گه‌ڕان

Shadow Shadow
سیاسه‌تی

لە کۆنفرانسی ڕۆژنامەوانی سەرۆکی هەرێم و وەزیری دەرەوەی ئێران باسی قاسم سولەیمانی کرا

2020.07.19 - 21:03
لە کۆنفرانسی ڕۆژنامەوانی سەرۆکی هەرێم و وەزیری دەرەوەی ئێران باسی قاسم سولەیمانی کرا

ناس کورد-

سەرۆکی هەرێمی کوردستان لەگەڵ وەزیری دەرەوەی ئێران کۆبووەوە و لەدوای کۆبوونەوەکەش ڕایگەیاند، هەرێمی کوردستان و ئێران پەیوەندییەکی مێژوویی دێرینیان هەیە و ئێران هەمووکات لە پشتی هەرێم بووە، هاوکات وەزیری دەرەوەی ئێران باسی لە ڕۆڵی قاسم سولەیمانی کرد لە پەیوەندییەکانی هەردوولادا.

 

ئەمرۆ یەکشەممە 19ی تەموزی 2020، محەمەد جەواد زەریف، وەزیری دەرەوەی ئێران لەدوای سەردانیکردنی بۆ بەغدا، دواتر هاتە هەرێمی کوردستان و لە هەولێری پایتەخت لەگەڵ نێچیرڤان بارزانی، سەرۆکی هەرێمی کوردستان کۆبووەوە. 

 

لەدوای کۆبوونەوەکەش، لە کۆنفرانسێکی رۆژنامەوانیدا، نێچیرڤان بارزانی، سەرۆکی هەرێمی کوردستان ڕایگەیاند: "کۆماری ئیسلامی ئێران بۆ عێراق و هەرێمی کوردستان دراوسێیەکی زۆر گرنگە و ئێران هەمیشە وەک دۆست و دراوسێیەک لەگەڵ ئێمەدا وەستاوە و ئەوە لەبیر ناکەین."

 

وتیشی: "هەرێمی کوردستان وێڕای پەیوەندییەکەی کۆمەڵایەتی و کلتوری دێرین، پەیوەندییەکەی بازرگانی فراوانی لەگەڵ ئێراندا هەیە و هەربۆیە لەم دۆخەدا، بوونی پەیوەندییەکی دۆستانە و پتەو زۆر گرنگە و ئێمە هەمووکات هەوڵمانداوە ئەو پەیوەندییانە پەرە پێبدەین."

 

سەرۆکی هەرێمی کوردستان ئاماژەی بەوەشكرد: "لە کۆبوونەوەکەماندا لەگەڵ وەزیری دەرەوەی ئێران، بارودۆخی ناوچەکە و پێگە و ڕۆڵی گرنگی ئێرانمان لە پرسەکانی ناوچەکە تاووتوێ کرد، هەروەها داکۆکیمان لە سەقامگیری دۆخی ناوچەکە و گفتوگۆ و لێکتیگەیشتن و چارەسەری کێشەکان کرد، هەروەها پرسی کۆرۆنا و ئاڵوگۆڕی بازرگانی و سنورەکان و چەند تەوەرێکی تری جێی بایەخی هەردوولا لە کۆبوونەوەکەدا باسکران."

 

هاوکات هەر لە کۆنفرانسەکەدا، محەمەد جەواد زەریف، وەزیری دەرەوەی ئێران ڕایگەیاند: "بۆ ئێمە عێراق و هەموو هاووڵاتیانی عێراق و هەرێمی کوردستان جێی گرنگی و بایەخن و دۆستی ئێمەن، پەیوەندییەکی باشی بازرگانیمان هەیە و تەنانەت کۆرۆناش نەیتوانیوە دەروازەکانی نێوان ئێران و هەرێمی کوردستان دابخات و هەمووکات بە کراوەیی دەمێننەوە."

 

وەزیری دەرەوەی ئێران وتیشی: "پلانمان هەیە پەرە بە پەیوەندییەکانمان بدەین و بەهێڵی شەمەندەفەر هەردوو وڵات پێکەوە ببەستینەوە و لەبواری وزەشدا پەیوەندییەکانمان پێشبخەین."

 

جەواد زەریف لە کۆنفرانسەکەدا باسی لەڕۆڵی قاسم سولەیمانی کورد لە پەیوەندی نێوان هەردوولادا کرد و باسی لەوەکرد: "هیوادارم پەیوەندییەکانمان لەگەڵ هەرێمی کوردستان پەرە بسێنێتی و یادی شەهید سولەیمانیش بەرز دەنرخێنین کە ڕۆڵێکی گەورەی هەبوو لە پەیوەندییەکانی هەردوولادا."