گه‌ڕان

Shadow Shadow
سیاسه‌تی

یەکێتی: 200 بتڵ ئۆکسجینمان بۆ نەخۆشخانەی ڕزگاریی هەولێر ئامادەکرد بەڵام ڕەتیانکردەوە

2020.07.30 - 20:28
یەکێتی: 200 بتڵ ئۆکسجینمان بۆ نەخۆشخانەی ڕزگاریی هەولێر ئامادەکرد بەڵام ڕەتیانکردەوە

ناس کورد-

لەدوای دروستبوونی کێشەی ئۆکسجین بۆن توشبووانی کۆرۆنا لەشاری هەولێر، مەڵبەندی 3ی هەولێری یەکێتی ڕایگەیاند، بڕیاریانداوە 200 بتڵی ئۆکسجین بۆ نەخۆشخانەی ڕزگاریی هەولێر دابین بکەن، بەڵام نەخۆشخانەکە هاوکارییەکەیان قبوڵ نەکردووە.

 

لە ڕونکردنەوەیەکدا مەڵبەندی 3ی هەولێری یەکێتی ڕایگەیاند: " له‌كاتی ئاگاداربوونمان له‌ هه‌بوونی كێشه‌ی ئۆكسجین له‌ نه‌خۆشانه‌ی ڕزگاری له‌شاری هه‌ولێر، وه‌ك ئه‌ركی سه‌رشانمان له‌  مه‌ڵبه‌ندی 3ی هه‌ولێری (ی.ن.ك) به‌رامبه‌ر به‌وشاره‌ و نه‌خۆشه‌كانی، ئاماده‌یی خۆمان پیشاندا بۆ گه‌یاندنی 200 بوتڵی ئۆكسجین به‌شێوه‌ی بوتڵ یان به‌شێوه‌ی ئۆكسجینی شل بۆ نه‌خۆشخانه‌ی ڕزگاری و ته‌ندروستی هه‌ولێر."

 

ئاماژەی بەوەشکردووە: " به‌داخه‌وه‌ دواتر وه‌ڵامی په‌یوه‌ندیه‌كانیان نه‌دایه‌وه‌ و ئاماده‌نه‌بوون هاوكاریه‌كه‌ وه‌ربگرن."

 

مەڵبەندی 3ی یەکێتی لە هەولێر ئەوەشی خستووەتەڕوو: " ئه‌گه‌ر ئێوه‌ ده‌توانن كێشه‌كه‌ و كه‌موكۆڕیه‌كان چاره‌بكه‌ن ە نه‌خۆش له‌بێ ئۆكسجینی نه‌مرێت، ئێمه‌ ده‌ستخۆشیتان لێ ده‌كه‌ین و زۆر سوپاستان ده‌كه‌ین، ئه‌گه‌ر نا ئێمه‌ به‌شێكین له‌و شاره‌ و به‌ئه‌ركی خۆمانی ده‌زانین هاوكاری خه‌ڵك و هاوشاریانی خۆمان بكه‌ین، ئه‌وه‌ كه‌مترین خزمه‌ته‌ كه‌ئێمه‌ پێشكه‌شی نه‌خۆشان و دانیشتوانی هه‌ولێری بكه‌ین .

 

ئەوە لەکاتێکدایە، ئەمڕۆ پێنجشەممە 30ی تەموزی 2020، لەنەخۆشخانەی ڕزگاری هەولێر کە تایبەتە بە چارەسەرکردنی توشبووانی کۆرۆنا، کێشەی کەمی ئۆکسجین دروستبوو، ئەوەش گرفتی گەورەی بۆ نەخۆشان دروستکرد و کاردانەوەی زۆری لێکەوتەوە.

 

مەڵبەندەکەی یەکێتی نیگه‌رانی خۆی له‌وه‌ی ڕوویداوه‌ ڕاگەیاندووە و ئاماژەی بەوەشکردووە: " هیوادارین ده‌ستی هاوكاری له‌هه‌موو لایه‌ك قبوڵبكرێت و هه‌مووان خزمه‌تی ئه‌و شاره‌ بكه‌ین."