گه‌ڕان

Shadow Shadow
سیاسه‌تی

’’کۆرۆنا ڤایرۆسێکی عیلمانییە و بێدینی بڵاودەکاتەوە’’.. نوێترین قسەى پیاوانی ئاینی ئێرانی

2020.07.25 - 14:29
’’کۆرۆنا ڤایرۆسێکی عیلمانییە و بێدینی بڵاودەکاتەوە’’.. نوێترین قسەى پیاوانی ئاینی ئێرانی

ناس کورد-

وتاربێژی مزگەوتی قومی ئێرانی ڕایگەیاند، كۆرۆنا "ڤایرۆسێكی عیلمانیە و هەوڵی وێرانكاری وڵاتانی موسڵمانان دەكات بۆ ئەوەی بەرەو گومڕای و بێدینییان" ببات.

 

عەباس موسەوی، وتاربێژی مزگەوتی شاری قوم لە وتاری نوێژی هەینیدا ڕایگەیاندووە، بۆنەكانی مانگی موحڕەمی داهاتوو لەژێر كاریگەری ڤایرۆسەكەدایە و لەسەر خەڵكیش پێویستە بۆ بەڕێكردنی ڕێوڕەسمەكانی بۆنە و جەژنەكانیان تەنها ڕێنماییەكانی شارەزایانی ئاینی جێبەجێ بكەن.

 

لێدوانەكەی وتاربێژی مزگەوتی شاری قوممی ئێرانی یەكەمین لێدوانی پیاوانی ئاینی نییە لەسەر ڕاستیەكانی ڤایرۆسی كۆرۆناوە و پێشتریش لێدوانی چەند پیاوانی ئاینی لەو بارەیەوە مشتومڕ و تەنانەت گاڵتەوگەپی نێو تۆڕە كۆمەڵایەتیەكانی بەدوای خۆێدا هێنا.

 

عەلی ڕەزا پەناهییان كە نزیكە لە عەلی خامنەیەوە بەئاژانسی هەواڵی تەسنیمی وڵاتەكەی ڕاگەیاند، بەپێی گێڕانەوەكان لەبارەی سەرهەڵدانی نەخۆشی و پەتاكانەوە بە كۆرۆناشەوە ئەوە سەرەتایەكە بۆ دەركەوتنی ئیمامی مەهدی.

 

داواشی لە خەڵكی كرد زیاتر ڤایرۆسەكە لەنێو خۆیاندا بڵاوبكەنەوە بۆ ئەوەی ئیمامی مەهدیش زووتر دەربكەوێت.

 

پەناهییان كە پێشتر قسەی لەبارەی ڤایرۆسەكەوە كرد ئاماژەی بۆ ئەوەش كردووە، یەكێك لە فەلسەفەكانی پەتای ڤایرۆسی كۆرۆنا پێش دەركەوتنی مەهدی ئەوەیە مرۆڤ تێبگات كە كەسێك بۆ ڕابەرایەتی جیهان پێویستە.

 

باسی لەوەش كردووە، جیهان دووچاری ترس و دڵەڕاوكێ و كێشەی جۆراو جۆری ئابووری و مردن بووەتەوە، خەڵكی پێویستی بە حكومەتێكی ئاینی هەیە كە سەركردەكەی ئیمامی مەهدی بێت.

 

یەكێكی دیكە لە سەیرو سەمەرەكانی ڕێنمایەكانی پیاوانی ئاینی شیعەكانی ئێران ئەوەبووە لەلایەن عەباس تەبرێزیانەوە داوا كراوە خەڵكی بە ڕۆنی وەنەوشەیی كۆمیان چەور بكەن ئەوەش بۆ خۆپارێزی و چارەسەری پەتاكە ڕۆڵی هەیە.

 

هەر لەسەر پێدانی ڕێنمای بە هاوڵاتیان، حوسێن ڕافازادە كە بەباوكی پزیشكی ئیسلامی ئێرانی ناسراوە داوای كرد، قەترەیەك لەڕۆنی حنزڵ بكرێتە هەردوو گوێیەكانەوە ئیدی ڕێگری لە ڤایرۆسەكە دەكات.

 

هەر لەبارەی ڕێنمایەكانی پیاوانی ئاینیەوە، عەبدوڵا جەوادی كە پیاوێكی ئاینی ناسراوی ئێرانیە ڕایگەیاند، ڤایرۆسەكە نیعەتی خودایە و زیانێكی كەم بەكۆمەڵگە دەگەیەنێت و خێرەكەی زۆرترە.