گه‌ڕان

Shadow Shadow
سیاسه‌تی

سەرۆکى پەرلەمان وەڵامیدەداتەوە

وەزیرى دارایی هەرێم ڕەخنەى توند لە پەرلەمانتاران دەگرێت

2020.07.28 - 15:14
وەزیرى دارایی هەرێم ڕەخنەى توند لە پەرلەمانتاران دەگرێت

ناس کورد-

وەزیرى دارایی و ئابورى حکومەتى هەرێمى کوردستان ڕایگەیاند، پەرلەمانتاران پرسیارى زۆریان ئاڕاستە دەکەن و وەک کەسانێک قسە دەکەن کە ئاگادارى دۆخى دارایی نین، سەرۆکى پەرلەمانیش دەڵێت پەرلەمانتاران لە ئاگاییەوە پرسیار دەکەن.

 

ئاوات جەناب، وەزیرى دارایی لەکۆبوونەوەى ئەمڕۆى پەرلەمانى کوردستاندا بە پەرلەمانتارانى ڕاگەیاند، پەرلەمانتاران کاتێک قسە دەکەن وەک کەسێک قسە دەکەن کە هیچ ئاگادارى دۆخى دارایی هەرێم نەبن "وەک ئەوە وایە تەنها ئەم دوو مانگە دواکەوتنى موچەیان بینیبێت و ئەم لەسەدا 21 یەکە یەکەمجارە و لەکوردا نەبووە".

 

وتیشى "لەساڵى 2014ەوە ئەم کێشەیە هەیە تا ئەمڕۆ، 67 پەرلەمانتار پێکەوە هەر یەکەى شەش بۆ حەوت پرسیار دەکات، خۆتان بخەنە شوێنى ئێمە چۆن دەتوانین وەڵامى ئەم هەموو پرسیارە بدەینەوە، ئێوە خەڵکى ئەم وڵاتەن کێشەکان دەزانن کە هەندێکى دورمەودایە و قوڵایی مێژووى هەیە".

 

"ئێمە کە یاساى چاکسازیمان پێکەوە پەسەندکرد، سەرەتایەکى نوێمان بۆ ئەم حکومەتە دەستپێکردووە، ئێمە لەدواى ئەوەوە چیمان کردووە لەسەر ئەوە لێپرسینەوەمان لەگەڵدا بکەن، لێمان توڕەبن و رەخنەمان لێبگرن، ئێمە چۆن دەتوانین 600 پرسیار لەبەربکەین، تەنانەت هەر ناتوانین بیاننوسین"، وەزیرى دارایی وایوت.

 

لاى خۆیەوە، رێواز فایەق سەرۆکى پەرلەمان وەڵامى وەزیرى دارایی دایەوە و ڕایگەیاند، ئەندامانى پەرلەمان لەبێ هەواڵییان نییە کە پرسیار دەکەن، هەموو ئەندامان لە ئاگاییەوە پرسیار دەکەن و مەبەستیانە وەڵامەکانیان لەئێوە وەرگرن.