گه‌ڕان

Shadow Shadow
سیاسه‌تی

جوتیاران کارەکانى پڕۆژەکەیان ڕاگرت

فەرمانگەى سەرپەرشتیارى پڕۆژەى 100 مەتریەکەى سلێمانى دواى سڕکردنى دەستبەکاردەبێتەوە

2020.07.21 - 14:51
فەرمانگەى سەرپەرشتیارى پڕۆژەى 100 مەتریەکەى سلێمانى دواى سڕکردنى دەستبەکاردەبێتەوە

ناس کورد-

فەرمانگەى سەرپەرشتیارى پڕۆژەى شەقامى  100 مەتری سلێمانى چاوەڕوانى بڕیارێکى حکومەتە بۆ ئەوەى دەستبەکارەکانى بکاتەوە، لەکاتێکدا ئەمڕۆ پڕۆژەکە کارکردن تیایدا ڕاگیرا بەهۆى ناڕەزایی جوتیارانى سنورەکەوە.

 

14ى ئەم مانگە کارەکانى قۆناغى یەکەمى پڕۆژەى شەقامى  100 مەتری سلێمانى دەستیپێکرد، دواى حەوت ساڵ لە دانانى بەردى بناغەى پڕۆژەکە.

 

ئازاد رەسوڵ، بەڕێوەبەرى فەرمانگەى سەرپەرشتیارى پڕۆژەکە کە لەساڵانى ڕابردوودا کارى فەرمانگەکە لەلایەن پارێزگاى سلێمانییەوە سڕکرا بە ناس کوردى وت "چاوەڕوانین لەدوو هەفتەى داهاتوودا کارەکانمان دەستپێبکاتەوە و بڕیارى سڕکردنى فەرمانگەکە هەڵبوەشێنرێتەوە".

 

پرۆژەکە بە سێ قۆناغ لەلایەن کۆمپانیاى قەیوانەوە جێبەجێدەکرێت، قۆناغى یەکەمى پڕۆژەکە 32 کیلۆمەتر درێژە کە لە تاسڵوجەوە بۆ ناوچەى دەمرکان دەبێت و شەقامى سلێمانى عەربەت دەبڕێت.

 

ئازاد رەسوڵ وتى "ئێستا کارێکى وا لە پڕۆژەکە ناکرێت، تەنها کارى سەرەتایی دەستیپێکردووە، ئەمرۆش جوتیاران بۆ داواى قەرەبوکردنەوەیان کارەکانیان راگرتووە، بەڵام قۆناغى یەکەمى کە سێ ساڵى بۆ دانراوە لەوادەى خۆیدا تەواو دەکرێت".

 

دوو قۆناغەکەى دیکەى پڕۆژەکە کە وادەى جیبەجێکردنیان نادیارە، لە کۆتایی قۆناغى یەکەمەوە دەستپێدەکات و دەچێتە گۆیژە و لەوێوە بە تونێلێک دەچێتەوە تونێلى پێشڕەو، پاشان بەرەو هەوارى شار، دواتر بۆ ناوچەى کەڵەوانان و شەقامى دوکان سلێمانى تا دەگاتەوە بە پردى تاسڵوجە.  

 

ئازاد رەسوڵ باسى لەوەکرد، دوو قۆناغەکەى دیکە دەکەوێتە سەر پلانى حکومەت بۆ جێبەجێکردنیان.

 

پڕۆژەکە چەندین پرد و پردى پەڕینەوە لەخۆدەگرێت و هاتووچۆ لە سنورى گەرمیان و هەڵەبجە و هەورامانەوە دەباتە دەرەوەى شەقامى شەست مەترى سلێمانى، ئەوەش بە هۆکارێک بۆ کەمکردنەوەى قەرەباڵغى ناو شار دادەنرێت.  

 

پڕۆژەکە ساڵى 2001 بریارى دروستکردنى درا، وەک پڕۆژەیەکى ستراتیژى بە ئامانجى کەمکردنەوەى قەرەباڵغى لەناو شارى سلێمانى، دوو ساڵ دواتر و لە ساڵى 2013 بەردى بناغەى پڕۆژەکە لەلایەن عیماد ئەحمەد جێگرى ئەوکاتى سەرۆکوەزیرانى هەرێمەوە دانرا.  

  

دواى دانانى بەردى بناغەى پڕۆژەکە، بە پاساوى قەیرانى دارایی پڕۆژەکە نەخرایە بوارى جێبەجێکردنەوە، تا ساڵى ڕابردوو کاتێک حکومەتى هەرێم بڕیاریدا پڕۆژەکە بەگەڕبخاتەوە و دەست بەجێبەجێکردنى بکرێت.  

 

پڕۆژەکە یەکێکە لەو پڕۆژانەى کە زۆرترین مشتومڕى بەدواى خۆیدا هێناوە، تەنانەت دواى بڕیارى جێبەجێکردنى لەساڵى ڕابردوودا، مشتومڕى زۆر لەسەر بودجەى پڕۆژەکە دروستبوو، تا دواتر حکومەتى هەرێم بڕیاریدا بودجەکە وەک خۆى کە بڕەکەى 400 ملیار دینارە بخرێتە بوارى جێبەجێکردنەوە.