گه‌ڕان

Shadow Shadow
سیاسه‌تی

هاتووچۆ هۆشدارى دەدات ’هەڵەیەک دەبێتە هۆى گڕگرتنى ئۆتۆمبێلەکەت..خۆتانى لێ بەدووربگرن’

2020.07.20 - 13:14
هاتووچۆ هۆشدارى دەدات ’هەڵەیەک دەبێتە هۆى گڕگرتنى ئۆتۆمبێلەکەت..خۆتانى لێ بەدووربگرن’

ناس کورد-

لەگەڵ هاتنی وەرزی گەرمادا لە هەرێم ڕووداوەکانی گڕگرتنی ئۆتۆمبێل زۆردەبن و ڕاگەیاندنی هاتوچۆی سلێمانیش ڕێنمایی هاووڵاتیان دەکات، لەم وەرزەدا تانکی بەنزینی ئۆتۆمبێلەکانیان پڕ نەکەن، چونکە بەشێكە لەهۆکارەکانی گڕگرتنی ئۆتۆمبێل و مەترسیدارە.

 

لە بڵاوکراوەیەکدا، ڕاگەیاندنی هاتووچۆی سلێمانی ڕایگەیاند: "یه‌كێك له‌و هه‌ڵانه‌ی شۆفێران له‌كاتی تێكردنی به‌نزینی ئۆتۆمبێله‌كانیان ئه‌نجامیده‌ده‌ن، پڕكردنی تانكییه‌كه‌یه‌ به‌ته‌واوه‌تی، ته‌نانه‌ت پاش هه‌ستانه‌وه‌ی ده‌سكی به‌نزینه‌كه‌".

 

ئاماژەی بەوەشكردووە :"به‌نزین شله‌یه‌كی تایبه‌تییه‌ و زوو ده‌بێت به‌هه‌ڵم، به‌تایبه‌تی له‌كه‌شی گه‌رمدا، كۆمپانیاكانی ئۆتۆمبێلیش سیستمێكی تایبه‌تییان له‌تانكی به‌نزینه‌كانی ئۆتۆمبێله‌كان جێگیركردووه‌، كه‌ ئاگادارت ده‌كاته‌وه‌ له‌وه‌ی پێویسته‌ به‌شێك له‌تانكییه‌كه‌ بۆ هه‌ڵمی به‌نزینه‌كه‌ بهێڵیته‌وه‌."

 

ڕونیشیکردووەتەوە: "ئه‌و سیستمه‌ به‌ناوی (EVAP) ناوده‌برێت، كۆمپانیاكان به‌ هه‌ژماركردنی قه‌باره‌ی ته‌نكیی به‌نزینی ئۆتۆمبێله‌كان به‌شێك له‌ته‌نكییه‌كه‌ ده‌هێڵنه‌وه‌، تا ئه‌و به‌نزینه‌ی بووه‌ به‌هه‌ڵم به‌زایه‌ نه‌چێت‌ و سودی لێ ببینرێت".

 

لە بڵاوکراوەکەدا هۆشداری ئەوە دراوە: "به‌پێچه‌وانه‌وه‌ تێكردنی به‌نزین پاش چه‌ند جارێك له‌هه‌ستانه‌وه‌ی ده‌سكی به‌نزینه‌كه‌، زیان به‌سیستمی (EVAP) ده‌گه‌یه‌نێت ‌و بۆ ماوه‌یه‌كیش (تا ئه‌و كاته‌ی به‌شی سیستمه‌كه‌ له‌تانكییه‌كه‌ خاڵی ده‌بێته‌وه‌) مه‌ترسییه‌كانی ته‌قینی تانكییه‌كه‌و سوتانی ئۆتۆمبێله‌كه‌ ئه‌گه‌رێكی كراوه‌یه‌".

 

ئەوەش لەکاتێکدایە، لەگەڵ هاتنی وەرزی هاویندا ناو بەناو دیاردەى گڕگرتنى ئۆتۆمبێل له‌هه‌رێمی كوردستان ڕوودەدات و هاتوچۆی سلێمانیش دەڵێت، به‌دڵنیاییه‌وه‌، به‌شێك له‌هۆكاری گڕگرتنی ئه‌و ئۆتۆمبێلانه‌، ده‌گه‌ڕێته‌وه‌ بۆ ئه‌و هه‌ڵه‌یه‌.