گه‌ڕان

Shadow Shadow
سیاسه‌تی

ئێمە بۆ چاکسازی بەشداری حکومەتمان کرد

گۆڕان: پێویستە حکومەت پابەندبێت بەو بەڵێنەی کە بڕینی موچە تەنها بۆ ئەم مانگە بووە

2020.07.09 - 20:52
App store icon Play store icon Play store icon
گۆڕان: پێویستە حکومەت پابەندبێت بەو بەڵێنەی کە بڕینی موچە تەنها بۆ ئەم مانگە بووە

ناس کورد-

جڤاتی نیشتیمانیی گۆڕان ڕایگەیاند، پێویستە حکومەت پابەندبێت بەو بەڵێنەی کە کەمکردنەوەی موچە تەنها بۆ مانگی ڕابردوو بووە و ئاماژە بەوەشدەکات، بەشداری گۆڕان لە کابینەی نۆیەم تەنها بۆ ئامانجی چاکسازییە و داواشدەکات هەرێم و بەغدا بەشێوەیەکی شەفافانە رێککەوتن ئەنجامبدەن.

کەناڵی ناس کورد لە تێلیگرام جۆین بکە   

 

ئەمڕۆ پێنجشەمە، 9ی تەموزی 2020، جڤاتی نیشتیمانیی بزوتنەوەی گۆڕان کۆبونەوەی ئاسایی خۆی بە بەشداری تیمی گۆڕان لە حکومەتی هەرێم ئەنجامدا و کۆبونەوەکە تایبەت بوو بە رەوشی سیاسی، ئابوری و حوکمڕانی هەرێمی کوردستان و عێراق.

 

بەگوێرەی ڕاگەیەندراوێکی جڤاتی نیشتیمانیی گۆڕان،لەدەستپێکی کۆبونەوەکەدا، سەرجەم ئەندامان سوپاس و پێزانینیان ئاراستەی پزیشک و کارمەندانی تەندروستی، پۆلیس و هێزەکانی ناوخۆ، هەروەها حکومەتی خۆجێی لە پارێزگاکان، ئیدارە سەربەخۆکان و هاونیشتیمانیان کرا، کە لەگەڵ سەرهەڵدانی پەتای کۆرۆنا خۆنەویستانە ئەرکەکانیان جێبەجێ کردوە و پابەندبون بە خۆپارێزی.

 

هاوکات ئاماژە بەوەشکراوە، هەر لە کۆبوونەوەکەدا ئەم راسپاردە و بڕیارانە پەسەند کران:

 

یەکەم: جڤاتی نیشتیمانیی بزوتنەوەی گۆڕان بە وردی هەڵسەنگاندنی بۆ بەشداری لە کابینەی نۆی حکومەتی هەرێم کرد، قەیرانی قوڵی سیاسی و ئابوریی و دارایی هەرێمی کوردستان ئەنجامی حوکمڕانی خراپ و نادادپەروەری و گەندەڵی رابردووە، هەروەها، جەختی کردەوە لە سەر ئەنجامدانی چاکسازی و گۆڕانکاری ریشەیی، وە بەشداری بزوتنەوەی گۆڕانیش لە کابینەی نۆ تەنیا بەم ئامانجەیە و، لەم چوارچێوەیەشدا پشتیوانی تەواوی تیمی خۆی دەکات لە حکومەتدا.

 

دوەم: حکومەتی هەرێمی کوردستان پێویستە پابەند بێت بە راگەیندراوی کۆتایی کۆبونەوەی ئەنجومەنی وەزیران لە ٢١ی ٦ی ٢٠٢٠ کە تەنها بۆ یەک مانگ موچەی فەرمانبەران کەم ئەکرێتەوە و ئەو رێکارە کاتییە. بزوتنەوەی گۆڕان جەخت ئەکاتەوە کە حکومەت هەرێم  پابەندبێت بەو بەڵێنەوە، بۆ ئەم مەبەستەش پێویستە:

 

١. چاکسای ریشەیی لە کەرتی نەوت و گاز، داهاتی ناوخۆ، خاڵە سنورییەکان، باج ئەنجامبدرێت.

 

٢. رێککەوتن لەگەڵ حکومەتی فیدراڵی بە پێویست دەزانێت، لەم پێناوەشدا پێویستە هەردوولا پابەندی ماف و ئەرکەکانیان بن.

 

٣. پێویستە دەستەبەجێ تەواوی داهات بگەڕێتەوە بۆ خەزێنەی حکومەت و کۆتایی بە قۆرخکاری و دەستێوەردانی کۆمپانیای حیزبی بهێندرێت، ئەمەش هەنگاوێکی گرنگە بۆ زیادکردنی داهات و پێدانی موچەی هاونیشتیمانیان لە کاتی خۆیدا.

 

سێیەم: چاکسازی لە ناو هێزەکانی پێشمەرگە و پۆلیس و هێزەکانی ناوخۆ بکرێت بە نەهێشتنی دەستی حیزب لەناویاندا و کردنیان بە دامەزراوەی نیشتیمانی. 

 

چوارەم: مانەوە و گەشەکردنی هەرێمی کوردستان بەندە بە بنیاتنانی پایەکانی حکومڕانی باش، بەدەستهێنانەوەی متمانەی هاونیشتیمانیان، جێبەجێکردنی ستراتیژی هاوسەنگی لە پەیوەندییە هەرێمی و نێودەوڵەتیەکان.

 

پێنجەم: سەبارەت بە پەیوەندی نێوان لایەنە سیاسیەکان پێویستە کۆتایی بهێندرێت بە دروستکردنی گرژی و ئاڵۆزی دەستکرد و لاوەکی، کە لە روانگەی ئێمەوە بیانوە بۆ دواخستن و خۆدزینەوە لە ئەنجامدانی چاکسازی ریشەیی.

 

شەشەم: بزوتنەوەی گۆڕان ئاڵوگۆڕ و گۆڕانکاری لە حکومەتی خۆجێی پارێزگای سلێمانی، هەڵەبجە، ئیدارەی راپەڕین و گەرمیان ئەنجام دەدات.

 

لە کۆتایی ڕاگەیەندراوەکەی جڤات نیشتیمانیی گۆڕاندا هاتووە: "دڵنیاین دەتوانین قەیرانی نەخوازراوی سیاسی و دارایی بە بەشداری چاکسازیخوازان و هاونیشتیمانیان تێدەپەڕێنین، بزوتنەوەی گۆڕان بە باوەڕێکی نەپساوە پابەندە بە ئەرکی نیشتیمانی و ئەخڵاقی خۆی کە هەمیشە وەک داکۆکیکاری مافی هاونیشتیمانیان ئەمێنێتەوە. لەم پێناوەدا هەمو هەنگاوێکی پێویست ئەگرێتەبەر."