گه‌ڕان

Shadow Shadow
سیاسه‌تی

سەرۆکی پەرلەمان: ساڵێکە هەوڵدەدەین بۆ دەرکردنی چەند یاسایەک لەبەرژەوەندی جوتیاران بەڵام پێمان نەکراوە

2020.07.07 - 20:36
سەرۆکی پەرلەمان: ساڵێکە هەوڵدەدەین بۆ دەرکردنی چەند یاسایەک لەبەرژەوەندی جوتیاران بەڵام پێمان نەکراوە

ناس کورد-

سەرۆکی پەرلەمانی کوردستان لەسەر کێشەی جوتیاران و ساغنەبوونەوەی بەرهەمەکانیان هاتەدەنگ و ڕایگەیاند، نزیکەی ساڵێکە هیچ نەماوە نەیکەن بۆ چەند یاسایەک لە بەرژەوەندی جوتیاران، بەڵام تائێستا نەیانتوانیوە جێبەجێی بکەن، دەشڵێت، چارەسەرکردنی ئەو کێشەیە بە وەزیرێک ناکرێت و پلانی ستراتیژی دەوێت.

 

لە ڕونکردنەوەیەکدا ڕێواز فایەق، سەرۆکی پەرلەمانی کوردستان ڕایگەیاند: "ئەرکی پاراستن و دۆزینەوەی بازاڕ بۆ بەرهەمی ناوخۆیی، کشتوکاڵی بێت یان پیشەسازیی، پلانی ستراتیژی و زەمینەی تەشریعی دەوێت، نزیکەی ساڵێکە هیچ نەما بۆ پەسەندکردنی پێشنیازە یاساکانی (پاراستنی بەرهەمی ناوخۆیی، سندوقی بیمەی کشتوکاڵی و ڕێکخستنەوە و بەڕێوەبردنی عەلوەکان) نەیکەین، کەچی تا ئێستا پێمان نەکراون بە یاسا و هەرجارەی بەهۆکارێک ئەگەڕێینەوە چوارگۆشەی یەکەم."

 

ئاماژەی بەوەشكردووە: "هەموو دامەزراوەکانی هەرێم، ڕاگەیاندن و خودی هاووڵاتیانیش هەریەکەمان بەقەدەر توانا و دەستڕۆیی و دەسەڵاتمان پشکی بەرپرسیارێتی پاراستنی بەرهەمی خۆماڵیمان دەکەوێتە ئەستۆ، ئەگەر پێکەوە ئەو پلانە ستراتیژیە و ئەو زەمینە تەشریعیە ئامادە و ئاراستە نەکەین، بەرهەمهێنی خۆماڵی هەموو ساڵێک ڕەنج بەخەسار دەبێت ."

 

سەرۆکی پەرلەمانی کوردستان باسی لەوەشکردووە: "گرێیەکە بە یەک وەزارەت و لای يەک وەزیر ناکرێتەوە، بەرپرسیارێتییەکە هاریکارانە و دەستەجەمعیە، تەنها ئەوکاتە دەتوانین دڵنیایی بدەینە بەرهەمهێنی کوردستانی کە دروشمە زۆر و زەوەندەکانی هەڵبژاردن و کارنامەی حکومەت بۆ هەمەچەشنکردنی سەرچاوەکانی داهات بەکرداریی بخرێتە بواری جێبەجێکردن و سنورەکان بەسەر ئەو هەموو کاڵا و بەرهەمە دەرەکیەدا دابخرێت کە کاڵا و بەرهەمی خۆماڵی ناتوانێت کێبەرکێیان بکات و خۆی لەبەردەمیا ڕابگرێت."

 

ڕێواز فایەق ئەوەشی خستووەتەڕوو: "ئەوەش بە تەنها بە وەزیری کشتوکاڵ ناکرێت، بەڵکو ئیرادە و بڕیاری حکومەتی بۆ ڕووبەڕوبوونەوەی نفوزی کۆمپانیا و بازرگانە خاوەن دەسەڵاتەکان و یاسایەکیشی بۆ پاراستنی بەرهەمی خۆماڵی دەوێت کە لە بەرنامە و پلانی دەستێکی ئەم خولەی پەرلەمان بووە."

 

سەرۆکی پەرلەمانی کوردستان لە کۆتایی پەیامەکەیدا ئاماژەی بەوەکردووە: هیوادارم ئەم دۆخەمان بۆ بووبێتە دەرس و پەلە و دەستوبرد بکەین لە پەسەندکردنی ئەو یاسایە و دەبێت حکومەتیش بەرپرسیارێتی دەستەجەمعی بۆ پێدانی دڵنیایی بە جووتیاران لە ئەستۆبگرێت و بەجۆرێک لە جۆرەکان ئەم دۆخی بێئومێد بوونەیان بۆ قەرەبوو بکاتەوە."

 

ئەمە لەکاتێکدایە، ساڵانە لەگەڵ کاتی بەرهەمێنانی بەرهەمی ناوخۆیی کشتوکاڵی لە هەرێم، کێشەی ساغنەبوونەوەی بەرهەمەکان دروست دەبێت و بەهۆیەوە جوتیاران بەرهەمەکانیان فڕێدەدەن و پارەی خەرجییەکانیشیان دەستناکەوێتەوە.