گه‌ڕان

Shadow Shadow
سیاسه‌تی

لەسەر توندوتیژییەكانی مەیدانی تەحریر نەتەوە یەكگرتوەكان هاتە دەنگ

2020.07.27 - 14:54
لەسەر توندوتیژییەكانی مەیدانی تەحریر نەتەوە یەكگرتوەكان هاتە دەنگ

ناس کورد- 

نەتەوە یەكگرتووەكان لەسەر توندوتیژییەكانی شەوی ڕابردووی شاری بەغدا كە لەدژی خۆپیشاندەران ئەنجامدرا هاتە دەنگ و پێشوازی لەهەوڵەكانی حكومەت بۆ بەسزاگەیاندنی تاوانباران کرد.

 

لەڕاگەیەنراوێكدا كە ئەمڕۆ (دووشەممە، 27ی تەمموزی 2020) بڵاوی كردووەتەوە، نەتەوە یەكگرتووەكان لەسەر ڕوداوەكەی شەوی ڕابردووی بەغدای پایتەخت ڕایگەیاند، سەرکۆنەى كردەوە توندوتیژییەكان دەكەین كە زیانی گیانی لێكەوتەوە لەخۆپیشاندانەكانی شەوی ڕابردووی شاری بەغدا و پێشوازی لەپابەندبوونی حكومەت دەكەین بەلێكۆڵینەوە لەڕوداوەكە و بەسزا گەیاندنی تاوانباران".

 

ڕێکخراوەکە ئاماژەی بۆ ئەوەش كردووە، عێراقییەكان لەدۆخێكی سەختدان و ڕوبەڕووی ئاڵنگاری زۆر بوونەتەوە و دەبێت بێ هیچ مەرجێك پارێزگاری لەمافەكانیان بكرێت لەكاتی دەربڕینی ناڕەزایەتیەكانیاندا بەشێوازێكی ئاشتیخوازانە.



ئەوەش لەكاتێكدایە، شەوی ڕابردوو لەمیانی بەڕێوەچوونی خۆپیشاندانێكی ناڕەزایی بەهۆی خراپی دۆخی كارەبای بەغدای پایتەختەوە، بۆمبی دوكەڵ و فرمێسكڕێژ لەلایەن هێزە ئەمنیەكانەوە لەدژی خۆپیشاندەران وەشێنرا و بەو هۆیەشەوە قوربانی لێكەوتەوە.



لەسەر ڕوداوەكەش مستەفا كازمی، سەرۆكوەزیران هاتە سەرخەت و لەڕاگەیەنراوێكی نوسینگەی میدیایدا لەسەر ڕوداوەكە تیشك خرایە سەر ئەوەی دۆسیەی كارەبا ئاڵنگارییەكی بەردەم حكومەتی ئێستایە بەهۆی ئەوەی لەماوەكانی ڕابردودا ملیارەها دۆلار بۆ ئەو كەرتە خەرج كراوە بەڵام پارەكەی خوراوە و گەندەڵی پێوەكراوە و لەهەوڵی چارەسەركردنی ئەو كێشەیەش بەردەوام دەبن.