گه‌ڕان

Shadow Shadow
سیاسه‌تی

لەکاتى سەردانەکەى وەزیرى دەرەوەى ئێران بۆ بەغدا کاتیۆشا ئاڕاستەى ناوچەى سەوز کرا

2020.07.19 - 15:46
لەکاتى سەردانەکەى وەزیرى دەرەوەى ئێران بۆ بەغدا کاتیۆشا ئاڕاستەى ناوچەى سەوز کرا

ناس کورد-

 

هاوکات لەگەڵ سەردانەکەى محەمەد جەواد زەریف وەزیرى دەرەوەى ئێران بۆ بەغدا، بە کاتیۆشا هێرشکرایە سەر ناوچەى سەوزى بەغدا.

 

سەرچاوەیەکى ئەمنى بە ناس کوردى ڕاگەیاند، موشەکى کاتیۆشا ئاڕاستەى ناوچەى سەوز کراوە لە ناوەڕاستى بەغدا.

 

هاوکات سەرچاوەیەکى دیکە ڕایگەیاند، دەنگى سێ تەقینەوە لەناوچەى سەوز بیستراوە، لەکاتى کۆبوونەوەکانى زەریف لەگەڵ دەسەڵاتدارانى عێراق.

 

وتیشى هێرشەکە هیچ زیانێکى لێنەکەوتوەتەوە.

 

سەرلەبەیانى ئەمڕۆ محەمەد جەواد زەریف گەیشتە بەغدا، کە بەیەکەم سەردانى بەرپرسێکى باڵاى ئێران دادەنرێت بۆ بەغدا لەدواى وەرگرتنى پۆستى سەرۆکوەزیران لەلایەن مستەفا کازمییەوە.

 

زەریف لەسەردانەکەیدا لەگەڵ دەسەڵاتدارانى عێراق، لەسەرووى هەمویانەوە سەرۆککۆمار و سەرۆکوەزیران کۆبووەوە.

 

لەکۆبوونەوەیدا لەگەڵ مستەفا کازمى سەرۆکوەزیران، زەریف ڕایگەیاندووە، ئێران دەیەوێت بچێتە قۆناغێکى نوێ و ئەرێنییەوە لەگەڵ عێراق و رێککەوتنەکانى نێوان هەردوو وڵات کارابکرێن لەسەرجەم کەرتەکاندا، ئەوەش بەپێی بەیاننامەیەکى نوسینگەى سەرۆکوەزیران.

 

دەسەڵاتدارانى عێراق لەکۆبوونەوەکانیاندا لەگەڵ زەریف جەختیان لەسەر هەڵویستى هاوسەنگانەى عێراق کردووەتەوە بۆ دابینکردنى سەقامگیریی و ئاسایشى هەرێمایەتى و چارەسەرکردنى قەیرانەکانى ناوچەکە.