گه‌ڕان

Shadow Shadow
سیاسه‌تی

بۆچى کازمى دۆخەکەى گەرم نەکرد؟

بەرپرسێکى کەتائیبی حیزبوڵا هێرشدەکاتە سەر کازمى..’کارەکەى مناڵانە بوو’

2020.06.30 - 08:30
بەرپرسێکى کەتائیبی حیزبوڵا هێرشدەکاتە سەر کازمى..’کارەکەى مناڵانە بوو’

ناس کورد-

بەرپرسی ئەمنیی کەتائیبی حیزبوڵا، لە تویتێکدا سوکایەتی بە سەرۆکوەزیرانی عێراق کرد و ئۆپڕاسیۆنی هەڵکوتانە سەرئەندامانی میلیشاکەشی بە "کارێکی مناڵانە" ناوبرد.

 

ئەبوعەلی عەسکری، بەرپرسی ئەمنیی میلیشیاکانی کەتائبیی حزبوڵا، لە تویتێکدا هێرشی کردە سەر مستەفا کازمی، سەرۆکوەزیرانی عێراق و سوکایەتی پێکرد، لە تویتەکەدا هاتووە، "ئەو کارەی کازمی کردویەتی کارێکی مناڵانە بووە بەڵێنیشداوە جارێکی تر دووبارەی نەکاتەوە، ئەندامەکانی کەتائبیش ئازادکران ولایەنی ناوخۆیی و دەرەکی ڕۆڵی بەرچاویان هەبووە لەو کارە".

 

بڵاوبوونەوەى تویتەکەی عەسکری، کاردانەوەی بەشێکی زۆری لە عێراقییەکان بەدوای خۆیدا هێنا وبە شکاندنی سنور و شکۆی دەوڵەتی عێراقییان وەسفکرد.

 

سەربارەی ئەوەی تائێستا بە شێوەیەکی یەکلاکەرەوە عێراقییەکان نەیانتوانیوە لە کەسایەتی عەسکەری و ئەو زانیاریانەی کە بڵاویاندەکاتەوە دڵنیابن، بەڵام دەزگاکانی ڕاگەیاندن لەگەڵ ئەو کەسایەتییە وەک نوێنەری میلیشاکانی کەتائیبی حزبوڵا لە عێراق مامەڵە دەکەن.

 

لەو بارەیەوە عەلی جەلیل، چالاکوانی عێراقی دەڵێت "تویتەکەی عەسکەری ڕێژەیەکی زۆر ملهوڕی وسەرکێشی تێدایە، هاوشێوەی ڕەفتارەکانی دیکەی ئەو میلیشایەیە".

 

دەشڵێت "کازمی دەرفەتی گەرمکردنی زیاتری دۆخەکەی هەبوو، بەڵام  پاشەکشەی کرد".

 

لای خۆشییەوە مستەفا ناسر، ڕۆژنامەنوسی عێراقی دەڵێت"کازمی نەیتوانی ئازایەتی خۆی لە بەرەنگاربوونەوەدا بسەلمێنێت".

 

مستەفا حسین، ڕۆژنامەنوسیکی عێراقی دیکەیە لەو بارەیەوە  وتى "میلیشاکانی کەتائیبی حیزبوڵا زۆر بەلایانەوە گرنگە پارێزگاری لە وێنەی خۆیان لە ڕاگەیاندنەکاندا بکەن  بۆیە بە هەموو نرخێک ئەو کارە دەکەن".  

 

حسێن دەشڵێت "دەستگیرکردنی ئەندامانی  میلیشاکە لە ماوەی چەند ڕۆژی ڕابردوودا سەرکردەکانی ئەو هێزە چەکدارەی توشی شڵەژان کرد، بۆیە دەیانەوێت لاسایی داعش بکەنەوە لە  پیاهەڵدان بە تواناکانیان لە ڕێگەی ڕاگەیاندنەوە".

 

دوای ئازادکردنی فەرماندەو چەکدارە دەستگیرکراوەکانیان لەلایەنی حکومەتی عێراقەوە، ئەمینداری گشتی هێزەکانی کەتائیبی حزبوڵا ڕەتیکردەوە چەکەکانیان ڕادەستی حکومەتی عێراق بکەن.

 

پێشتر بەهۆی دەستگیرکردنی دوو فەرماندەی هێزەکەیان بەهۆی هاویشتنی کاتیوشا و بەئامانجگرتنی باڵیۆزخانەکان، حزبوڵا کە ڕێکخراوێکی چەکداری توندڕەوە و لەئێرانەوە نزیکە ڕایگەیاندبوو، مستەفا کازمی دەکەنە ئامانج.

 

شەوی 25-ی ئەم مانگە، هێزێکی دژە تیرۆری عێراق هەڵیکوتایە سەر بارەگاکانی کەتائیبی حزبوڵا بەمەبەستی دەستگیرکردنی ئەو فەرماندە و چەکدارانەی حزبوڵا کە دەستیان لە هاویشتنی موشەک بۆ باڵیۆزخانەکانی جیهان بەگشتی و ئەمریکا بەتایبەتی هەبووە.

 

بەگوێرەی زانیارییەکان، ئەو شەوە 22 ئەندامی سەربە کەتائیبی حزبوڵا دەستگیرکران، کازمیش رایگەیاندووە، ئەو هەنگاوەیان لەپێناوی گێڕانەوەی شکۆ بووە بۆ حکومەت.