گه‌ڕان

Shadow Shadow
سیاسه‌تی

سودی هەیە یان زیان؟

خەڵکی لە سلێمانی سەریان کردووەتە کڕینی تمەن بەهۆی داڕمانی مێژوویی بەهاکەى

2020.07.05 - 14:50
خەڵکی لە سلێمانی سەریان کردووەتە کڕینی تمەن بەهۆی داڕمانی مێژوویی بەهاکەى

ناس کورد- هەڤاڵ فەتاح

بەهۆی هەڵبەز و دابەزی بەهای تمەنی ئێرانی بازاری دراو جموجۆڵێکی باشی تێکەوتەوە، بازرگانێکی دراویش دەڵێت، خەڵکێکی زۆری دەرەوەی شاری سلێمانی لە ئێستادا سەرقاڵی کڕینی تمەنن بەهیوای ئەوەی لە ڕۆژانی داهاتوودا بەهاکەى دیسان سەرکەوێتەوە. 

 

ساجد محەمەد، بازرگانی دراو لە بازاری دۆلارەکەی شاری سلێمانی تایبەت بە ناس کوردی ڕاگەیاند: "نرخی تمەن بەشێوەیەکی زۆر بەهاکەی لە دەستداوە، بەراورد بە هەفتەی ڕابردوو لە 15%ی باهاکەی لە دەستداوە".

 

لەبارەى دۆلارەوە، ئەمڕۆ یەکشەممە دۆلارێکی ئەمریکی بەرامبەرە بە 19 هەزار و 700 تمەن، واتە 100 دۆلاری ئەمریکی بەرانبەر بە ملیۆنێک و 970 هەزار تەمەن مامەڵەی پێوە دەکرێت.

 

وتیشی، "بەو هۆکارە، لە ئێستادا خەڵکێکی زۆری دەرەوەى شاری سلێمانی بە تایبەتی ناوچەکانی نزیک لە سنوری ئێران سەرقاڵی کڕینی تمەنن ئەوەش بە هیوای ئەوەی لە ڕۆژانی داهاتوودا بەهاکەى بەرزبێتەوە و بە نرخێکی باش بیفرۆشنەوە، بەڵام ئەوەش پێشبینی ناکرێت و مەترسی زۆری هەیە".

 

دەشڵێت، "بۆیە لە ئێستادا بازاری دۆلارەکەی شاری سلێمانی جمەی دێت".

 

"خراپی دۆخی ئابوری ئێران بەهۆی قەیرانی کۆرۆنا و سزاکانی ئەمریکاوە وایکردووە تمەن هاڕە بکات" ساجد محەمەد وای وت.

 

سەبارەت بەنرخی دۆلار بەرانبەر بە دیناری عێراقی ساجد محەمەد وتی: "نرخی دۆلار لە ئێستادا تاڕادەیەک جێگیرە ئەوەش بەهۆی دابەشکردنی موچە و پاڵپشتیکردنی بانکی ناوەندی عێراق لە دراوی نیشتیمانی، چونکە بانکی ناوەندی عێراق ڕۆژانە 215 ملیۆن دۆلار لە بازاری مەزادی دراوەکان دەفرۆشێت".

 

سەبارەت بە نرخی دراوەکان بۆ ئەمڕۆ یەکشەممە، 5ی تەموزی 2020، دراوەکان بەم شێوەیەی خوارەوە مامەڵەیان پێوە کراوە:

100 دۆلار به‌ 123 هه‌زار دینارە‌.

 100 یۆرۆ به‌ 137 هه‌زار دیناره‌.

 100پاوه‌ند به‌ 152 هه‌زار دیناره‌.   

100لیره‌ی توركی به‌ 18 هه‌زار و 250 دیناره‌.