گه‌ڕان

Shadow Shadow
سیاسه‌تی

لەكاتی هەوڵی كودەتا سەربازییەكەی توركیادا ڕوویداوە  

ئەفسەرێكی پلە باڵای توركیا چیرۆكی ئەشكەنجەدانی لەناو زیندانەكانی وڵاتەكەیدا دەگێڕێتەوە

2020.06.29 - 08:42
ئەفسەرێكی پلە باڵای توركیا چیرۆكی ئەشكەنجەدانی لەناو زیندانەكانی وڵاتەكەیدا دەگێڕێتەوە

ناس کورد- 

ڕاپۆرتێکی ماڵپەڕی نۆردك مۆنیتۆر ئاشکراى دەکات، موراد كۆركمازی تەمەن 45 ساڵ كە ئەفسەرێكی پلە باڵای ناو سوپای توركیا بووە و لەساڵانی ڕابردودا چەندین ئەركی لەناوەوە و دەرەوەی توركیا پێسپێرداوە لەكاتی ڕوداوی هەوڵی كودەتاكەی سەر ئەو وڵاتە لەهاوینی ساڵی 2016،  بەفیڵ و تەڵەكە فەرمانی پێكراوە بەرەو پاراستنی بارەگای سوپاسالاری توركیا لەئەنكەرە بكەوێتە ڕێ، بەڵام كاتێك بۆ جێبەجێكردنی ئەركەكەی دەچێت، پۆلیسی دژە تیرۆر دەستگیری دەكات و دواتر دەخرێتە ژێر ئازار و ئەشكەنجەدانێكی زۆرەوە و بۆ ماوەی دوو ساڵ زیندانی دەكرێت.

 

دوای دەرچوونیشی لەزیندان، لەسكاڵا نامەیەكدا ئەفسەرە توركەكە دەڵێت، ئەوكاتەی فەرماندەی كەتیبەی 26ی تایبەت بووە، لە ڕۆژی دووەمی هەوڵی كودەتا سەربازییەكەی توركیادا، پەیوەندیی پێوە کراوە بەمەبەستی پاراستنی بارەگای سوپا سالاری توركیا لەپایتەخت لەدژی هێرشێكی تیرۆریستی .

 

ئاماژەی بۆ ئەوەش كردووە، ڕاسپاردنی بۆ ئەو كارە بەپێی گواستنەوەی چەند زانیارییەكی دەزگای هەواڵگری توركیا بووە كاتێك خۆیی و چەند سەربازێك چونەتە ئەوێ بۆیان دەركەوتووە ئەوە داوێكە و بۆیان دانراوە چونكە پۆلیس بەسەر شوینەكەیدا داوە و ئەوانیش خۆیان بەچەكەكانیانەوە ڕادەستكردووە.

 

هەر بەگوێرەی ماڵپەڕەكە پلانی هێرشكردنە سەر بارەگای سوپاسالار درۆ دەرچووە و فێڵێك بووە بۆ سەپاندنی هەژموونی ئەردۆگان بەسەر توركیادا ئەوەش لەڕێگەی ڕواندنی  ترس و دڵەڕاوكێ لەدڵ و دەروونی خەڵكیدا و هەروەها سەركوتكردنی هەر نەیارێك لەناو كەرتی سەربازیدا كە دژی ئەو ستەمكارییانە بێت.

 

تیپەڕینی بەئازار و ئەشكەنجەی سەختدا

 

لەدرێژی گێڕانەوەی چیرۆكە بەئازارەكەیدا كۆركماز باسی لەوەش كردووە، لەلایەن پۆلیسی دژە تیرۆری ئەنكەرەوە قۆڵبەستكراوە و جنێوى زۆری پێدراوە و دواتر بەسەر شۆستەكاندا براون بێ هیچ  پاسەوانێك و  ڕوبەڕووی خەڵكی توڕەی شەقامەكان بوونەتەوە لەئەنكەرە كە دوای ڕوداوەكە بۆ گردبونەوەی ناڕەزایەتی هاتونەتە سەر شەقامەكان.

 

باسی لەوەش كردووە، ئەو كاروانە ئۆتۆمبیلەی ئەوانی گواستووەتەوە لەسەر خۆی بەناو خەڵكەدا تێپەڕیوە بۆ ئەوەی لەلایەن خەڵكی ناڕازییەوە بەردباران بکرێن و ئەوەش بووەتە هۆی برینداربوونیان و خوێنیان لێ چۆڕیوە.



ڕەچاوی دۆخی تەندروستی نەكراوە

 

كۆركماز وتوشییەتی، دواتر ڕیزێك پۆلیس بەسەرە بەشەق و زلە لێیانداوە و بەهۆی لیدانەوە ددانەكانی زیانیان بەركەوتووە و لەكۆتایدا بەهۆی لێدانەوە لەهۆش خۆی چووە لە نەخۆشخانە بەئاگا هاتووەتەوە.

 

كاتێك پزیشكەكان داوای مانەوەی كۆكمازیان لەناو نەخۆشخانەكە  كردووە بەهۆی دۆخی ناجێگیری تەندروستیەوە تا چاكدەبێتەوە، پۆلیسی دژە تیرۆر سووربون بیبەنە دەرەوە.

 

دواتریش كە براوەتە بنكەیەكی پۆلیس ڕوبەڕووی جۆرەها ئازار و ئەشكەنجە كراوەتەوە و دوای چوار ڕۆژ مانەوەی لەژورێكدا ئازار و ئەشكەنجەدانی لەسەر هەڵنەگیراوە و  چەند خواردنێكی كەمی پێدراوە.

 

بەگێڕانەوەى ئەو ئەفسەرە، پاش ئەوە پزیشك بەئامادەبوونی دوو پۆلیس پشكینیی بۆ كردووە گەرچی خوێن بەلای گوێ و دەموچاوییەوە بینراوە بەڵام فەرمان بەپزیشكەكان كراوە لەڕاپۆرتەكانیان بنوسن توشی هیچ سزایەكی جەستەیی و دەروونی نەكراوەتەوە.

 

ماڵپەڕەكە رونیدەکاتەوە، دوای دەرچوونی لەزیندان ساڵی 2018 سكاڵانامەیەكی فەرمی لەسەر ڕوبەڕووبونەوەی بەئازار و ئەشكەنجەدان لەلای نوسینگەی دادواكاری گشتی لەئەنكەرە تۆمار دەكات و بەڵام ڕوون نیە چارەنوسی سكاڵاكەی بەكوێ دەگات وبەپێی بەدواداچونی ماڵپەرەکەش دەرفەتی لێكۆڵینەوە لەئازار و ئەشكەنجە لاوازە هەر بۆیە ئەوەش پاڵی پێوە ناوە سكاڵا لەدەزگایەكی باڵاتری دادوەری ئەو وڵاتە تۆمار بكات.