گه‌ڕان

Shadow Shadow
سیاسه‌تی

زەریف سێ داواکارى ڕادەستى بەغدا کردووە

وەڵامەکانى کازمى بەرپرسانى ئێرانى ’ڕازینەکردووە’

2020.07.21 - 14:33
App store icon Play store icon Play store icon
وەڵامەکانى کازمى بەرپرسانى ئێرانى  ’ڕازینەکردووە’

ناس کورد-

سەردانەکەى محەمەد جەواد زەریف، وەزیرى دەرەوەى ئێران بۆ عێراق ئەنجامەکەى بەو شێوەیە نەبووە کە ئێران خوازیارى بوو، بەهۆى وەڵامەکانى مستەفا کازمییەوە بۆ داواکارییەکانى تاران کە جێگەى رەزامەندى زەریف نەبووە، ئەوەش بەپێی راپۆرتێکى رۆژنامەى عەرەبی جەدید.

 

کەناڵی ناس کورد لە تێلیگرام جۆین بکە   

بەپێی راپۆرتەکە، چەند سەرچاوەیەکى دبلۆماسی بەغدا ئاشکرایانکردووە، زەریف لەسەردانەکەیدا بۆ بەغدا سێ داواکارى ئاڕاستەى دەسەڵاتدارانى عێراق کردووە کە یەکەمیان، کارکردنى عێراق بووە بۆ سوککردنى قەیرانى تاران و واشنتن، هەوڵدان بۆ ڕازیکردنى ئەمریکا تا سزا ئابورییەکانى سەر ئێران سوک بکات.

 

بەوتەى سەرچاوەکان، داواکارى دووەمى ئێران نێوەندگیریی کازمى بووە لەنێوان ئێران و سعودیە، وەک سەرەتایەک بۆ چارەسەرى ناکۆکییەکانى ناوچەکە، داواکارى سێیەمیش سوککردنى ئەو کۆتوبەندانە بووە کە بەم دواییانە بەغدا لەسەر دەروازە سنورییەکان لەگەڵ ئێران سەپاندویەتى، بەمەبەستى کارئاسانى بۆ هەناردەکردنى کاڵاى ئێرانى بۆ بازاڕەکانى عێراق.

 

سەردانەکەى زەریف بۆ بەغدا نزیکەى 10 کاتژمێرى خایاند، کە تێیدا چاوى بەدەسەڵاتدارانى ئەو وڵاتە کەوت، لەسەرووى هەمویانەوە سێ سەرۆکایەتییەکە، پێش ئەوەى بچێتە هەولێر بۆ کۆبوونەوە لەگەڵ دەسەڵاتدارانى هەرێم.

 

لەکاتى بەجێهێشتنى بەغدا زەریف وتى "دانوستانى بنیاتنەرانەم لەگەڵ مستەفا کازمى و بەرهەم ساڵح و محەمەد حەلبوسى و بەرپرسانى سیاسی و سەربازى و دادوەرى عێراق ئەنجامداوە، گەشەپێدانى هاریکارى هەردوو وڵات لەبەرژەوەندى گەل و ناوچەکەدایە".

 

بەوتەى سەرچاوەکان، کازمى وەڵامى سێ داواکەى ئێرانى داوەتەوە و بەشێوەیەک کە قابیلى قبوڵ یان رەتکردنەوە بێت، ئەو جۆرە مامەڵەیەش گونجاو نەبووە بەراورد بە پەیوەندییە فەرمییەکانى هەردوو وڵات بەدرێژایی 17 ساڵى ڕابردوو، زەریفیش هەستى بە گۆڕانى شێوازى قسەکردنى بەرپرسانى عێراق کردووە کە پێشتر وێنەى نەبووە.

 

ئاماژەیان بەوەشکردووە، کازمى گوێی لە داواکارییەکانى ئێران گرتووە کە زەریف پێى وتووە، بەڵام بەڵێنى هیچ شتێکى بەرەهایی پێنەداوە. 

 

سەرچاوەکان دەڵێن، کازمى بۆ زەریفى رونکردەوە کە ناوچەکە پێویستى بە سەقامگیری و سنوردانانە بۆ گرژییەکان، لە ئاماژەیەکدا بۆ مامەڵە خراپەکانى ئێران لە عێراق، لەرێگەى پشتیوانى گروپە چەکدارەکان.

 

باسیان لەوەشکردووە، زەریف بەبێ دڵنیابوونەوە لەبارەى چۆنیەتى مامەڵەى بەغدا لەگەڵ داواکارییەکانى تاران، لەکۆبوونەوەکەى لەگەڵ کازمى هاتووەتە دەرەوە.