گه‌ڕان

Shadow Shadow
سیاسه‌تی

بەچوار پارێزگادا تێدەپەڕێت

وردەکاریی پڕۆژەى ڕاکێشانى هێڵى شەمەندەفەر لەنێوان عێراق و ئێران

2020.07.24 - 17:24
وردەکاریی پڕۆژەى ڕاکێشانى هێڵى شەمەندەفەر لەنێوان عێراق و ئێران

ناس کورد-

 

وەزیرى گواستنەوەى عێراق ڕایگەیاند، پڕۆژەى راکێشانى هێڵى شەمەندەفەر لەنێوان عێراق و ئێراندا سەرەتا تا بۆ مەبەستى گەشتیارى دەبێت نەک بازرگانى و بەچوار پارێزگادا تێدەپەڕێت.

 

 

ناسر حسێن بە ئاژانسى فەرمى عێراقى ڕاگەیاندووە، پڕۆژەکە بە پارێزگاکانى بەسرە، زیقار، میسان و موسەننادا تێدەپەڕێت و سەرجەم ئەو پارێزگایانە لێی سودمەند دەبن.

 

وتیشى "پڕۆژەکە سەرەتا تەنها بۆ هاتوچۆى هاوڵاتییان دەبێت و بۆ مەبەستى بازرگانى بەکارناهێنرێت".

 

وەزیرى گواستنەوەى عێراق باسى لەوەشکرد، لێکۆڵینەوە دەکەن لەبارەى کاریگەرى هێڵى شەمەندەفەر لەسەر بەندەرەکانى عێراق و ئاستى بوژانەوەى بەندەرەکانى ئێران.

 

ئەوەشى خستووەتەڕوو پڕۆژەکە لەلایەن وەزارەتەکانى بازرگانى و پلاندانان و گواستنەوە و دەرەوە تاوتوێدەکرێت پاشان بڕیارى لەسەر دەدرێت لەبارەى بەرکاهێنانى بۆ مەبەستى بازرگانى.

 

 

ناسر حسێن رونیشیکردووەتەوە، پڕۆژەکە لە شەلامجەوە دەستپێدەکات بەرەو بەسرە بەدرێژایی (32) کیلۆمەتر، بە چەندین شوێندا دەڕوات کە مین و زەوى بەکارهێنراوى لێیە، پردێک بە درێژایی کیلۆمەترێک بەسەر شەتولعەرەبدا دروستدەکرێت، ئێران بەڵێنى دروستکردنیداوە.

 

دەشڵێت "ناکۆکیمان لەگەڵ لایەنى ئێرانیدا هەیە لەبارەى پرسی سنورى شەلامجە، گفتوگۆ لەنێوان هەردوولادا لە ئارادایە لەو بارەیەوە، نامانەوێت پڕۆژەکە دەستپێبکرێت تا پرسە هەڵپەسێردراوەکان یەکلایی دەکەینەوە".

 

وەزارەتى گواستنەوەى عێراق پێشتر ڕایگەیاندبوو، لەهەوڵدایە بۆ بەستنەوەى عێراق لەرێگەى هێڵى شەمەندەفەرەوە بە ئەوروپا، لەگەڵ گەشەپێدانى هێڵى شەمەندەفەر لەگەڵ تورکیا.