گه‌ڕان

Shadow Shadow
سیاسه‌تی

فڕۆکەى بۆمبڕێژکراو و سەردانێکى گرژ

رۆژنامەیەک: كازمی دوو داواكاری خامنەیی رەتكردووەتەوە 

2020.07.25 - 10:29
رۆژنامەیەک: كازمی دوو داواكاری خامنەیی رەتكردووەتەوە 

ناس کورد-

 

سەردانەكەی كازمی بۆ تاران و دیدارەكەی لەگەڵ خامنەیدا گرژبووە و كازمی دوو داواكاری ڕابەری باڵای ئێرانی ڕەتكردووەتەوە، ئەوەش بەپێی راپۆرتێکى رۆژنامەى عەرەبی لەندەنى.

 

ڕۆژنامەکە بۆ یەكەمجار ئەوەی ئاشكرا كردووە، کە لەسەردانەكەی مستەفا كازمی سەرۆك وەزیرانی عێراق بۆ تاران و دیداری لەگەڵ عەلی خامنەی ڕابەری باڵای ئێراندا گرژی دروستبووە و ئێران شكستیهێناوە لەگەیشتن بەداواكارییەكانی لەو سەردانەدا.

 

ڕۆژنامەكە ئەوەشی دركاندووە، هەر لەو سەردانەدا مستەفا كازمی دوو داواكاری ئێرانی ڕەتكردووەتەوە و جێبەجێينەكردوون.

 

بەپێی ڕۆژنامەكە، داواكاری یەكەم ئەوەبووە، عەلی خامنەیی داوای لەكازمی كردووە، بۆ دانەوەی پارەی كارەبا و گازی سروشتی كە عێراق لەئێرانی دەكڕێت بەدۆلار بیداتەوە چونكە ئێران زۆر پێویستی بەوە هەیە بۆ بانكە چینیەكان و مستەفا كازمیش ئەوەی ڕەتكردووەتەوە و سوور بووە لەسەر ئەوەی پارەكە بەپارەی عێراقی یاخود ئێرانی بدرێت ئەوەش بۆ دووركەوتنەوە لەسزاكانی ئەمریكا.

 

هەر بەپێی ڕۆژنامەكە كە لەسەر سەرچاوەیەكەوە وەریگرتووە، داواكاری دووەمیش ئەوەبووە، مستەفا كازمی دیدار لەگەڵ ئیسماعیل قائانیی فەرماندەی فەیلەقی قودسی ئیرانیدا ئەنجامبدات بەڵام كازمی ئەو داواكاریەشی بەڕاشكاوی ڕەتكردووەتەوە.

 

ڕۆژنامەكە سەردانەكەی كازمی بۆ تاران "بەشكستخواردوو" وەسف دەكات و هۆكارەكەشی بۆ ئەوە دەگەڕێنێتەوە كە كازمی نەیتوانیوە بچێتە ژێر باری داواكارییەكانی ئێران و لەسەرووی هەموویانەوە پشتیوانیكردنی ئەو بەرەیەی كە بەرەنگاری ئەمریكا دەكات.

 

باسی لەوەشكردووە، تویتەكانی عەلی خامنەیی لەكاتی سەردانەكەی كازمی بۆ تاران ناڕەوایی داواكارییەكانی ئێران لەسەرۆكوەزیرانی عێراق دەردەخات.

 

خامنەیی لەدوای سەردانەكە لەتویتێكدا هەڕەشەی ئەوەی كرد كە ئێران تاوانی كوشتنی قاسم سولەیمانی و ئەبومەهدی موهەندیسی لەبیرناچێت و بەهەمان شێوە هێرش دەكاتە سەر ئەمریكیەكان.

 

لەتویتەكەیدا خامنەی بەرەو ڕووی مستەفا كازمی كاتێك بە سەردانەكەی لەوێ بووە دەڵێت "میوانەكەتان لەماڵی خۆتان كوشت و دانیشتانپێدانا ئەوە تاوانێكی ڕوونە و پرسێكی سادە و ساكار نییە".

 

هەر بەپێی ڕۆژنامەكە، لەكاردانەوەی جێبجێنەكردنی داواكارییەكانی دا لەلایەن سەرۆكی حكومەتی عێراقەوە ئێران دەستدەكات بەجموجۆڵ لەناوخۆی عێراقەوە لەڕێگەی لایەنگرانیەوە و هەوڵی ڕووخاندن و پشێوی نانەوەی زیاتر بۆ حكومەتەكەی كازمی دەدات.

 

لەماوەى ئەو دوو رۆژەدا کە کازمى لە ئێران بوو، هێزە ئەمنییەکانى عێراق دوو هەوڵى توندتیژیان ئاشکراکرد، کە گۆڕانکاریی لە رێڕەوى بارگرژى تاران دژى ئەمریکا نیشان دەدەن، یەکەمیان هێرشکردنە سەر کاروانێکى هاوکارى لۆجیستى بوو لە باشورى عێراق، دووەمیشیان هەوڵى ئاڕاستەکردنى فڕۆکەیەکى بێ فڕۆکەوانى بۆمبڕێژکراو بوو بەرەو باڵیۆزخانەى ئەمریکا لە بەغدا.

 

بەوتەى سەرچاوە ئەمنییەکان، هەواڵگرى عێراقى کەسێکى دەستگیرکردووە کە هەستاوە بە وێنەگرتنى پڕۆسەى تەقاندنەوەى بۆمب بە کاروانێکى سەربازیدا کە کەلوپەلى بۆ هێزەکانى ئەمریکا دەگواستەوە لەسەر رێگەى نێوان بەسرە و ناسریە.

 

ئاماژەیان بەوەشکردووە، ئەو کەسە لەبەغداوە چووەتە ئەو شوێنە بۆ بەجێهێنانى ئەرکەکەى کە سوتانى دوو بارهەڵگرى پڕ لە کەلوپەلى لێکەوتووەتەوە و میدیا عێراقییەکانى سەر بە ئێران گرنگى زۆریانداوە بە بڵاوکردنەوەى.

 

کردەوەى دووەم بەپێی رۆژنامەکە، دەستبەسەرداگرتنى فڕۆکەیەکى بێفڕۆکەوانى بۆمبڕێژکراو بووە لە ناوچەى جادریەى تەنیشت ناوچەى سەوز لە ناوەڕاستى بەغدا لەلایەن هێزە ئەمنییەکانەوە، کە ئامادەکرابوو بۆ هەڵدانى بەرەەو ناوچەى سەوز، کە بارەگا حکومییەکان و هەردوو باڵیۆزخانەى ئەمریکا و بەریتانى لێیە.

 

هێزە ئەمنییەکان وردەکارییان ئاشکرانەکرد لەبارەى لایەنى تێوەگلاو لەو پلانە، بەڵام ئەو فرۆکەیە لەناوچەیەک دەستى بەسەرداگیراوە کە بەپێگەى سەرەکى گروپەکانى سەر بە ئێران دادەنرێت، ئەوەش بەپێی رۆژنامەکە.