گه‌ڕان

Shadow Shadow
سیاسه‌تی

دەستگیردەکرێت یان بەشداری دانیشتنەکەی دووشەممە دەکات؟

کەیسەکەى سۆران عومەر.. قسەى ڕێواز فایەق سەردەگرێت یان هێمن هەورامی؟

2020.06.27 - 13:55
کەیسەکەى سۆران عومەر.. قسەى ڕێواز فایەق سەردەگرێت یان هێمن هەورامی؟

ناس كورد - تایبەت

بابەتی هەڵگرتنی پارێزبەندی لەسەر سۆران عومەر، پەرلەمانتاری کۆمەڵی ئیسلامی لە ڕۆژی 7ی ئایاری ڕابردوو، هۆکارێک بوو بۆ پەکخستنی کۆبوونەوەکانی پەرلەمان، دواتر بڕیاری سەرۆکی پەرلەمان بۆ هەڵوەشاندنەوەى ئەوەندەى تر دۆخەکەى چەقبەستووە کرد.

 

فراكسیۆنی پارتی لە پەرلەمان سوورە لەسەر جێبەجێكردنی بڕیارەكە و چوونی سۆران عومەر بۆ دادگا، بڕیارەکەى سەرکى پەرلەمانیش بۆ هەڵوەشاندنەوەى بە نایاسایی دەزانێت، پەرلەمانتارێكی كۆمەڵی ئیسلامیش  دەڵێت، پەرلەمانتارەكەیان پارێزبەندی بۆ گەڕاوەتەوە و بڕیارەكەی ڕیواس فایەق لە ڕۆژنامەی وەقایعی كوردستان بڵاو دەكرێتەوە.

 

دوو ڕۆژ پێش ئێستا ڕێواز فایەق، سەرۆكی پەرلەمان لە لێدوانێكیدا دەستپێكردنەوەی دانیشتنەكانی پەرلەمانی ڕاگەیاند، ئەمڕۆ وادەی کۆبوونەوەکە دیاری کرا کە دووشەممەیە، بەڵام هێشتا کارنامەى دانیشتنەکە دیار نییە و نازانرێت كەیسەكەی سۆران عومەریش دەگاتە كوێ، ئایا دەتوانێت بەشداری دانیشتنەكان بكات و بڕیاری هەڵوەشاندنەوەی پارێزبەندییەكەی كاری پێدەكرێت یاخود فراكسیۆنی پارتی سووردەبێت لەوەی بچێتە بەردەم دادگا و دۆسیەكەی لەوێوە یەكلایی بكاتەوە.

 

لەو بارەیەوە، ڕێبوار عەبدولرەحیم عەبدوڵا، پەرلەمانتاری پارتی لەپەرلەمانی كوردستان بەناس كوردی ڕاگەیاند، "سۆران عومەر بە بڕیاری پەرلەمان پارێزبەندی لەسەر هەڵگیراوە و جگە لە دانیشتنێكی هاوشێوە بۆ گەڕانەوەی پارێزبەندییەكەی هیچ كەسێكی تری پەرلەمان ناتوانێت ئەو بڕیارە هەڵوەشێنێتەوە چونكە لەسەر بنەمایەكی یاسایی نابێت." 

 

وتیشی، نوسراوی سەرۆكی پەرلەمان بۆ هەڵوەشاندنەوەی بڕیاری پەرلەمان لەسەر هەڵگرتنی پارێزبەندییەکە، نوسراوی تاكەكەسێكە و خاوەنی یەك دەنگە و سەرۆكی پەرلەمان بەپێ مادەی 18 لە پەیڕەوی ناوخۆی پەرلەمان كە 14 دەسەڵاتی هەیە نە ڤیتۆی داوە پێی نە دەسەڵاتیشی داوە پێی بڕیارێكی لەو شێوەیە هەڵبوەشێنێتەوە.

 

"ئەگەر سەرۆكی پەرلەمان بتوانێت بە نوسراوێك بڕیارێكی هەڵبوەشێنیێتەوە ئیتر پێویستمان بە پەرلەمان و 110 پەرلەمانی دیكە نییە، ئەوەی كە ڕویدا و سەرۆكی پەرلەمان كردی، نمایشێكی سیاسی و مەهزەلەیەك بوو خۆیشی باش دەزانێت نایاسایی بووە و بۆشی نییە بڕیاری پەرلەمان هەڵوەشێنێتەوە."

 

"فەرمانی دەستگیرکردن بۆ سۆران عومەر بۆ دەردەچێت"

باسی لەوەش كرد کە "ئەنجومەنی دادوەری كار بە بڕیارێك ناكات كە سەرۆكی پەرلەمان شەخسی و تاكلایەنانە دەریكردبێت بۆ هەڵوەشاندنەوەی بڕیارێكی پەرلەمان بدات و ئامادەبوونی سۆران عومەریش لە دادگا بووەتە دوا وێستگە و ئەگەر سێ جاریش نەچێت ئەوا فەرمانی دەستگیركردنی بۆ دەردەچێت.

 

ئەو پەرلەمانتارەى پارتی ئەوەشی خستەڕوو، ئەگەر بڕیاری دادگا گەشتبێتە قۆناغی دەركردنی فەرمانی دەستگیركردن بۆ ناوبراو ئەوا ناتوانێت ئەو كاتە بەشداری دانیشتنەكانی پەرلەمان بكات.

 

لەبارەی چارەنوسی بڕیارەكەی سەرۆكی پەرلەمان بۆ گەڕانەوەی پارێزبەندی بۆ سۆران عومەر، ڕێبوار عەبدولڕەحیم وتی، " ئەو نوسراوەی ڕەوانەی لایەنە پەیوەندیدارەكان كراوە بەهیچ دەزانرێت چونكە ئەو نوسراوە لەسەر بنەمای یاسایی نەبووە ڕەنگە لەلایەن دادگاكانەوە وەڵامبدرێتەوە و پێی بڵێن هیچ سەنەدێكی یاسایی پاڵپشتی بۆ ئەو نوسراوە نییە یاخود ئەوەیە شوێنكەوتەی یاسایی نییە".

 

زیاتر بخوێنەوە: پارێزبەندى لەسەر سۆران عومەر پەرلەمانتارى کۆمەڵ هەڵگیرا

 

زیاتر بخوێنەوە: یەکەم لێدوانی سۆران عومەر دوای هەڵوەشاندنەوەى بڕیاری هەڵگرتنی پارێزبەندی لەسەری.. ’’سوپاس سەرۆک’’



ناس كورد لە سەرچاوەیەكی پەرلەمانییەوە زانیویەتی، سەرۆكی پەرلەمان بڕیاری هەڵوەشاندنەوەكەی بۆ گەڕانەوەی پارێزبەندی ڕەوانەی ڕۆژنامەی وەقایعی كوردستان و دادگا كردووە، بەڵام هێشتا بڕیارەكە بڵاونەكراوەتەوە بەهۆی فشارەكانی فراكسیۆنی پارتیەوە.

 

هەر بەپێی زانیارییەکان، لە ئەگەری ڕەتكردنەوەی بڕیارەكەی سەرۆكی پەرلەمان بۆ گەڕانەوەی پارێزبەندی بۆ سۆران عومەر لەلایەن دادگاوە بەپاساوی بێ بنەمای یاسایی لەوكارەدا ئەوكات سەرۆكی پەرلەمان دەتوانێت داوا لە ئەنجومەنی شورا بكات بۆ یەكلاییكردنەوەی ناكۆكییەكان لەسەر هەردوو بڕیارەكە، بڕیاری هەڵگرتنی پارێزبەندی و بڕیاری هەڵوەشاندنەوەى هەڵگرتنی پارێزبەندی.

 

فراكسیۆنی پارتی فشارەكانی بۆ ڕەتكردنەوەی بڕیارەكەی سەرۆكی پەرلەمان بەردەوامە و سورن لەسەر ئەوەی دەرئەنجامی دانیشتنەكەی 7ی ئایار كە هەڵگرتنی پارێزبەندی لەسەر ئەو پەرلەمانتارە لێكەوتەوە جێبەجێبكەن، ئەوەش بەپاساوی یاسایی.

 

"ئێستا سۆران عومەر خاوەنی پارێزبەندییە"

لەو بارەیەوە، ڕوپاك ئەحمەد، پەرلەمانتاری فراكسیۆنی كۆمەڵ لە پەرلەمانی كوردستان بەناس كوردی ڕاگەیاند، بڕیارەكەی سەرۆكی پەرلەمان یاساییە چونكە بڕیاری هەڵگرتنی پارێزبەندییەكە نایاساییە.

 

وتیشی، سەرۆكی پەرلەمان هەر بڕیارێك لەسەر بنەمای نایاسایی بدرێت لە دەسەڵاتی ئەودا هەیە هەڵیبوەشێنێتەوە.

 

پەرلەمانتارەكەی كۆمەڵی ئێسلامی دەشڵێت، بڕیارەكەش دەنێردرێت بۆ ڕۆژنامەی وەقایعی كوردستان و بڵاودەكرێتەوە، لەئێستاشدا سۆران عومەر خاوەنی پارێزبەندییە و دەتوانێت بەشداری دانیشتەكانی پەرلەمان بكات و ناچێتە دادگا.