرێتەوە.