گه‌ڕان

Shadow Shadow
سیاسه‌تی

فەرماندەی گشتیی هێزە چەکدارەکان ڕاگەیەندراوێکى بڵاوکردەوە

2020.07.27 - 09:56
App store icon Play store icon Play store icon
فەرماندەی گشتیی هێزە چەکدارەکان ڕاگەیەندراوێکى بڵاوکردەوە

ناس کورد-

وتەبێژی فەرماندەی گشتیی هێزە چەکدارەکانی عێراق لەبارەی خۆپیشاندانەكانی مەیدانی تەحریرەوە ڕاگەیەنراوێكی بڵاوكردەوە و ڕایگەیاند، بۆ پاراستنی خۆپیشاندەران ڕاسپێردراون و ئاگادارکراونەتەوە کە بەهیچ شێوەیەک ڕوبەڕویان نەبنەوە.

 

کەناڵی ناس کورد لە تێلیگرام جۆین بکە   

ئەمڕۆ (دووشەممە، 27ی تەمموزی 2020)، لەڕاگەیەندراوێکدا لیوا یەحیا ڕەسوڵ، وتەبێژی فەرماندەی گشتی هێزە چەکدارەکانى عێراق ئاماژەى بەوە کرد، هێزە ئەمنیەكان بۆ پاراستنی خۆپیشاندەرانی ئاشتیخواز ڕاسپێدراون و ڕێنمایی ڕوون و ڕەوانیان خراوەتە بەردەست كە بەهیچ شێوەیەك پێكدادان لەگەڵ خۆپیشاندەراندا دروست نەكەن،  گەر بێزاریش كران بۆیان نیە پەنا ببەنە بەر توندوتیژی، مەگەر لەحاڵەتی ئەوپەڕی پێویست و كوشتنی ئەندامانی هێزە ئەمنییەکاندا نەبێت.

 

ئاماژەی بەوەشكرد، لەماوەكانی ڕابردودا و لەمەیدانەكانی خۆپیشاندانەكان چەند ڕوداوێكی ناخۆش ڕویانداوە و لێكۆڵینەوەشیان لەسەر كراوە بۆ ئەوەی بگەنە سەرەداوەكان، بۆ ئەوەی لایەنی دەستدرێژیكار و كەمتەرخەمیش بەسزای یاسایی خۆیان بگەن.

 

باسی لەوەشكرد، بێزاركردنی هێزە ئەمنیەكان بەمەبەستی ڕاكێشانیان بۆ ڕوبەڕوبونەوەی خۆپیشاندەران، هاندانێكە لەلایەن چەند لایەنێكەوە كە نایانەوێت بارودۆخی عێراق جێگیر و ئارام بێت.

 

بەرپرسە سەربازییە باڵاكەی عێراق ئەوەشی خستووەتەڕوو، هەموویان بەو ئاستەنگیانە دەزانن كەژیانی خەڵكی عێراقی پێدا تێپەڕدەبێت و حكومەتیش گەرچی تەمەنی كەمە هەوڵی چارەسەركردنی دۆخەكە دەدات، ناشكرێت سەرزەنشتی هاووڵاتیان بكرێت لەسەر دەربڕینی بۆچونەكانیان بەڕێگایەكی ئاشتیخوازانە بێ بێزاركردن و هەوڵدان بۆ پێكدادان لەگەڵ هێزە ئەمنیەكاندا.

 

جەختیشیکردووەتەوە، خۆپیشاندەران براو كەسوكاریانن هاوشێوەی ئەندامانی هێزە ئەمنیەكان كە بەپاراستنیان ڕاسپێدراون و دەستدرێژیكردنەسەر هەر لایەكیان مایەی قبوڵكردن نیە و لێشی بێدەنگ نابن.