گه‌ڕان

Shadow Shadow
سیاسه‌تی

ژنە بەندکراوێکی سیاسیی کورد 35 ڕۆژە مانی لە خواردن گرتووە و توشی کۆرۆناش بووە

2020.07.20 - 14:02
ژنە بەندکراوێکی سیاسیی کورد 35 ڕۆژە مانی لە خواردن گرتووە و توشی کۆرۆناش بووە

ناس کورد-

سوهەیلا حیجاب، بەندکراوی سیاسیی کورد لە بەندیخانەی قەرچەکی وەرامین ماوەی 35 ڕۆژە مانی لەخواردن گرتووە، لەئێستاشدا هەرچەندە توشبووی ڤایرۆسی کۆرۆنایە، بەڵام بەردەوامە لە مانگرتنەکەی و لە پێداویستییەکانی چارەسەریی پزیشکییش بێبەشە.

 

رێکخراوی مافی مرۆڤی هەنگاو، ڕایگەیاند، سوهەیلا حیجاب، پارێزەر و چالاکی مەدەنی خەڵکی کرماشان لە بەندیخانەی قەرچەکی وەرامین، پاش تێپەڕینی 35 رۆژ لە مانگرتن لە خواردن هێشتا بەردەوامە لە مانگرتنەکەی.

 

ئاماژەی بەوەشكردووە، سوهەیلا حیجاب هەرچەندە توشی ڤایرۆسی کۆرۆنا بووە، بەڵام هیشتا لە بەندی کەرەنتینەی بەندیخانەی قەرچەکی وەرامین لە پێداویستی پزیشکیی و هەروەها پەیوەندی لەگەڵ بنەماڵەکەی بێبەشە.

  

 سوهەیلا حیجاب، پارێزەر و چالاکی مەدەنی خەڵکی کرماشان 35 ڕۆژ لەمەوبەر لە بەندی کەرەنتینەی بەندیخانەی قەرچەکی وەرامین وەک ناڕەزایەتی دەربڕینێک لە دۆخی نالەباری و شوێنی ڕاگیرانی و فشاری ناوەندە ئەمنییەکان بۆ سەر بنەماڵەکەی مانی لە خواردن گرتووە و داوای کردووە کە بیگوازنەوە بۆ بەندیخانەی ئێڤینی تاران.

 

 ئەو پارێزەرە کوردە لە 3ی ئازاری 2020، دوای ئەوەی بانگ کرا بۆ لقی 3ی دادگای پێداچوونەوەی پارێزگای تاران و دواتر دانیشتنی دادگا بە 18 ساڵ زیندانی سزادرا.

 

 ئەو چالاکە مەدەنیە بە چەندین تۆمەت وەکو ”پڕووپاگەندە دژی نیزام“، ”گردبوونەوەی نایاسایی“، ”تێکدانی بیروڕای گشتی بە مەبەستی ئاژاوە نانەوە“، ”دروستکردنی گرووپ بۆ داکۆکی لە مافی ژنان“ و ”داوای بەڕێوەچوونی ڕیفراندۆم و گۆڕینی یاسای بنەڕەتیی ئیران“ دادگایی کرا و بەوشێوەیە سزادرا.