گه‌ڕان

Shadow Shadow
سیاسه‌تی

کۆبوونەوەکەى ئەمڕۆی پەرلەمانی کوردستان دواخرا

2020.07.26 - 10:37
کۆبوونەوەکەى ئەمڕۆی پەرلەمانی کوردستان دواخرا

ناس کورد-

سەرۆکایەتی پەرلەمانی کوردستان دانیشتنی ئەمڕۆی پەرلەمانی بۆ سبەینێ دواخست و دەڵێت، بڕیارەکە دوای ڕاوێژ بووە لەگەڵ فراکسیۆنەکان "بە مەبەستی ڕەخساندنی دەرفەتی زیاتری بۆ لێکتێگەیشتنی نێوانیان."

 

بڕیار بوو ئەمڕۆ یەکشەممە، 26ی تەموزی 2020، دانیشتنی پەرلەمانی کوردستان ئەنجام بدرێت دوای ماوەیەکی زۆر لە هەڵپەساردنی دانیشتنەکان لەلایەن فراکسیۆنى یەکێتییەوە.

 

سەرۆکایەتی پەرلەمانی کوردستان دەڵێت، "بڕیارماندا به‌دواخستنی دانیشتنی ژماره‌ (6)ى ئاسایی وه‌رزی به‌هاره‌ى ساڵی دووه‌می خولی پێنجه‌می هه‌ڵبژاردنی په‌رله‌مانی كوردستان بۆ كاتژمێر (11)ى پێشنیوه‌ڕۆی ڕۆژی دووشەممە، 2020/7/27، به‌هه‌مان به‌رنامه‌ى كارى راگه‌یه‌نراو."

 

پێش ئەوەى دانیشتنەکە بە فەرمی دوابخرێت، عوسمان کەریم سوارە، پەرلەمانتاری فراکسیۆنى یەکێتی بە ناس کوردی وت، هێشتا بڕیارمان نەداوە بەشداری دانیشتنەکە دەکەین یاخود نا.

 

بەڵام فراکسیۆنى گۆڕان بڕیار بوو بەشداری دانیشتنەکە بکات.

 

هەر پێش دواخستنی، فراکسیۆنى کۆمەڵی ئیسلامی بڕیاری بایکۆتی دانیشتنەکەیان دا، هەروەها فراکسیۆنى یەکگرتووش بڕیاری دا بەشداری کۆبوونەوەکە نەکات و ڕایگەیاند، "بەهۆی ئەوەى پەرلەمان ڕۆڵ و ئەرکی خۆی لەدەستداوە و ئەجێندای حزبی جێبەجێ دەکات، بەشداری دانیشتنەکە ناکات."

 

پێشەوا هەورامانی، وتەبێژی فراکسیۆنى پارتی نوسیویەتی، "پارتی زۆرینەى پەرلەمانی داخاتە خزمەتی سەقامگیری سیاسی و کۆمەڵایەتی، چەند فراکسیۆنێکی پەرلەمانی داوای دواخستنی دانیشتنی پەرلەمانیان کرد بۆ بەیانی و ڕێز لە داواکەیان گیرا."