گه‌ڕان

Shadow Shadow
سیاسه‌تی

سەرۆکایەتی هەرێم پارتی و یەکێتی کۆدەکاتەوە..لەکۆبوونەوەکە یەکێتی بڕیارێکی گرنگ دەدات

2020.07.23 - 16:46
سەرۆکایەتی هەرێم پارتی و یەکێتی کۆدەکاتەوە..لەکۆبوونەوەکە یەکێتی  بڕیارێکی گرنگ دەدات

ناس کورد-

بڕیارە رۆژی شەممەی داهاتوو پارتی و یەکێتی لە سەرۆکایەتی هەرێم کۆببنەوە و تیایدا کێشەکانی نێوانیان تاوتوێ بکەن و لەدوای کۆبوونەوەکەش یەکێتی دوابڕیار لەبارەی بایکۆتکردنی دانیشتنەکانی پەرلەمانەوە دەدات.

 

سەرچاوەیەکی لە مەکتەبی سیاسیی یەکێتیی نیشتیمانیی کوردستان بە ناس کوردی وت: "سەرەتای هەفتەی داهاتوو کە بە ئەگەرێکی زۆر ڕۆژی شەممە دەبێت، پارتی و یەکێتی لە سەرۆکایەتی هەرێم کۆدەبنەوە."

 

وتیشی، کۆبوونەوەکە تایبەت دەبێت بە تاووتوێ کردنی کێشەکانی نێوان هەردوولا، بەتایبەت لەدوای بڕیارێک لەناو یەکێتی هەیە بۆ بایکۆت کردنی دانیشتنەکانی پەرلەمان.

 

ناس کورد زانیویەتی، لەکۆبوونەوەی ڕابردووی ئەنجومەنی سەرکردایەتی، یەکێتی بڕیاریداوە کۆبوونەوەکە لەگەل پارتی بکات و دواتر بڕیاری کۆتایی لەبارەی بایکۆتکردنی دانیشتنەکانی پەرلەمان بدات، یاخود ئەگەر گفتوگۆکانی نێوان هەردوو حزب ئەرێن بوو، ئەوکات لە بڕیارەکە پاشگەزبێتەوە و ڕۆژی یەکشەممە فراکسیۆنی یەکێتی بەشداری دانیشتنی پەرلەمان بکات.

 

دەربارەی ئەندامانی شاندەکە، سەرچاوەکەی مەکەبی سیاسی یەکێتی ئاماژەی بەوەکرد، هێشتا ئەندامانی شاندەکە دیارینەکراون، هەربۆیە بەفەرمی وادەی کۆبوونەوەکە ئاشکرانەکراوە.

 

لەماوەی ڕابردوودا بەهۆی چەند پرسێکی جیاواز گرژی و ئاڵۆزی و شەڕی میدیایی لەنێوان ئەو دوو حزبەدا دروست بوو، هەرچەند چەندین جار هەردوولا هەوڵی کۆبوونەوەیان دا، بەڵام هەوڵەکانیان بێ ئەنجام بوو.