گه‌ڕان

Shadow Shadow
سیاسه‌تی

میدیای پارتی بۆ یەکێتی : سەرۆک بارزانی ئیشی بەئێوە نییە و ناماقوڵیتان کرد

2020.07.19 - 17:03
میدیای  پارتی بۆ یەکێتی : سەرۆک بارزانی ئیشی بەئێوە نییە و ناماقوڵیتان کرد

ناس کورد-

پرسی هاتنی هێزێکی سوپای عێراق بۆ سنوری خانەقین شەڕی میدیایی نێوان پارتی و یەکێتی دروستدەکاتەوە و میدیای فەرمی پارتی هێرشیکی توندی کردووەتەسەر یەکێتی و میدیای فەرمی ئەو حزبە و دەڵێت: "ناماقووڵیتان کرد، سەرۆک بارزانی هیچ ئیشی بەئێوە نییە و ئەو ناماقووڵیانە دووبارە بكەنەوە دەبێ تەحەمولی مەسئولیەت بكەن."

 

هەرچەندە پەیوەندییەکانی پارتی و یەکێتی بەرەو ئاسایی بوونەوە دەچوون و بەوتەی بەرپرسانی هەردوولا نزیکبوو دوای چەند مانگێک لە گرژی و ئاڵۆزی بەمنزیکانە کۆببنەوە، بەڵام پرسی هاتنی سوپای عێراق بۆ سنوری خانەقین شەڕێکی میدیایی دیکەی لەنێوان هەردوولادا دروست کرد.

 

ئەمڕۆ یەکشەممە 19ی تەموزی 2020، میدیای فەرمی پارتی دیموکراتی کوردستان، لە بڵاوکراوەیەکدا ڕایگەیاند: "ڕۆژی شەممە 18-7-2020 ماڵپەڕی (pukmedia) بابەتێكی دابەزاندووە بە ناونیشانی (میدیایەك شكستی گەورە بە ئاڵا دادەپۆشێت) و گلەیی لە هەندێ میدیا و چالاكوانی فەیسبووك كردووە كە بابەتەكەی هەڵكردنی ئاڵای عێراق لە بازگەیەكی میحوەری قەرەتەپە و سوكایەتیكردنی ئەفسەرانی عێراقی بە پێشمەرگەیان گەورە كردووە."

 

ئاماژەی بەوەشكردووە: " پاشان ماڵپەڕەکە گلەیینامەكەی تێكەڵ كردووە بە سەردانەكەی وەزیری دەرەوەی فەڕەنسا و پێشوازیكردنی سەرۆك بارزانی و سەرۆكی هەرێم و سەرۆكی حكومەت لە وەزیری دەرەوەی فەڕەنسا، ماڵپەڕەکە هەلی قۆستووەتەوە ناماقووڵی و زێدەڕۆیی بەسەر كەسایەتی و دامودەزگەی هەرێم بكات."

 

 

میدیای فەرمی پارتی ئەوەشی خستووەتەڕوو: "بەر لەوەی بەڕێوەبەرانی ماڵپەڕەکە بە هەناسەتەنگی شتەكان تێكەڵ بكەن، دەبێ ئەو مافە بە خەڵكی كوردستان بدەن كە بەرانبەرتان بەدگومان و دوودڵ بن، دەبێ ئەوە بزانن كە هەموو تاكێكی كورد، هەموو ساتێك، دڵیان لەناو دەستیانە نەوەك بە قەوڵی كاك كۆسرەت كاڵفامێك لە پڕ ببێتە دەڵاڵی فرۆشتنی لایەك لە خاكی نیشتمان، خەڵك بەردەوام چاوەڕێی ئەوەیە بە قەوڵی كاك قوباد كەتنێكی تازەتان لێ ڕوو بدات و خوێنی شەهیدان و ڕەنج و قوربانیدانیان بەر با بدەن، هۆکاری ئەو كاردانەوانە لە كاربەدەستانی خۆتان بپرسن كە بۆ وایان كردووە هاووڵاتیانی كوردستان بەردەوام ترسی ئەوەیان لێ نیشتبێت دەستی حەسەن پلایسێك بگرن بیهێننە سەر ماڵ و كەرامەتی كورد."

 

لە بڵاوکراوەکەدا ئەوەش هاتووە:"پێتان وایە خەڵك فرمێسكی ئەو پێشمەرگەیە لە یاد دەكات كاتێك بۆ تێكشكاندنی ورە و كەرامەتی پێشمەرگە و خاك دەگریا و دڵی نەتەوە بەو فرمێسكانە هەلاهەلا بوو؟ كورت و كرمانجی كوردستانیان مارانگەز بوونە و متمانەیان بە كۆڵوانەسوور و شاگردی حاج ئاغاكان نییە و ناشبێت، لەبری ئەوەی گلەیی لە خەڵك بكەن، وەرن تۆزێ شەهامەتتان هەبێ و نیشتیمانپەروەر بن، وەرنە بەرەی گەل و نڕەی سوپای جەهل و پلایسەكان دڵ و دەروونتان نەلەرزێنێ."

 

لەکۆتایی پەیامەکەیدا ماڵپەڕی پارتی دیموکراتی کوردستان ئاماژەی بەوەکردووە: "لەگەڵ هەموو ئەوانەیشدا چیتر ڕێگە بە خۆتان مەدەن زاتی ئەوە بكەن ناوی سەرۆك بارزانی تێكەڵی ئەو بیانووە بێبنەمایانە بكەن، سەرۆك بارزانی نە ئیشی بە ئێوەیە و نە ڕێگەی بە ڕێگەی ئێوە كەوتووە، بۆیە ئەم ناماقووڵیانە دووبارە بكەنەوە دەبێ خۆتان و كاڵفامخانەتان تەحەمولی مەسئولیەت بكەن."

 

ئەمە لەکاتێکدایە، دوێنێ شەممە 18ی تەموزی 2020، ماڵپەڕی (PUK) میدیا کە میدیای فەرمی یەکێتییە، بڵاوکراوەیەکی بڵاوکردەوە و ڕایگەیاند: " هەڵكردنی ئاڵای عیراق، كە لەلایەن ژمارەیەك سەربازی عیراقی بەهەڵە و بەوتەی ئەفسەرانی هێزەكە و روونكردنەوەی راگەیاندنی میحوەری قەرەتەپە- حەمرین، هێزی پێشمەرگەی كوردستان، ئەو هێزە عیراقیە رێگەیان لێتێكچووە، بەڵام میدیای دوو میدیای سێبەری سەربە دوو باڵەكەی پارتی دیموكراتی كوردستان، بە مەبەست و لەژێر ناوی پیرۆزی ئاڵای كوردستان، كەوتوونەتە چەواشەكاریی و شێواندنی راستی رووداوەكان."

 

ئاماژەی بەوەشکردبوو: "ئەوەش لەكاتێكدا لەكاتی نمایشكردنی خەمخۆری درۆزنانەیان بۆ ئاڵاكەی كوردستان و دژایەتی ئاڵای عیراق، هەرزوو رووی راستەقینەیانی هەڵماڵی و لەكاتی پێشوازییكردنی مەسعود بارزانی سەرۆكی پارتی ژان لۆردیان  بە هەڵكردنی ئاڵای عیراق دیدار و پێشوازییەكەی كرد."

 

ئەمە لەکاتێکدایە، لەماوەی ڕابردوودا گرژی و شەڕی میدیایی لەنێوان هەردوو حزبدا دروست بوو، هەرچەندە ماوەی چەند مانگێکە هەوڵی جیاواز هەیە بۆ کۆبوونەوەی هەردوولا، بەڵام لەگەڵ نزیکبوونەوەی ئەنجامدانی کۆبوونەوە، پرسێکی دیکە دروست دەبێت و شەڕی میدیایی نێوان هەردوولا قوڵتر دەبێتەوە.