گه‌ڕان

Shadow Shadow
سیاسه‌تی

وتەبێژى هەپەگە بۆ ناس کورد: تورکیا دەیەوێت بەتەواوی باشوری کوردستان داگیر بکات

2020.06.27 - 14:31
وتەبێژى هەپەگە بۆ ناس کورد: تورکیا دەیەوێت بەتەواوی باشوری کوردستان داگیر بکات

ناس کورد - ئاکۆ حەمەد رابی

وتەبێژی هێزەکانی پاراستنی گەل (هەپەگە) ڕایگەیاند، لەپاڵ هێرش دژی گەریلا، ئامانجی ئۆپراسیۆنەکانی تورکیا "داگیرکردنی" تەواوەتی باشوری کوردستانە.

 

ناوەڕاستى ئەم مانگە تورکیا دەستپێکردنى ئۆپراسیۆنێکى سەربازى لەژێر ناوى (چڕنوکى هەڵۆ) لە هەرێمى کوردستان دژ بە بارەگاکانى پارتى کرێکارانى کوردستان (پەکەکە) دەستپێکرد و لەو چوارچێوەیەدا بۆردومانى چەند ناوچەیەکى لە هەرێمى کوردستان کرد، کە بەهۆیەوە ژمارەیەک هاوڵاتى مەدەنى گیانیان لەدەستدا.   

 

دیار دەنیز، وتەبێژی هێزەکانی پاراستنی گەل (هەپەگە) باڵی سەربازی پارتی کرێکارانی کوردستان (پەکەکە) بە ناس کوردی ڕاگەیاند، "تورکیا لەو ئۆپراسیۆنە سەربازیانەی کە ئێستا دەستیپێکردووە، تەکنیکی نوێی جەنگی و پێشکەوتوترین تەکنەلۆژیای جەنگی بەکار دەهێنێت و ئۆپراسیۆنەکەى ئەمجارەیان جیاوازە لەوانەى پێشتر".



ئاماژەی بەوەشدا، ئۆپراسیۆن و هێڕش و پەلامارەکانی تورکیا بێ وەڵامی گەریلاکان نەماوەتەوە و بە توندترین شێوە بەرپەرچیان داونەتەوەو تووشی شکستهاتوون.

 

دیار دەنیز باسی لەوەشکرد کە "گەریلاکانی ئازادی کوردستان ناهێڵن تورکیا سەرکەوتوو بێت و بە ئیرادەیەکی بەهێزەوە دژیان وەستاون."

 

پێشیوایە تورکیا لەپاڵ هێرشکردنە سەر گەریلا، "ئامانجى ستراتیژیی داگیرکردنی‌ باشوری  دەیانەوێت هەموو باشوری کوردستان داگیر بکەن، بەڵام گەریلاکان ڕێگریان لێدەکەن و وه ک چۆن کوردستانمان لە داگیرکاری داعش پاراست، بەهەمان شێوەش لە داگیرکاری تورکیا دەیپارێزین".

 

تورکیا لە ئۆپراسیۆنەکەى ئەمجارەیدا هێزى زیاترى کۆماندۆى رەوانەى خاکى هەرێمى کوردستان کردووە بەتایبەتى لەسنورى هەفتانین لە پارێزگاى دهۆک، سەربارى بۆردومانى چڕى ئاسمانى ناوچە جیاجیاکان، کە بەهۆیەوە ژمارەیەک هاوڵاتى مەدەنى شەهیدبوون.

 

هۆشیار زێباری، ئەندامی مەکتەبی سیاسی پارتی دوێنێ لە تویتێکدا ڕایگەیاندبوو، "هێرشی ئەم چەند ڕۆژەی توركیا لە سنوری زاخۆ لە هەرێمی کوردستان، گۆڕانكاری گرنگ و نوێی جیۆپۆلەتیكی نیشاندەدەن."  

  

ئاماژەی بەوەشکردووە " لێدوانەكانی بەرپرسانی توركیاش ئەوە پشتڕاست دەكەنەوە كە نیازیان هاتنەوەیە بۆ دەشتی نەینەوا و گەڕانەوە بۆ مێژووی كۆن، ئەوەش جێگای نیگەرانی ئێمەیە”.