گه‌ڕان

Shadow Shadow
سیاسه‌تی

ئەو بڕە پارەیەى دەگەڕێتەوە بۆ حکومەت نادیارە

لیژنەى دارایی پەرلەمان بۆ ناس کورد: لەوانەیە جێبەجێکردنى یاساى چاکسازیی ڕێگری بۆ دروستبێت

2020.07.01 - 11:57
لیژنەى دارایی پەرلەمان بۆ ناس کورد: لەوانەیە جێبەجێکردنى یاساى چاکسازیی ڕێگری بۆ دروستبێت

ناس کورد-

سەرۆکى لیژنەى دارایی پەرلەمانى کوردستان ڕایگەیاند، لەوانەیە جێبەجێکردنى یاساى چاکسازی ڕێگری بۆ دروستبێت بەڵام دەبێت هەر جێبەجێبکرێت، جەختیشدەکاتەوە هێشتا دیار نییە بەهۆى جێبەجێکردنى یاساکەوە ئەو بڕە پارەیە چەندە کە دەگەڕێتەوە بۆ حکومەت.

 

دووشەممەى ڕابردوو وەزارەتى دارایی هەرێم رێنماییەکانى تایبەت بە جێکردنى یاساکەى چاکسازى دەرکرد، بەوەش یاساکە خرایە بوارى جێبەجێکردنەوە.

 

زیاد جەبار، سەرۆکى لیژنەى دارایی پەرلەمانى کوردستان بە ناس کوردى ڕاگەیاند، "جێبەجێکردنى یاساکە کاتێکى زۆرى دەوێت و ئاسان نییە، چونکە دەبێت پێداچونەوە بە دۆسیەى سەرجەم موچەخۆراندا بکرێت".

 

وتیشى، "هێشتا دیار نییە و کەس نازانێت ئەو بڕە پارەیە چەند کە حکومەت بەهۆى جێبەجێکردنى یاساکەوە بۆى دەگەڕێتەوە، پێشتریش ئەو داوایەمان لە حکومەت کردووە، دواى جێبەجێکردنى دەردەکەوێت بڕە پارەکە چەندە".

 

لەئێستادا حکومەتى هەرێم رێکار و میکانیزمى تایبەتى دەرکردووە بۆ جێبەجێکردنى یاساکە و رەوانەى سەرجەم وەزارەتەکانى کردووە بۆ ئەوەى کارەکانیان بەپێی ئەو میکانیزمانە ئەنجام بدەن.

 

زیاتر بخوێنەوە: ناس کورد خشتەى ڕێکار و میکانیزمی جێبەجێکردنی یاسای چاکسازی موچە و دەرماڵ و خانەنشینی بڵاودەکاتەوە (بەڵگە)

 

سەرۆکى لیژنەى دارایی باسى لەوەکرد، لەبەرئەوەى یاساکە دەستبردنە بۆ بەرژەوەندى کۆمەڵێک کەسى زۆر، رەنگە رێگرى بۆ دروستبێت و جێبەجێکردنى ئاسان نەبێت، بەڵام دواجار هەر جێبەجێدەکرێت و دەبێت حکومەت پەلەى تێدا بکات.

 

ڕونیشیکردەوە، "هەندێک مادەى یاساکە بە بڕیارێک جێبەجێدەکرێت، هەندێکى دیکەى پێویستى بەکاتى زۆر و پێداچونەوەیە بە دۆسیەکان و وردەکاریی زۆرى تێدایە".

 

زیاد جەبار جەختیکردەوە، چاودێرى کارەکانى حکومەت دەکەن بۆ جێبەجێکردنى یاساى چاکسازی.

 

رۆژى 16ی کانونی دووەمی 2020 پەرلەمانى کوردستان یاساى چاکسازیی لە موچە و دەرماڵە و بەخشین و ئیمتیازاتەکان و خانەنشینى پەسەندکرد کە لە 19 ماددە پێکهاتووە و لەمانگى دواتریشدا سەرۆکى هەرێم واژۆى لەسەرکرد.