گه‌ڕان

Shadow Shadow
سیاسه‌تی

پەکەکە کوژرانى 16 سەربازى تورکیاى لەسێ هێرشدا ڕاگەیاند

2020.07.12 - 17:46
پەکەکە کوژرانى 16 سەربازى تورکیاى لەسێ هێرشدا ڕاگەیاند

ناس کورد-

هێزەکانى پاراستنى گەل (هەپەگە) باڵى سەربازى پەکەکە کوژرانى 16 سەربازى سوپاى تورکیاى لەسێ هێرشدا لەسنورى حەفتانین، ڕاگەیاند.

 

بەپێی ڕاگەیەنراوێکى هەپەگە، رۆژى 10ى تەموز هێزەکانیان لە یەژا-ستار لە گردی شەهید جودی لە ناوچەی شەشدارا، لە دژی سوپاى تورکیا چالاکیەکیان ئەنجامداوە و دوو سەرباز کوژراون.

 

ئاماژەى بەوەشکردووە، هەروەها رۆژى 11ى تەموز هێزەکانیان لە دژی یەکەیەکەی سەربازی لە گردی شەهید بەرخۆدان لە ناوچەی خانتور، چالاکیەکیان ئەنجامدا و سەربازێک کوژراوە.

 

ڕاگەیەنراوەکە رونیدەکاتەوە، سەرلەبەیانی ئەمڕۆ لە دۆڵی بەرازانی سەر بە ناوچەی خانتور لە دژی یەکەیەکی سوپاى تورکیا کە هەوڵیداوە لەو ناوچەیە پێشڕەوی بکات، هێزەکانیان لە سێ قۆڵەوە هێرشیان کردووەتە سەر سوپاى تورکیا و 13سەرباز کوژران. 

 

هەپەگە باس لەوەشکردووە، لەو ناوچەیە شەڕ و پێکدادان تا ئێستاش بەردەوامە. دواتر لەو بارەیەوە زانیاری بەرفراوانتر ئاشکرا دەکەن.

 

پێکدادانەکانى نێوان سوپاى تورکیا و پەکەکە لە ناوەڕاستى مانگى ڕابردووەوە پێیانناوەتە قۆناغێکى نوێوە، دواى ئەوەى سوپاى تورکیا ئۆپراسیۆنێکى بەرفراوانى زەمینى و ئاسمانى لەسنورى پارێزگاى دهۆک دژى پەکەکە دەستپێکرد.    

  

تورکیا 37 خاڵى نوێی سەربازى لەو سنورە دروستکردووە، سەرەڕاى ناڕەزایی بەغدا لەبارەى بەزاندنى خاکى هەرێمى کوردستان لەلایەن تورکیاوە.