گه‌ڕان

Shadow Shadow
سیاسه‌تی

ڕونکردنەوەیەک لە بنەماڵەى ئەو گەنجەى هەڵەبجە کە دوێنێ خۆی خنکاند

2020.07.27 - 18:17
ڕونکردنەوەیەک لە بنەماڵەى ئەو گەنجەى هەڵەبجە کە دوێنێ خۆی خنکاند

ناس کورد-

بنەماڵەی ئەو گەنجەى دوێنێ لە باخی گشتیی هەڵەبجە خۆی خنکاند دەڵێن، ئەو نامەیەی لە میدیا و تۆڕە کۆمەڵایەتییەکان بەناوی ئەوەوە بڵاوکراوەتەوە "دور و نزیک پەیوەندی بەوەوە نییە."

 

دوێنێ یەکشەممە، گەنجێکی خێزانداری تەمەن 39 ساڵ بە ناوی کاوە حەمە ئەمین لە باخی گشتیی شاری هەڵەبجە خۆی هەڵواسی و بەهۆیەوە گیانی لەدەستدا، دواتر نامەیەک بەناوی ئەو گەنجەوە لە چەند میدیایەک و تۆڕە کۆمەڵایەتییەکان بڵاوبووەوە.

 

زیاتر بخوێنەوە: رونکردنەوەى پۆلیس لەبارەى نامەی ئەو گەنجەى کە لە هەڵەبجە خۆى خنکاند

 

بنەماڵەی کاوە دەڵێن، "ئێمە وەک بنەماڵەو کەسوکاری کۆچکردوو کاوە حەمە ئەمین بۆ ڕای گشتی ڕونی دەکەینەوە لە پاش ڕاگەیاندنی کوچی دوای کاکە کاوە نامەیەک بڵاوکرایەوە لە تۆڕە کۆمەڵایەتیەکان بەگشتی گوایە کۆچکردوو دوای خۆی بەجێی هێشتووه."

 

ئاماژه‌ به‌وه‌شكراوه‌، "ئێمە سەرەڕای سوپاسی خەمخۆری و بەدەمەوەهاتنی هاوڵاتیان بۆ ئەم خەمەی سەرشانمان ڕایدەگەیەنین ئەو نامەیە دوورو نزیک پەیوەندی بە کۆچکردووەوه نییە و ناکرێ لەخەمێکی ئاواقوڵدا ئەوبارودۆخە بۆ مەبەستی تایبەت بقۆزرێتەوە."

 

بۆیە "داوا لەهەموو سایت و پەیجی تۆڕە کۆمەڵایەتیەکان دەکەین لە ڕوداوەکاندا بۆ لێشاوی لایک و کۆمێنت پەنا بۆ هیچ بڵاوکراوەیەکی ناڕاستی وا نەبرێت و ڕێگە بۆ لایەنی پەیوەندیدار بکریتەوە بۆ ئەنجامدانی کاری خۆیان،" بنەماڵەکەى کاوە وا دەڵێن.