گه‌ڕان

Shadow Shadow
سیاسه‌تی

تاقیکردنەوە گشتییەکانی هەرێم لەکاتی خۆیدا بەڕێوەدەچن؟

2020.06.28 - 15:43
تاقیکردنەوە گشتییەکانی هەرێم لەکاتی خۆیدا بەڕێوەدەچن؟

ناس کورد - هەڤاڵ فەتاح

تائێستا هیچ گۆڕانکارییەک بەسەر خشتە و وادەی ئەنجامدانی تاقیکردنەوە گشتییەکانی پۆلی 12ى ئامادەییدا نەهاتووە، پەروەردەی سلێمانیش لە چوارچێوەی ڕێکارە تەندروستییەکاندا ئامادەکاری بۆ ئەنجامدانی تاقیکردنەوەکان دەکات.

 

عومەر ئەمین، جێگری بەڕێوەبەری گشتی پەروەردەی سلێمانی  تایبەت بە ناس کوردی ڕاگەیاند: "هیچ گۆڕانکارییەکان بەسەر پلان و خشتەى تاقیکردنەوەکاندا نەهاتووە، هەر گۆڕانکارییەکیش بکرێت بە فەرمی قوتابیان ئاگادار دەکرێنەوە".

 

لەئێستادا دۆخی بڵاوبوونەوەى کۆرۆنا لە هەرێم بە تایبەت سلیمانی لە ئاستێکی مەترسیداردایە، جارێکی تر چەند ڕێکار و بڕیارێک بۆ ڕێگری لە زیاتر تەشەنەسەندنی ڤایرۆسەکە گیراوەتەبەر.

 

عومەر ئەمین وتی، "لە ئێستادا وەزارەتی پەروەردە چاودێری دۆخی تەندروستی هەرێم بەگشتی و شاری سلێمانی دەکات بەتایبەتی، هەر بڕیارێک لەبارەی تاقیکردنەوەکانەوە بدرێت بەهەماهەنگی لەگەڵ وەزارەتی تەندروستی و ئۆپەراسیۆنی بەرەنگاربوونەوەى ڤایرۆسی کۆرۆنا دەبێت".

 

جەختیکردەوە کە ڕێکاری تەندروستی پێویست دەگیرێتەبەر لەکاتی تاقیکردنەوە گشتییەکاندا، بۆیە لەئێستادا لەهەوڵی ئەوەدان ژمارەی خۆیندکارانی ئەزمووندەر لە هۆڵەکانی تاقیکردنەوەکان کەمبکەنەوە بەجۆرێک دانیشتنی نێوان خۆێندکارێک و یەکێکی تر دوو مەتر زیاتر بێت.

 

"بۆئەوەی خۆێندکاران پارێزراوبن لە توشبوون بە پەتای کۆرۆنا دەبێت لەکاتی ئەنجامدانی تاقیکردنەوەکان دەمامک و دەستەوانە بپۆشن" عومەر ئەمین وای وت.

 

ئاشکراشیکرد کە "بەشێکی زۆر لە خوێندکارانی پۆلی 12 ئامادەیی لە سنوری پەروەردەی سلێمانی ئەزموونەکانیان لە هۆڵی زانکۆکان و پەیمانگاکاندا ئەنجامدەدن ئەوەش بۆ مسۆگەرکردنی تەزووی کارەبا و ڕەچاوکردنی مەودای سەلامەتی بۆ خۆپارێزی لە توشبوون بە ڤایرۆسی کۆرۆنا".

 

"لە ئێستادا دەیان هۆڵمان لە زانکۆی سلێمانی و کولێژی پۆلەتەکنێکی و پەیمانەگانی دیکە پارێزگای سلێمانی وەرگرتووە بۆ ئەو مەبەستە".

  

بڕیارە 11ی تەموزی داهاتوو یەکەم ڕۆژی تاقیکردنەوەی پۆلی 12ى ئامادەیی بەڕێوەبچێت.