گه‌ڕان

Shadow Shadow
سیاسه‌تی

’لێکنزیکبونەوەى باش هەیە’ 

ناس کورد ئاشکراى دەکات ’پێش ئەنجامدانى دانیشتنى پەرلەمان پارتى و یەکێتى کۆدەبنەوە’

2020.07.26 - 18:35
ناس کورد ئاشکراى دەکات ’پێش ئەنجامدانى دانیشتنى پەرلەمان پارتى و یەکێتى کۆدەبنەوە’

ناس کورد-

چاوەڕواندەکرێت ئەمڕۆ یان سبەی پارتى و یەکێتى کۆبنەوە بۆ چارەسەرى کێشەکانیان، پێش کۆبوونەوەکەى سبەینێى پەرلەمانى کوردستان کە لەسەر داواى یەکێتى دواخراوە.

 

بڕیاربوو ئەمرۆ کۆبوونەوەى پەرلەمان بکرێت، بەڵام لەسەر داواى یەکێتى بۆ سبەینێ دواخرا و رێواز فایەق سەرۆکى پەرلەمان لە پشکى یەکێتى بانگهێشتى پەرلەمانتارانى کردووە بۆ کۆبونەوەکەى سبەینێ.

 

سەرچاوەیەکى بەرپرس لە یەکێتى بە ناس کوردى ڕاگەیاند "چاوەڕواندەکرێت سبەینێ فراکسیۆنى یەکێتى بەشدارى کۆبوونەوەى پەرلەمان بکات، چونکە ئێستا لێکنزیکبوونەوەى باش هەیە".

 

وتیشى "وەفدێکى یەکێتى لەهەولێرە بۆ کۆبوونەوە لەگەڵ پارتیدا بۆ قسەکردن لەسەر چارەسەرى کێشەکان".

 

کۆبوونەوەکەى پارتى و یەکێتى ئەگەر ئەنجام بدرێت، دەبێتە یەکەم کۆبوونەوە لەدواى کۆنگرەى یەکێتى یەوە لەکۆتایی ساڵى ڕابردوودا، هەروەها کۆبوونەوەکەى سبەینێی پەرلەمانیش دەبێتە یەکەم کۆبوونەوە دواى نزیکەى مانگێک لە پەککەوتنى بەهۆى ناکۆکییەکانى پارتى و یەکێتى یەوە.

 

حاجى مەسیفى جێگرى بەرپرسى مەڵبەندى هەولێرى یەکێتى بە ناس کوردى ڕاگەیاند "مەبدەئییەن هەردولا رەزامەندن لەسەر کۆبوونەوە و هەر دەکرێت بەڵام وادەکەى دیار نییە".

 

وتیشى "لەناو پارتیشدا یەک هەڵویست نییە لەبارەى کۆبوونەوەوە، بەڵام دۆخەکە هەردولا ناچار دەکات پێکەوە دابنشین بۆ چارەسەرى کێشەکان".

 

بڕیاربوو دوێنێ شەممە، 25ی تەموزی 2020، پارتی و یەکێتی سەبارەت بە گرژییەکانی نێوانیان کۆببنەوە و بڕیاریش لە کۆبوونەوەکەی ئەمرۆى پەرلەمانیش بدرێت، بەڵام وەک پێشووتر لەگەڵ نزیکبوونەوەی وادەی کۆبوونەوەکە شەڕی میدیایی نێوان هەردوولا دەستیپێکردەوە و کۆبوونەوەکە نەکرا.

 

ئەنجامنەدانى ئەو کۆبوونەوەیە دانیشتنى ئەمڕۆى پەرلەمانیشى دواخست، ئێستاش چاوەکان لەسەر دانیشتنى سبەینێی پەرلەمانە کە سەرۆکى پەرلەمان داواى بەستنى کردووە.

 

پێشتر بەهمەن کاکە عەبدوڵا پەرلەمانتارى فراکسیۆنى پارتى بە ناس کوردى ڕاگەیاندبوو "ئێمە لەبەر خاترى یەکێتى و لەسەر داواى ئەوان دانیشتنى ئەمڕۆمان دواخست".  

  

ئاشکراشیکردبوو "فراکسیۆنى یەکێتى بەڵێنیانداوە لە دانیشتنى سبەینێی پەرلەمان بەشداربن و داواى 24 کاتژمێر مۆڵەتیان کردووە، هیوادارین بەشداربن لە دانیشتنەکە".