گه‌ڕان

Shadow Shadow
سیاسه‌تی

پەی: ڕێواز فایەق لە هەڵوەشاندنەوەى بڕیارى هەڵگرتنى پارێزبەندى سۆران عومەر پەشیمان بۆتەوە

2020.06.29 - 13:34
پەی: ڕێواز فایەق لە هەڵوەشاندنەوەى بڕیارى هەڵگرتنى پارێزبەندى سۆران عومەر پەشیمان بۆتەوە

ناس کورد-

ئینستتیوتی پەی بۆ پەروەردە و گەشەپێدان ئاشکراى دەکات، سەرۆکى پەرلەمانى کوردستان لە بڕیارى هەڵوەشاندنەوەى هەڵگرتنى پارێزبەندى لەسەر سۆران عومەر پەرلەمانتارى کۆمەڵ پەشیمان بۆتەوە و لەو بارەیەوە چەند بەڵگەنامەیەکى خستووەتە ڕوو.

 

ئینستتیوتەکە لە راگەیەندراوێکدا ئاماژەى بەوە کردووە "بەپێی نوسراوێك بە ژمارە (4-5-1010) كە لە (28-6-2020) بە واژۆی سەرۆكی دیوانی پەرلەمانی كوردستان ئاراستەی پەرلەمانتار سۆران عومەر كراوە، هاوپێچی نوسراوی دادگاو پۆلیسی و لەگەڵدایەو داوادەكات ناوبراو وەك تۆمەتبارێك لە بنكەی پۆلیسی خانەقا لەهەولێر ئامادەبێت بەمەبەستی وەرگرتنی وتەكانی!".

 

لە راگەیەندراوەکەدا جەخت کراوەتەوە "ئەو بەڵگانە پێمان دەڵێن لە بنەماوە سەرۆكی پەرلەمان باوەڕی بە ‌هەڵوەشاندنەوەی بریاری ژمارە چوار نەبوو، هەر بۆیە لە وەقاییعی كوردستانیش بڵاوینەكردۆتەوە و پاڵپشت بە بڕیاری ژمارە (4) ی هەڵگرتنی پارێزبەندی كە جێگرەكەی دەریكردووە، داوا لە سۆران عومەر دەكات لەبنكەی پۆلیس ئامادەبێت".

 

ئەوەش رونکراوەتەوە "ئەگەر سەرۆكی پەرلەمان رێزی نوسراوەكەی خۆی بگرتایەو كاری پێ بكردایە دەبووایە هەر لەڕێگەی دیوانی پەرلەمانەوە لەبری ئەوەی نوسراوی ئاگاداركردنەوەی پۆلیس بۆ سۆران عومەر بنێرێت، نوسراوی بۆ دادگا بكردایە و رایبگەیاندایە كە ناوبراو ئامادەنابێ، چونکە پارێزبەندی بۆ گەڕاوەتەوە".

 

ئینستتیوتی پەی لە راگەیەندراوەکەدا سەرۆکى پەرلەمان بە ئەنجامدانى یارییەكی نایاسایی و ناسیاسی تۆمەتبار دەکات کە بە بڕواى ئەوان " بەڕێگەی نایاسایی هاوكار بوو كە پارێزبەندی لەسەر سۆران عومەر لابرێت، لەلایەكی ترەوە بەناوی شكۆی پەرلەمانەوە دوو مانگ پەرلەمانیشی پەكخست، دواتر نوسراوێكی دەركرد و ناوی نا گێڕانەوەی پارێزبەندی بۆ سۆران عومەر و وەك دەسكەوتێك بۆخۆی بەكاری هێنا! كەچی تازە دەچێتەوە سەر ئەو خاڵەی كە لە (7-5-2020) پارێزبەندی هەڵگیراوەو لەرێگەی سەرۆكی دیوانەوە پاڵپشت بەو بڕیارەی بە نایاسایی ناوی دەبرد داوادەكات سۆران عومەر وەك تۆمەتبار لەبنكەی پۆلیس ئامادەبێت!".

 

پەى ئاماژە بەوە دەکات، بابەتی سەرەكی چوون و نەچوونی پەرلەمانتار سۆران عومەر نیە بۆ بەردەم دادگا، بەڵكو قسە لەسەر ئەوەیە كە ئەم دامەزراوە گرنگەی ناوی پەرلەمانە لەڕێڕەوی خۆی لادراوە و بۆ مەرامی تر بەكار دەهێنرێت، لەبری ئەوەی لەم قۆناغە قورسەی هەرێمدا بە ئەركەكانی خۆی هەستێت، نزیكەی دوو مانگە خەریكی یارییەکی ترسناکە. لەكاتێكدا هەرێم لەقەیرانی ئابوری و سیاسی و تەندروستی و ... نغرۆ بووە!

 

پەى بە ئەركی پەرلەمانتاران و بەتایبەتی ئەو فراكسیۆنانەی كە پێشتر ناڕەزاییان لە بڕیاری ژمارە (4)ی هەڵگرتنی پارێزبەندییەكە دەربڕیبوو، دەزانێت کە ئەمڕۆ لەدانیشتنی پەرلەماندا ئەو پرسیارە لە بەڕێز سەرۆكی پەرلەمان بكەن كە: بۆچی رێزی لەو بڕیارەی خۆی نەگرت كە دوو مانگی بەهۆیە پەرلەمانی بۆ پەكخستبوو.

 

لەوەش گرنگتر كە پەیوەندی بە بژێویی موچەخۆران و پێشێلی یاساوە هەیە، حكومەت لە بڕیارێكی نایاساییدا موچەی كەمكردۆتەوە و بەبێ گەرانەوە پەرلەمانی کوردستان، بۆیە ئەركی پەرلەمان بوو لەدانیشتنی ئەمڕۆیدا یەكەم بڕگەی كاری ئەم پرسە بووایە، كەچی بەداخەوە پەرلەمان بەم ئەركە یاساییانە هەڵناسێت، لەبری ئەوە پەرلەمان بە بابەتی لاوەكییەوە سەرقاڵ كراوە. ئیتر ناكرێت دامەزراوە گشتی و چارەنوسسازەكان بۆ مەرام و مەبەستی تایبەتی بەكار بهێنرێن.