گه‌ڕان

Shadow Shadow
سیاسه‌تی

دەیانەوێت چی بکەن؟

ئەندامێکی مەکتەبی سیاسی پارتی: پەکەکە و تورکیا ئامانجێکی هاوبەشیان هەیە

2020.06.27 - 17:48
ئەندامێکی مەکتەبی سیاسی پارتی: پەکەکە و تورکیا ئامانجێکی هاوبەشیان هەیە

ناس کورد-

حەعفەر ئیمینیکی، ئەندامی مەکتەبی سیاسیی پارتی دەڵێت، لەئێستا پێکدادانە سەربازییەکانی نێوان پەکەکە و سوپای تورکیا نەک تەنها لە هەڵکشانی گەورەدایە، بەڵکو چووەتە قۆناغێکی مەترسیدارەوە کە زەنگی ئاگادارکەرەوەن بۆسەر ئاسایشی نیشتمانی هەرێمی کوردستان لەڕووی سیاسیی و ئەمنی و ئابورییەوە.

 

جەعفەر ئیمینیکی کە جێگری پێشووی سەرۆکى پەرلەمانی کوردستانیش بوو لە فەیسبوکی خۆی نوسینێکی بەناوی "بژاردەى سەربازی لەنێوان خواستی فراوانخوازی دەوڵەتی تورکیا و کەلـلەڕەقی سەرکردایەتی پارتی کرێکارانی کوردستان" بڵاوکردووەتەوە و دەڵێت، هەردوو لایەنی شەڕکەر ئامانج و بەرژەوەندی ستراتیژی هاوبەشیان هەیە، ئەویش لاوازکردنی هەرێمی کوردستانە لەڕووی سەروەریی و ئەمنی و ئابورییەوە.

 

لەبارەى هۆکارەکەى، جەعفەر ئیمینیکی ئاماژەى بەوەشکردووە، "بۆئەوەى (هەرێمی کوردستان) نەتوانێت هەستێتەوە وەک ئەوەى لە 10 ساڵی پێش هاتنی داعش ئەنجامی دا، هەروەها زۆر هۆکار هەن کە باس لە خواستی تورکیاش دەکەن تاوەکو لە ناوخۆدا ئەو پێکدادانانە بۆ بانگەشەی هەڵبژاردنەکان بەکاربهێنێت."  

"هەروەها چەند هۆکارێک هەن وا لە بەرپرسانی سەربازیی پەکەکە دەکات پێکدادانەکان لەناوخۆی هەرێمی کوردستاندا بەردەوام بن تا کاتێکی درێژ، ئەویش بۆئەوەى سەرنجی خەڵکی لابدا لەسەر نسکۆ و شکستە سیاسیی و سەربازییەکانی لەناوخۆی کوردستانی تورکیا، هەروەها بۆ دروستکردنی ناکۆکی سیاسیی لەناو هەرێمی کوردستان و هەوڵدان بۆ فراوانکردنی توڕەیی گەلی کوردستان کە بەمدواییە گەیشتووەتە لوتکە."

 

بە ڕای جەعفەر ئیمینیکی، لایەنی سەرەکی لە هاوکێشەکەدا سەرکردایەتی هەرێمی کوردستانە، "پێویستە پێش ئەوەى کار لە کار بترازێت هەنگاو بنێت و تەنها بە سەرکۆنەکردن و قوربانیدان نەوەستێت، چونکە هەردوو لایەنی پێکدادانەکە ڕەحم بە لایەنێک ناکەن کە لاواز بێت."