گه‌ڕان

Shadow Shadow
سیاسه‌تی

داواى سزادانى تورکیا دەکەن

ئۆپراسیۆنەکانى تورکیا لە هەرێمى کوردستان ئەندامانى کۆنگرێسى ئەمریکاى هێنایە دەنگ 

2020.06.30 - 15:54
ئۆپراسیۆنەکانى تورکیا لە هەرێمى کوردستان ئەندامانى کۆنگرێسى ئەمریکاى هێنایە دەنگ 

ناس کورد- 

بەردەوامبوونی تورکیا لە دەستدرێژی و هێرشکردنە سەر ناوچەکانی هەرێمی کوردستان بەبیانووی بوونی گەریلاکانی پارتی کرێکارانی کوردستان، کۆنگرێسی ئەمریکای هێنایەدەنگ و ژمارەیەک ئەندامی ئەو دەزگا ئەمریکییە داوایانکرد  هەڵویستی توند بەرانبەر تورکیا بگیرێتەبەر. 

 

چەند ڕۆژێکە تورکیا بە بیانووی بوونی بارەگاکانی پارتی کرێکارانی کوردستان(پەکەکە)  لە هەرێمی کوردستان ئۆپڕاسیۆنی (چڕنووکی داڵ و چنگی پڵنگی) ڕاگەیاندووە، دەستدرێژییەکانی سوپای تورکیا زیانێکی گەورەی داوە لەموڵک و ماڵی هاووڵاتیانی ناوچەکانی پارێزگای دهۆک و دەیان هاووڵاتی سیڤیل لە هەردوو پارێزگای سلێمانی و دهۆک بوونەتە قوربانی. 

 

 بەگوێرەی ڕاپۆرتێکی ڕۆژنامەی" ناشیۆناڵ ئینترێست"ی ئەمریکی، ئیلیۆت ئێنجڵ، سیناتۆری ئەمریکی لە کۆنگرێسی ئەو وڵاتە ڕاگەیاندراوێکی بڵاوکردوەتەوە کە تێیدا بەتوندی سەرکۆنەی هێرشەکانی تورکیای کردووە بۆ سەر ناوچە کوردییەکان و ئیزیدییەکانی هەرێمی کوردستان و کردەوەکانی تورکیاشی بە " ملهوڕی و مەترسیدار" ناو بردوە.

 

بەگوێرەی ڕۆژنامە ئەمریکییەکە، ئینجڵ داواشیکردووە، "ئەردۆگان، سەرۆککۆماری تورکیا، بەپەلە دەست لەو کردەوانە هەڵبگرێت و پڕۆسە سەربازییەکە ڕاوەستێنێت".

 

هاوکات جیم کۆبەر، سیناتۆری ئەمریکی و نوێنەری شاری ناشڤیڵ-ى ئەمریکا کە لە ئێستادا لەو شارە  ڕەوەندێکی گەرەی کورد دەژین، دەربارەی لەشکرکێشییەکانی تورکیا بۆ سەر خاکی هەرێمی کوردستان وتویەتی : "زۆر نیگەرانە".

لای خۆشیەوە گیڵ مانشین، سەرۆکی لیژنەی ئازادی ئاینیی لە کۆنگرێسی ئەمریکا لەو بارەیەوە وتویەتی:"ئەوەی تورکیا دەیکات مەترسییەکی گەورەیە بۆ سەر ڕێسای هەمەچەشنی ناوچەکە کە خۆی لە بنەڕەتدا پێکەوە ژیان لەو ناوچانەدا گرفتی هەیە، خێزانە ئیزیدییەکانی ئەو ناوچانە دوچاری نەهامەتییەکی تر دەکاتەوە کە لەبنەڕەتدا خۆیان بەدەست کێشەی زۆرەوە دەناڵێنن".

 

فرانک باڵۆنی، سیناتۆرێکی دیکەی کۆنگرێسی ئەمریکی لە تویتێکدا ئاماژە بەوە کردووە" دەبێت ئەمریکا  لە ڕێگەی دیبلۆماتییەو بە هاوکاری هاوپەیمانەکانی کار بۆ ئەوە بکات بە زوترین کات کردەوە ملهوڕییەکانی ئەردۆگان ڕابگرێت". 

 

 کاردانەوە و لێدوانەکانی ئەندامانی کۆنگرێسی ئەمریکا دوای ئەوە هات، کە گرتە ڤیدیۆیی بۆردومانەکەی چەند ڕۆژی ڕابردووی تورکیا بۆ سەر ناوچەی ( کونەماسی) لە نزیک شاری سلێمانی بڵاوبووە کە تێیدا تورکیا لە ڕێگەی فڕۆکە بێفڕۆکەوانەکانیەوە بۆردومانی ئەو ناوچە گەشتیارییەی کرد کە کۆمەڵێک هاووڵاتی سیڤیل سەرقاڵی بەسەربردنی کاتێکی خۆش بوون لە و شوێنەدا، بۆردومانەکەش کوژراو و برینداری لێکەوتەوە، تورکیاش ڕایگەیاند ئەو هاووڵاتیانی نەکردوەتە ئامانج بەڵکو گەریلاکانی پارتی کریکارانی کوردستانى مەبەست بووە.